ۆاشينگتون تۇرعىندارى قازاقستاندىق ارتىستەردىڭ شىعارماشىلىعىن جوعارى باعالادى
ۆاشينگتون تۇرعىندارى قازاقستان رەسپۋبليكاسىنىڭ ا ق ش-تاعى ەلشىلىگى مەن روزا باعلانوۆا اتىنداعى «قازاق كونسەرت» مەملەكەتتىك كونسەرت ۇيىمىنىڭ باستاماسىمەن، قازاقستاندىق «Polymetal International» كومپانياسىنىڭ قولداۋىمەن ۇيىمداستىرعان «تۇران» فولكلورلىق-ەتنوگرافيالىق انسامبلىنىڭ كەرەمەت كونسەرتىن تاماشالادى. مادەني شارا بارىسىندا شەتەلدىكتەر قازاقستاننىڭ باي مۇراسىمەن تانىسۋعا مۇمكىندىك الدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
مۋزىكالىق مەرەكەدە قازاقستاننىڭ تانىمال جانە تالانتتى ارتىستەرى ونەر كورسەتتى.
«تۇران» فولكلورلىق-ەتنوگرافيالىق انسامبلى كلاسسيكالىق جانە فولكلورلىق جانردى قامتيتىن «Bridge of Times» («زامان كوپىرى») اتتى جاڭا باعدارلاماسىندا قازاقتىڭ ءداستۇرلى حالىق اسپاپتارىندا اسەم اۋەندەر ورىندادى.
ەۋرازيا جۇرەگىنە مۋزىكالىق ساياحات بارىسىندا «ۇلى تۇران - ماڭگىلىك»، «شابىت»، «اققۋ»، «ورتەكە»(يۋنەسكو-نىڭ دۇنيەجۇزىلىك ماتەريالدىق ەمەس مادەني مۇرا تىزىمىنە ەنگىزىلگەن)، «ايتتىم سالەم، قالامقاس»، «قازاق جەرى»، «قارا جورعا»، «كوروعلى»، «ەر تۇران» (تۇركى الەمىنىڭ ءانۇرانى) شىعارمالارى ورىندالدى.
وپەرا انشىلەرى ايگەرىم التىنبەك (سوپرانو، بەدەلدى جۇلدەلەر يەگەرى، يتالياداعى ارريگو بويتو اتىنداعى مەملەكەتتىك كونسەرۆاتوريانىڭ اسپيرانتى)، راسۋل جارماعامبەتوۆ (باريتون، حالىقارالىق بايقاۋلاردىڭ بەلگىلى لاۋرەاتى، اباي اتىنداعى قازاق ۇلتتىق وپەرا جانە بالەت تەاترىنىڭ سوليسى)، ونەرلى كونسەرتمەيستەر قاتىستى.
اتاپ ايتقاندا دينا ميرمانوۆا (تالانتتى پيانيست، حالىقارالىق بايقاۋلاردىڭ لاۋرەاتى) «Figaro Cavatina» ،«ecco: Respiro Appena. Io Son L'umile Ancella» ،«THE DUO HANNA AND DANILO» ،«Bridge of Times»، «قىپشاقتار ءانۇرانى» جانە تاعى باسقا شىعارمالاردى كوپشىلىك نازارىنا ۇسىندى.
قازاقستان رەسپۋبليكاسىنىڭ ا ق ش-تاعى ەلشىسى ەرجان اشىقبايەۆ شارا قوناقتارىن، ديپلوماتيالىق كورپۋس جانە قازاق دياسپوراسىن قۇتتىقتاپ، بۇل كەش - قازاقستان مەن ا ق ش-تىڭ، ونىڭ ىشىندە مادەني الماسۋ سالاسىنداعى تابىستى جانە ناتيجەلى ىنتىماقتاستىعىن ايعاقتايتىنىن اتاپ ءوتتى.
كونسەرتتە كوپشىلىك نازارىنا قازاقتىڭ قوناقجايلىلىعى مەن دوستىعىن پاش ەتەتىن كلاسسيكالىق جانە حالىقتىق مۋزىكانىڭ الۋان ءتۇرلى باعدارلاماسى ۇسىنىلدى. وتاندىق سوليستەر جەرگىلىكتى ۆاشينگتون تۇرعىندارىنىڭ قازاقستان ونەرى مەن ۇلتتىق مادەنيەتىنە ۇلكەن قىزىعۋشىلىعىن اتاپ ءوتتى.
