اكەسى مەن جالعىز ۇلىنان ايىرىلعان جەتىسۋلىق جوعارىداعىلاردان ادىلدىك سۇرايدى
تالدىقورعان. KAZINFORM - جەتىسۋ وبلىسىندا ەكى ادامنىڭ ءومىرىن قيعان جول-كولىك وقيعاسىنا قاتىستى ءىس 4 ايعا سوزىلعان. قازا بولعانداردىڭ تۋىستارى بۇل ىسكە كۇمانمەن قارايدى. پوليتسيا دەپارتامەنتى سارامتاما تاعايىندالعانىن ايتتى.
وقيعا 2024 -جىلدىڭ 18-شىلدەسىندە «الماتى- وسكەمەن» تاس جولىندا بولعان.
الاكول اۋدانى جاقتان كەلە جاتقان Mazda-626 اۆتوكولىگى قارسى باعىتتا كەلە جاتقان Faton جۇك كولىگىمەن سوقتىعىسقان.
سالدارىنان جەڭىل كولىكتىڭ رولىندەگى 73 جاستاعى قاريا مەن ونىڭ 17 جاستاعى نەمەرەسى وقيعا ورنىندا كوز جۇمعان.
جابىرلەنۋشى تاراپتىڭ ايتۋى بويىنشا جول-كولىك وقيعاسىن تىركەگەن جەرگىلىكتى پوليتسيا قىزمەتكەرلەرى قايتىس بولعان ازاماتتاردىڭ قارالى حابارىن ارادا تەك 4 ساعات وتكەننەن كەيىن عانا جەتكىزگەن.
ۇلى مەن اكەسىنەن ايىرىلعان سارقاندىق نۇرلىبەك ءالىمباي بۇل جەردە ءبىر شيكىلىك بار دەپ وتىر.
«كۇمانىم بار. ويتكەنى كىسى قايتىس بولعان كەزدە ەكى جاقتىڭ ادامدارىن شاقىرىپ كورۋ كەرەك ەدى. ولار 4 ساعات ۋاقىتتى جوعالتىپ، ابدەن تازالاپ، ءبارىن رەتتەپ بولعاننان كەيىن حابارلاسىپ وتىر. مىنە، 4 اي ۋاقىت بولدى. وسى ارالىقتا قۇقىق قورعاۋ ورگاندارىنان ەشقانداي حابار جوق. ءبارى بەلگىلى نارسە. قايدا بارىپ، كىمنەن سۇرايتىنىمىزدى بىلمەيمىز»، - دەدى نۇرلىبەك ءالىمباي.
ءىستىڭ وسى ۋاقىتقا دەيىن سوزىلعانىن جەتىسۋ وبلىسى پوليتسيا دەپارتامەنتىنىڭ قىزمەتكەرلەرى جول-كولىك وقيعاسى جانە تەحنيكالىق جاعداي ساراپتاماسىنىڭ جۇرگىزىلىپ جاتقاندىعىمەن بايلانىستىرادى. جۇك كولىگىنىڭ جۇرگىزۋشىسىنەن دە جاۋاپ الىنعان. تەرگەۋ ىستەرى ءجۇرىپ جاتقاندىعىن العا تارتىپ، قۇقىق قورعاۋ وكىلدەرى بۇدان وزگە اقپارات بەرۋدەن باس تارتتى.
«18-شىلدەدە «الماتى- وسكەمەن» تاس جولىنىڭ 447-شاقىرىمىندا مازدا اۆتوكولىگى مەن Faton جۇك كولىگىنىڭ سوقتىعىسى بولعان. ەكى ادام قايتىس بولدى. قىلمىستىق ءىس ق ر 345-بابى 4- بولىگى بويىنشا قوزعالدى. قازىر ءتيىستى ساراپتامالار تاعايىندالدى. سونىڭ قورىتىندىسى بويىنشا پروتسەسسۋالدىق شەشىم قابىلدانادى. ءىس پوليتسيا دەپارتامەنتىنىڭ قاتاڭ باقىلاۋىندا. وسى ايدىڭ اياعىنا دەيىن شەشىم قابىلدايمىز»، - دەدى پوليتسيا دەپارتامەنتىنىڭ اعا انىقتاۋشىسى باۋىرجان تايلاقبايەۆ.
نۇرلىبەك ءالىمباي وقيعانىڭ ناقتى قالاي بولعانىنان ارادا 4 اي وتسە دە ءالى دە بەيحابار. جالعىز ۇلى مەن قارت اكەسىن جەر قوينىنا تاپسىرعان ول ەندى جوعارىداعىلاردان ادىلدىك سۇرايدى.
ەسكە سالايىق، بۇعان دەيىن جەتىسۋ وبلىسىندا جول-كولىك وقيعاسى ءبىر جىلدا 3 ەسەگە وسكەنىن جازعانبىز.
اۆتور
ايبەك قۇتتىبەك
