ادام جۇرەگى عارىشتا جىلدام قارتايادى

استانا. KAZINFORM – ا ق ش- تا ءبىر توپ عالىمدار جۇرگىزگەن زەرتتەۋ ادامنىڭ جۇرەگى عارىشتا بار بولعانى ءبىر ايدان كەيىن قارتايۋ بەلگىلەرىن كورسەتە باستاعانىن مالىمدەدى، دەپ جازادى انادولى.

ەكسپەريمەنت جۇرگىزۋ ءۇشىن امەريكاندىق عالىمدار شىنايى جۇرەكتىڭ جيىرىلۋىنا ۇقساس جاساندى جۇرەك ءتىنىن جاساپ، ونى ارنايى «جۇرەك-چيپ» جۇيەسىنە ورنالاستىردى. بۇل جۇيە نولدىك گراۆيتاتسيا جاعدايىنداعى وزگەرىستەردى باقىلاۋ ءۇشىن حالىقارالىق عارىش ستانسياسىنا (ح ع س) 30 كۇنگە جىبەرىلدى.

زەرتتەۋشىلەر ناقتى ۋاقىت رەجيمىندە باقىلاۋ ءۇشىن سەنسورلاردان پايدالاندى. سالىستىرۋ ءۇشىن، جەردە دە ءدال سونداي زەرتتەۋلەر جۇرگىزىلگەن. ونىڭ بارىسىندا عالىمدار ح ع س- تا 12 كۇننەن كەيىن جۇرەك ءتىنىنىڭ جيىرىلۋ كۇشى ەكى ەسەگە دەرلىك تومەندەگەنىن، ال جەردە ۇقساس تىندەردىڭ تۇراقتى بولعانىن انىقتادى. بۇلشىقەت السىزدىگى جەرگە ورالعاننان كەيىن 9 كۇن بويى ساقتالدى.

وسىلايشا، عارىشتا بار بولعانى ءبىر اي ىشىندە ادامداردىڭ جۇرەك تىندەرى السىرەپ، جۇرەك سوعۋ ىرعاعى بۇزىلىپ، قارتايۋ بەلگىلەرىنە ۇقسايتىن مولەكۋليارلىق جانە گەنەتيكالىق وزگەرىستەر پايدا بولاتىنى انىقتالدى.

زەرتتەۋ «The Proceedings of the National Academy of Sciences» جۋرنالىندا جاريالانعان.