ادامداردان الاياقتىق جولمەن 230 ميلليون العان قىلمىسكەر قىرعىز رەسپۋبليكاسىنان ەكستراديتسيالاندى
استانا. KAZINFORM - قازاقستان باس پروكۋراتۋراسى قازاقستان ازاماتشاسىن اسا ءىرى كولەمدە الاياقتىق جاساعانى ءۇشىن قىلمىستىق جاۋاپتىلىققا تارتۋ ماقساتىندا قىرعىز رەسپۋبليكاسىنان ەكستراديتسيالادى.
باس پروكۋراتۋرااتالعان تۇلعا 2023 -جىلدىڭ ماۋسىمىندا ادامدار توبىنىڭ الدىن الا ءسوز بايلاسۋى بويىنشا الماتى قالاسىنداعى بانكتەردىڭ بىرىنە كليەنتتەردىڭ اتىنان ولاردىڭ بانكتىك شوتتارىنا تىركەلگەن ابونەنتتىك نومىرلەرىن وزگەرتۋ تۋرالى حابارلامالار جىبەرىپ، وسىلايشا بانك شوتتارىنا قول جەتكىزگەن.
وسىدان كەيىن كۇدىكتى قاشىقتان قول جەتكىزۋ ارقىلى 5 جابىرلەنۋشىنىڭ شوتىنان «دروپپەرلەردىڭ» بانكتىك شوتتارىنا اقشا اۋدارىپ، ولاردىڭ قاراجاتىن يەمدەنگەن.
ونىڭ قىلمىستىق ارەكەتتەرىنىڭ سالدارىنان جابىرلەنۋشىلەرگە 230 ميلليون تەڭگەدەن استام شىعىن كەلتىرىلگەن. وسى جىلدىڭ قاڭتارىندا ول بىشكەك اۋەجايىندا ۇستالىپ، قازاقستان رەسپۋبليكاسى باس پروكۋراتۋراسىنىڭ سۇراۋى بويىنشا وتانىنا ەكستراديتسيالاندى. قازىر كۇدىكتى ۋاقىتشا ۇستاۋ يزولياتورىنا قامالدى. ايىپتالعان قىلمىستى جاساعانى ءۇشىن مۇلكى تاركىلەنىپ، بەس جىلدان ون جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلعان.
