ادامنىڭ اينالاسىن شامادان تىس تازالاي بەرۋى اۋرۋعا جاتا ما؟
ءبارىن ورىن-ورنىنا جيناپ، شاڭ ءسۇرتىپ، ءۇي جيناۋ - ادامدار ءۇشىن قالىپتى نارسە. كەيدە ءۇيدى جيناعىسى كەلمەۋ دە قالىپتى. الايدا كەي ادامداردىڭ تازالىق ساقتاۋى زاتتاردى زالالسىزداندىرۋعا اينالادى. شامادان تىس تازالىق ساقتاۋدىڭ استارىندا قانداي پروبلەما جاتىر جانە ودان قالاي ارىلۋعا بولادى؟ Massaget.kz ءتىلشىسى ق ر د س م رەسپۋبليكالىق پسيحيكالىق دەنساۋلىق عىلىمي-پراكتيكالىق ورتالىعىنىڭ پسيحوسوماتيكالىق بولىمشە مەڭگەرۋشىسى، پسيحياتر ايگۇل اعابەك قىزىمەن سويلەستى.
شامادان تىس تازالىق ساقتايتىن ادامدار قانداي بولادى؟
ادام ءوزىنىڭ اينالاسىن ۇنەمى ءمىنسىز تازالىقتا ۇستاعىسى كەلۋىن وبسەسسيۆتى-كومپۋلسيۆتى بۇزىلىس دەپ اتايدى. كوپشىلىك ادام ءۇشىن ءمىنسىز تازالىق ساقتاۋ ءومىر سالتىنا اينالادى. كەيدە ادامنىڭ تازالىقتى شامادان تىس ساقتاۋى ونىڭ كۇندەلىكتى ومىرىنە كەدەرگى كەلتىرۋى، ەركىندىگىن شەكتەۋى جانە اينالاسىنداعىلارمەن قارىم-قاتىناسىن بۇزۋى مۇمكىن.
كەي ادامدار ءبىر كيىمدى بىرنەشە رەت قايتارا جۋادى، ءۇيدى وتە ۇزاق ۋاقىت بويى جينايدى، قولىن قايتا-قايتا جانە ۇزاق جۋادى جانە ت. ب.
تازالىق ساقتاۋدىڭ جاعىمدى تۇستارى كوپ: گيگيەنا جانە تازالىق ساقتاۋ دەنساۋلىقتى ساقتاۋعا ىقپال ەتەدى. الايدا ۇنەمى اينالاسىن ءمىنسىز تازا ۇستاۋعا تىرىسقاننان ادامنىڭ پسيحيكالىق ساۋلىعى زارداپ شەگۋى مۇمكىن. ولار ءمىنسىز تازالىققا جەتە الماسا، كۇيگەلەكتەنەدى جانە مازاسىزدانادى. ال ول شارشاتادى، دەپرەسسياعا، كەيدە باسقالاردان وقشاۋلانۋعا اكەلەدى. جاقىندارى ول قالاعانداي تازالىق ساقتاماسا، ولارمەن دە قارىم-قاتىناسى بۇزىلۋى مۇمكىن.
ۇنەمى مازاسىزدانىپ جۇرگەندىكتەن، ول فيزيكالىق جاعدايعا دا ءوز اسەرىن بەرەدى. مىسالى، ۇيقى بۇزىلۋى نەمەسە ەنەرگيا ازايۋى مۇمكىن.
كەي ادامدار قوعامدىق ورىندارعا بارۋعا، ساپارلاردان جانە ادام كوپ جينالاتىن شارالاردان باس تارتا باستايدى.
بۇل بۇزىلىسپەن قينالاتىن ادامداردا ىشكى جانجال تۋىنداۋى مۇمكىن: ءبىر جاعىنان، تازالىق ساقتاۋعا تىرىسسا، ەكىنشى جاعىنان، تازالىق ساقتاۋدا ارتىق كەتەتىنىن تۇسىنەدى. بۇل ىشكى جانجال ونىڭ ەموتسيونالدى جاعدايىن ودان ءارى ناشارلاتىپ جىبەرۋى مۇمكىن.
تازالىق ساقتاۋ قاي كەزدە قالىپتى، ال قاي كەزدە پاتولوگيا؟
ادامدارعا تازالىقتا جانە تارتىپتە ءومىر ءسۇرۋ ءتان. ءبىز سونىسىمەن جانۋارلاردان ەرەكشەلەنەمىز. ەگەر ادامنىڭ تازالىق ساقتاۋ داعدىلارى جاعىمسىزدىققا اكەلمەسە، ودان ونىڭ ءومىرىنىڭ ساپاسى ناشارلاماسا، وندا بۇل قالىپتى. الايدا جالپى قالىپتى دەگەننىڭ ءوزى - شارتتى تەرمين. تازالىق ساقتاۋعا كەلگەندە دە ءار ادام ءۇشىن وزىنە ءتان قالىپتى جاعدايى بار.