قازاق دياسپوراسىنىڭ وكىلى دانا دومەنوۆانىڭ بايانداۋىنشا، ول قازاقستاندا تۋعان، ءبىراق كوپتەن بەرى ا ق ش-تا تۇرىپ جاتىر. وتانىمەن بايلانىستى ساقتاپ قالۋعا مۇمكىندىك بەرەتىن بۇل شارا ول ءۇشىن وتە ماڭىزدى. دانانىڭ ايتۋىنشا، قازاقستان تۋرالى ماقالالار وقىپ نەمەسە دەرەكتى فيلمدەر دە كورۋگە بولادى، ءبىراق بۇل مۇلدەم باسقا، قازاقتىڭ شىنايى مادەني مۇراسىن تانىتاتىن كونسەرتكە جەكە قاتىسۋى وزگەشە اسەر سىيلايدى.
امەريكانىڭ جەرگىلىكتى تۇرعىنى سكوتت پاتنود بۇعان دەيىن قازاقستانعا كەلۋگە مۇمكىندىك العانىن ايتادى. سكوتت ۆاشينگتوندا تۇراتىن قازاقتار مەن قازاقستاندا تۇرىپ، جۇمىس ىستەگەن امەريكالىقتاردىڭ اراسىندا دوستارى كوپ ەكەنىن اتاپ ءوتتى.
«مەن قازاقستاندى جاقسى كورەمىن - بۇل كەرەمەت ەل. ونىڭ ءداستۇرلى جانە كلاسسيكالىق مۋزىكاسى جۇرەكتەردى جىلىتادى»، - دەپ مويىندادى سكوتت.
لورەن ستروبل مەن بريدجيد و'دوننەلل - «Future Leaders Exchange» جوعارى سىنىپ وقۋشىلارىنا ارنالعان امەريكاندىق ءبىلىم الماسۋ باعدارلاماسى بويىنشا قازاقستاندا (الماتى ق. ) ءبىر وقۋ جىلىندا (2022-2023) ءبىلىم العان مەكتەپ وقۋشىلارى. لورەننىڭ ايتۋىنشا، بۇل باعدارلاما ەكى ەل اراسىنداعى بايلانىستى نىعايتۋعا كومەكتەسەدى. ونىڭ الماتىدا دوستارى كوپ، جاقىن ارادا ەلىمىزگە ءبىر ايعا كەلۋدى جوسپارلاپ وتىر.
«قازاقستان - وتە قوناقجاي ەل، مۇندا ۇلتتىق تاعامدار - ەت، باۋىرساق، پالاۋ ۇنادى»، - دەگەن لورەن تاماشا كونسەرت، ادەمى ۇلتتىق كيىمدەردى، سونداي-اق قازاقتىڭ مۋزىكالىق اسپاپتارى - دومبىرا مەن قوبىزدىڭ تاماشا ءۇنىن اتاپ ءوتتى. لورەن قازاقستاندا جۇرگەندە دومبىرا تارتۋدى ۇيرەنگەن.
بريدجيد تە ءبىلىم الۋ ءۇشىن قازاقستاندى تاڭدادى، سەبەبى ول ءبىزدىڭ ەلىمىزدى الەمدەگى ەڭ قىزىقتى ەلدەردىڭ ءبىرى دەپ سانايدى. مەملەكەتىمىزدىڭ بىرەگەيلىگى قازاقتىڭ ادەمى مادەنيەتىن تۋدىرعان تۇركى جانە يسلام الەمىنىڭ، موڭعول جانە كەڭەس ءداۋىرىنىڭ ىقپالىمەن بايلانىستى. بريدجيد ءوزىنىڭ ۇلكەن تاجىريبە جيناقتاعانىن جانە باسقالارعا ءبىزدىڭ ەلگە، سونىڭ ىشىندە وقۋشىلارمەن الماسۋ باعدارلاماسى ارقىلى كەلۋگە كەڭەس بەرەتىنىن ايتتى. بريدجيت ورىس جانە قازاق تىلدەرىن وقۋدى جالعاستىرۋ جوسپارىمەن ءبولىسىپ، بولاشاقتا حالىقارالىق بيزنەستە جۇمىس ىستەگىسى، ونىڭ ىشىندە ەلىمىزبەن جانە جالپى ايماقپەن ەكونوميكالىق قارىم-قاتىناستى دامىتقىسى كەلەتىنىن جەتكىزدى.
قازاقستاندىق ارتىستەر ا ق ش-قا ساپارى اياسىندا اريزونا شتاتىنىڭ فەنيكس قالاسىندا قازاقستان مەن اريزونا ۇلتتىق گۆاردياسى اراسىنداعى ىنتىماقتاستىققا 30 جىل تولۋىنىڭ قۇرمەتىنە «شتاتتار سەرىكتەستىگى باعدارلاماسى» (State Partnership Program, SPP) اياسىندا كونسەرت وتكىزدى.
