الاكول اۋدانىندا تاكسيدەن 11 ميلليون تەڭگە ۇرلاعان كۇدىكتى ۇستالدى
تالدىقورعان. KAZINFORM - الاكول اۋدانىنىڭ ءۇشارال قالاسىندا ءىرى كولەمدە اقشا ۇرلاۋ دەرەگى تىركەلدى. قازىرگى ۋاقىتتا كۇدىكتى قاماۋعا الىنىپ، سوتقا دەيىنگى تەرگەۋ باستالدى.
جەتىسۋ وبلىستىق پوليتسيا دەپارتامەنتىنىڭ مالىمەتىنشە، وقيعا 11-قاڭتار كۇنى بولعان.
11 ميلليون تەڭگەگە كولىگىن ساتقان ەر ادام اقشانى پاكەتكە سالىپ، ونى «مەرسەدەس» ماركالى اۆتوكولىگىنىڭ جۇكسالعىشىنا قويعان. كەشكە ول تانىسىمەن مەيرامحاناعا بارىپ، شىققان سوڭ سول ماڭدا تاكسي ىزدەپ تۇرعان 2 جولاۋشىنى كەلەسى ءبىر ءدامحاناعا جەتكىزبەك بولادى. جولدا پاترۋلدىك پوليسيا قىزمەتكەرلەرى توقتاتىپ، جۇرگىزۋشى 10 مينۋتتاي بوگەلىپ قالعان. وسى ارالىقتا جۇكسالعىشتاعى اقشانى جولاۋشىلاردىڭ ءبىرى ۇرلاپ، قاشىپ كەتكەن.
- ەر ادام جۇكسالعىشتى اشىپ اقشاسىن تەكسەرگەن كەزدە، بىرنەشە كۋپيۋرا جەرگە شاشىلىپ، سول ماڭدا تۇرعان جاستاردىڭ نازارىن اۋدارعان. ولاردىڭ «اقشا ما؟» دەگەن سۇراعىنا «ءيا» دەپ جاۋاپ بەرىپ، ەش كۇدىكتەنبەستەن ايتقان جەرلەرىنە جەتكىزىپ سالۋ ءۇشىن كولىگىنە وتىرعىزعان. اقشا جوعالعان سوڭ جۇرگىزۋشى الاكول اۋدانىنىڭ پوليتسيا بولىمىنە ارىزداندى. پوليتسەيلەر جەدەل ارەكەت ەتىپ، ىزدەستىرۋ ءىس- شارالارىن ۇيىمداستىردى. كوپ ۇزاماي كۇدىكتى ۇستالدى. ول 24 جاستاعى جەرگىلىكتى تۇرعىن بولىپ شىقتى، - دەدى جەتىسۋ وبلىستىق پوليتسيا دەپارتامەنتى.
قازىرگى ۋاقىتتا بۇل فاكتى بويىنشا سوتقا دەيىنگى تەرگەۋ باستالدى، كۇدىكتى قاماۋعا الىندى.
وقيعانىڭ بارلىق ءمان-جايى انىقتالۋدا.
