ادام قاي جاستان باستاپ قارت كىسى بولىپ سانالادى؟

استانا. قازاقپارات - ادامنىڭ جاسى - جاي عانا سان ەمەس، ول سونداي-اق ادامنىڭ ءوزى مەن قوعامنىڭ قابىلداۋىنا بايلانىستى جاعداي، - دەپ حابارلايدى Tengri Life.

حالىقارالىق ستاندارتتار

د د س ۇ مالىمەتتەرى بويىنشا، ادام 60 جاستان باستاپ قارت كىسى بولىپ سانالادى. بۇل جاستا ادامدا قارتايۋدىڭ العاشقى بەلگىلەرى پايدا بولادى جانە كوپشىلىك ادام زەينەتكە شىعادى. الايدا ادامدار ۇزاق جانە بەلسەندى ءومىر سۇرەتىن جاپونيا نەمەسە سكانديناۆيالىق ەلدەردە ەگدە جاس 65 جانە ودان جوعارى جاسقا ىسىرىلادى.

د د س ۇ مىنا جاس كاتەگوريالارىن ۇسىنادى:

ەگدە جاس: 60-74 جاس؛
كارىلىك: 75-89 جاس؛
ۇزاق ءومىر سۇرەتىندەر: 90 جانە ودان جوعارى.
مەديتسينالىق كورسەتكىش

مەديتسينا كوزىمەن ەگدە جاس اعزاداعى وزگەرىستەرمەن سيپاتتالادى: زات الماسۋدىڭ تومەندەۋى، سوزىلمالى اۋرۋلاردىڭ باستالۋى، بۇلشىق ەت ماسساسىنىڭ وزگەرۋى جانە جالپى حال-جاعدايدىڭ ناشارلاۋى. سوندىقتان مۇنداي وزگەرىستەر ايقىن بولا تۇسەتىن جانە ولار كۇندەلىكتى بەلسەندىلىككە اسەر ەتە باستايتىن كەزەڭدى ەگدە جاس دەپ سانايدى.

الايدا زاماناۋي زەرتتەۋلەر سالاۋاتتى ءومىر سالتى، جۇيەلى فيزيكالىق جاتتىعۋلار جانە مەديتسينالىق تەكسەرىستەر قارتايۋ پروتسەسىنىڭ مەرزىمىن ۇزارتا الاتىنىن دالەلدەپ كەلەدى.

پسيحولوگيالىق اسپەكت

جاس - تەك فيزيكالىق وزگەرىس ەمەس، سونداي-اق ءوزىن-ءوزى قابىلداۋ. كوپتەگەن ادام 60 جاستان كەيىن دە وزدەرىن جاس جانە بەلسەندى سەزىنەدى.

كەي زەرتتەۋلەر بويىنشا، ادام ءوزىن قانداي دا ءبىر ناقتى جاسقا كەلگەندە ەمەس، كۇندەلىكتى ومىردە شەكتەۋلەرگە تاپ بولعاندا ءوزىن قارت سەزىنەدى. كوپشىلىك ءۇشىن ەگدە جاسقا ءوتۋ تۋعان كۇنىنە ەمەس، ومىرلىك تاجىريبەسى مەن مۇمكىندىكتەرىنە بايلانىستى.

ەسكە سالايىق، قازاقستاندا ەر ادامدار ءۇشىن زەينەتكە شىعۋ جاسى - 63 جاستا، ايەلدەر ءۇشىن - 61 جاس. بۇعان دەيىن الماتىدا زەينەتكەرلەرگە قانداي كومەك كورسەتىلەتىنىن ۇسىنعان بولاتىنبىز.