تازالىقتى شامادان تىس ساقتاۋ قانداي كەزدە پاتولوگيا بولۋى مۇمكىن؟ ادامنىڭ كۇندەلىكتى الەۋمەتتىك ءومىرىنىڭ ساپاسى ناشارلاسا، تازالىق ساقتاۋعا وتە كوپ ۋاقىت كەتسە، سونىڭ سالدارىنان جۇمىسقا نەمەسە ساباققا ءجيى كەشىگەتىن بولسا، اينالاسىنداعى تازالىققا اسا ءمان بەرەتىندىكتەن، اياق استى جوسپارىن وزگەرتۋگە ءماجبۇر بولسا، بۇل پاتولوگيا بولۋى مۇمكىن.
بۇل ادەتتەن ادامنىڭ ءومىر ساپاسى ناشارلاسا جانە ول كۇندەلىكتى ومىرىنە كەدەرگى كەلتىرە باستاسا، سونىڭ سالدارىنان اينالاسىنداعى ادامدارمەن قارىم-قاتىناسى بۇزىلسا، ول ماماندار كومەگىنە جۇگىنۋ كەرەك. مامان بۇزىلىستىڭ دەڭگەيىن جانە ونىڭ قانشالىقتى تەرەڭ ەكەنىن انىقتاپ، سوعان ساي تەراپيا ءادىسىن تاعايىندايدى.
ونىڭ قانداي پسيحولوگيالىق سەبەپتەرى بولۋى مۇمكىن؟
وتباسىداعى قانداي دا ءبىر قيىن جاعداي. ادەتتە ول بالالىق شاقتا پايدا بولادى. بالانىڭ پسيحيكاسىنا جاعىمسىز اسەر ەتەتىن جاعدايلار بار: مىسالى، جاقىن ادامىنان ايىرىلۋ، قاتتى كۇيزەلىس جانە ت. ب. باستاپقىدا ادامنىڭ بولماشى نارسەدەن تازارعىسى كەلۋى ۋاقىت وتە كۇشەيىپ كەتۋى مۇمكىن.
وتباسىندا تاۋەلدىلىگى بار ەرەسەكتىڭ بولۋى. كەيدە وتباسىندا قانداي دا ءبىر تاۋەلدىلىكپەن قينالاتىن ەرەسەكتەر بولسا، بالالار دا تاۋەلدى بولىپ ءوسۋى مۇمكىن. ادامنىڭ اينالاسىندا ۇنەمى ءمىنسىز تازالىق ساقتاعىسى كەلۋى دە تاۋەلدىلىككە جاتادى.
تۇرمىسى ناشار وتباسىندا ءوسۋ. كەيدە تۇراقسىز ورتادا وسكەن ادامدار ەسەيگەندە شامادان تىس تازالىق ساقتاۋعا بەيىم بولۋى مۇمكىن. مىسالى، اتا-اناسىنىڭ ءبىرى ۇنەمى ۇيدە بولمايتىن، ىشىمدىككە سالىنعان نەمەسە قاتتى ماتەريالدىق پروبلەما بولعان، ءۇي ۇنەمى شاشىلىپ جاتاتىن بولعان بولسا، بالا وزىنە تازا ورىن ءبولىپ الۋ ارقىلى تۇراقتىلىق سەزىمىن جاساعىسى كەلگەن بولۋى مۇمكىن.
«جاقسى بالا (ادام)» بولعىسى كەلۋ. اتا-انا بالاعا كوپ تالاپ قويسا، بالادان كوپ نارسە كۇتسە، ونىڭ بۇل ادەتى ونىڭ «جاقسى بالا» بولعىسى كەلگەنىنەن پايدا بولعان بولۋى مۇمكىن.
اينالاسىنداعى ادامدار تاراپىنان اگرەسسيا(قىسىم) كورۋ. مىسالى، ەگەر بالا قۇرداستارىنان اگرەسسيا كورسە، ول اينالاسىن تازالاي بەرگىسى كەلۋى مۇمكىن. ادام نەگاتيۆتەن دە شاڭ مەن لاستىقتان سەكىلدى ارىلا الامىن دەپ ويلايدى.
پەرفەكسيونيزم. پەرفەكسيونيستەر كەز كەلگەن ءىستى تياناقتى جانە ءمىنسىز ەتىپ جاساعىسى كەلەدى. سوندىقتان پەرفەكسيونيستەردىڭ تازالىقتى شامادان تىس ساقتايتىن ادامعا اينالۋى وڭاي.
بۇل تەك كەيبىر مىسالدار عانا، پروبلەمانىڭ سەبەبىن تەك ءار ناۋقاسپەن جەكە جۇمىس جاساۋ ارقىلى جانە تەكسەرىستەردەن وتكىزۋ ارقىلى انىقتاۋعا بولادى.
