ادامزاتتىڭ ماسقاراسىسىڭدار: سوت جاڭبىرشيننىڭ ل گ ب ت وكىلدەرى جايلى پىكىرىن قورلاۋ دەپ تانىمادى
استانا. KAZINFORM - استانا سوتى ءماجىلىس دەپۋتاتى ەدىل جاڭبىرشينگە قارسى ازاماتتىق تالاپ ارىزدى قاراپ، ونى قاناعاتتاندىرۋدان باس تارتتى. سوتقا شاعىم تۇسىرگەن قازاقستان ازاماتى ۆيتالي شەۆچەنكو دەپۋتاتتىڭ الەۋمەتتىك جەلىدەگى پىكىرىن «ار-نامىس پەن قادىر-قاسيەتتى قورلايدى» دەپ تانۋدى تالاپ ەتكەن بولاتىن، دەپ حابارلايدى Qaz365.kz.
داۋ بىلتىر Facebook الەۋمەتتىك جەلىسىندە باستالعان. دەپۋتاتتىڭ ل گ ب ت ناسيحاتىنا تىيىم سالۋ تۋرالى جازباسىنىڭ استىندا شەۆچەنكو ل گ ب ت قاۋىمداستىعىن قولداپ، پارلامەنتاريدىڭ ۇستانىمىن سىناعان. بۇعان جاۋاپ رەتىندە ەدىل جاڭبىرشين ءوز پىكىرىن ايتقان.
«ۇيىڭدە نە ىستەسەڭ دە ءوزىڭ ءبىل، ءبىراق ل گ ب ت-نى ناسيحاتتاما. تىنىش ءومىر ءسۇر، بۇل تۋرالى «باقىرىپ-شاقىرۋدىڭ» قاجەتى جوق! سەندەر ادامزاتتىڭ ماسقاراسىسىڭدار»، - دەپ پىكىر قالدىرعان دەپۋتات.
شەۆچەنكو بۇل سوزدەر ءۇشىن دەپۋتاتتان كوپشىلىك الدىندا كەشىرىم سۇراۋدى جانە پىكىردى ءوشىرۋدى تالاپ ەتتى.
ساراپتاما قورىتىندىسى بويىنشا، دەپۋتاتتىڭ جازباسىندا شەۆچەنكونىڭ ار-نامىسىنا تيەتىن نەمەسە ىسكەرلىك بەدەلىن تۇسىرەتىن مالىمەتتەر انىقتالماعان. ساراپشىلار بۇل سوزدەردى «باعالاۋ سيپاتىنداعى پىكىر» جانە «جەكە كوزقاراس» رەتىندە تانىدى. سۋديا ءوز شەشىمىندە ار-نامىستى قورعاۋ ءۇشىن اقپاراتتىڭ شىندىققا جاناسپايتىندىعى جانە تاراتىلعاندىعى سياقتى شارتتاردىڭ تولىق جيىنتىعى قاجەت ەكەنىن، ال بۇل جاعدايدا ول تالاپتاردىڭ ورىندالماعانىن ءتۇسىندىردى.
سوت شەشىمىمەن تالاپ ارىز قاناعاتتاندىرۋسىز قالدىرىلدى.
سونىمەن قاتار سوت تالاپ قويۋشى ۆيتالي شەۆچەنكودان ساراپتاما جۇرگىزۋگە كەتكەن 131430 تەڭگە كولەمىندەگى شىعىندى ءوندىرىپ الۋدى ۇيعاردى. دەپۋتات ەدىل جاڭبىرشين ونلاين فورماتتا وتكەن سوت وتىرىسىنا قاتىسقان جوق. شەشىم زاڭدى كۇشىنە ەنگەن جوق جانە وعان شاعىنۋعا بولادى.
