ادام بويىنداعى شاراسىزدىق بەلگىلى ءبىر تاۋەلدىلىككە اكەلەدى - پسيحولوگ

پەتروپاۆل. KAZINFORM - تاۋەلدىلىك - بۇگىندە قوعامدى جايلاعان دەرتكە اينالىپ، ونىڭ ءتۇرى جىلدان-جىلعا كوبەيىپ كەلەدى. زياندى ادەت قۇردىمعا قۇلاتىپ، سۋيتسيد، اجىراسۋ، ۇرلىق-قارلىق، زورلىق-زومبىلىق، قارىزعا باتۋ سياقتى حالگە جەتكىزۋدە. سولتۇستىك قازاقستان وبلىسىندا ءتۇرلى تاۋەلدى ادامدارمەن كاسىبي تۇردە جۇمىس ىستەيتىن مامان، 17 جىلدىق تاجىريبەسى بار پسيحولوگ ولەگ ماتۆەيەۆ Kazinform اگەنتتىگىنىڭ تىلشىسىنە بەرگەن سۇحباتىندا جالپى تاۋەلدىلىك جانە ونىڭ پايدا بولۋ سەبەبى جايىندا پىكىرىمەن ءبولىستى.

- ولەگ ۆيكتوروۆيچ، تاۋەلدىلىكتى اۋرۋ دەيمىز. ال، ءبىر نارسەگە تاۋەلدى ادامنىڭ قاي جەرى اۋىرادى؟

- ەڭ الدىمەن مۇنداي ادامنىڭ جانىنا تىنىشتىق جوق، ياعني جان-دۇنيەسى اۋىرادى. پسيحولوگيادا «ەكزيستەنتسيالدى ۆاكۋۋم» دەگەن تۇسىنىك بار. بۇل دەگەنىمىز ادامنىڭ رۋحى ءتۇسۋى، ۇمىتسىزدىك، شاراسىزدىقتىڭ پايدا بولۋى. شەشىلمەگەن ماسەلەلەر قوردالانا كەلە وسىنداي جاعىمسىز سەزىم پايدا بولادى. كەي جاعدايدا بۇدان قۇتىلۋ ءۇشىن ءبىر ادامعا باسقا جانمەن اڭگىمەلەسكەن جەتكىلىكتى. كەيبىرەۋ ءۇشىن سەرۋەندەگەن پايدالى بولسا، ەندى ءبىرى جاقسى فيلم قاراۋ ارقىلى بۇل نەگاتيۆتى سەزىمنەن قۇتىلادى. بىرەۋ جانىن جەگەن ماسەلەدەن بوسانۋ ءۇشىن بىرەر شولمەك سىرا ىشسە، ەندى ءبىرى ەسىرتكىنى تۇتىنۋ ارقىلى جانىنا تىنىشتىق تاپپاق بولادى. بۇعان شوپوگوليزم دە جاتادى. ءبىراق مۇنىڭ ءبارى بەكەر، ادام جانى تىنىشتالۋى ءۇشىن ماحاببات كەرەك، الايدا قازىرگى ادامدار بۇل سەزىم جايىندا ۇمىتقان.

بۇگىندە قوعامدا ءبىرىنشى ورىنعا دۇنيە-مۇلىك شىققان. ادامدار ادەمى زاتتارعا قۇمار، باسقالاردىڭ ول تۋرالى نە ويلايتىنى ماڭىزدى، ساياحاتتاۋدى، قىمبات كولىك ءمىنۋدى سانگە اينالدىردى. كوپشىلىكپەن قاتىناسۋ، دوستاردىڭ كوپتىگى، ۇنەمى پوزيتيۆتە بولۋ - بۇل ماسەلەدەن قاشۋدىڭ ءبىر جولى. ادامداردىڭ اراسىندا پسيحولوگياعا بەت بۇرعاندار دا كوبەيگەن، مۇنىڭ سەبەبى - ولار وسىلايشا جانىنا تىنىشتىق تابۋدىڭ جولىن ىزدەۋدە. ءبىراق مۇنىڭ ءبارى ادام جانىن تىنىشتاندىرمايدى، تولىق قاناعاتتاندىرمايدى.

ادام بويىنداعى بارلىق ماسەلە بالالىق شاقتا پايدا بولادى. ءوزىن-ءوزى كەم سەزىنۋ، ستەرەوتيپ، كىنالاۋ، رەنىش - ەرتە جاستا قالىپتاسادى. ادام بۇدان قۇتىلماسا، ۋاقىت وتە كەلە ۇلكەن پسيحولوگيالىق ماسەلە تۋدىرىپ، ادامنىڭ جانىن جەگىدەي جەيدى. سالدارىنان سپيرتتىك ىشىمدىكتەرگە، ەسىرتكىگە جانە باسقا دا قۇمارلىق پايدا بولادى. قوعام ونى بۇل تاۋەلدىلىكتەن قۇتقارعىسى كەلگەنىمەن، مۇنىڭ ءبارى ۋاقىتشا. ول قايتادان اينالىپ كەلەدى، ويتكەنى ماسەلە شەشىلگەن جوق. مەنىڭ پسيحولوگ رەتىندە مىندەتىم، مۇنداي ادامدارمەن جۇمىس ىستەي وتىرىپ، ادام جانىنىڭ تىنىشتىق تابۋىنا كومەكتەسۋ.

- پايدالى تاۋەلدىلىك بولا ما؟

- تاۋەلدىلىكتىڭ ءتۇرى كوپ. يا، پايدالىسى دا بار. ماسەلەن سپورتتى الايىق. بەلگىلى ءبىر جەتىستىككە جەتكەن سپورتشىلاردا تاۋەلدىلىك بار، ولار ءومىرىن سپورتسىز ەلەستەتە المايدى. ال تاۋەلدىلىك بولماسا چەمپيون بولا الماس ەدى.

بىلىمگە قۇمارلىقتى ايتۋعا بولادى، يا، ونداي ادامدار دا بار. ولار ۇنەمى ىزدەنىستە جۇرەدى، كوپ وقيدى. بۇل دا جامان ەمەس. سوندىقتان تاۋەلدىلىكتى جامان قاسيەت دەپ باعالاۋ دۇرىس ەمەس.

- قازىرگى ۋاقىتتا ەڭ كوپ تاراعان تاۋەلدىلىك تۇرلەرى قانداي؟

- ءبىرىنشى ورىندا لۋدومانيا تۇر. نەگە؟ ويتكەنى ويىنقۇمارلار ءوز تاۋەلدىلىگىن ۇزاق ۋاقىت بويى جاسىرا الادى. لۋدوماننىڭ باسقالاردان ايىرماشىلىعى، سىرت بەلگىلەرى جوق، سوندىقتان اتا-انا بالاسىنىڭ، ايەلى كۇيەۋىنىڭ تاۋەلدى ەكەنىن بىرنەشە جىلدان كەيىن عانا ءبىلۋى مۇمكىن.

ەكىنشى وتكىر ماسەلە - وتباسىنداعى تاۋەلدى قارىم-قاتىناس، زورلىق-زومبىلىق. كۇرەسۋ ءۇشىن زاڭ قاتاڭداتىلدى. ءبىراق، مەنىڭشە، بۇل ماسەلەنى شەشپەيدى. زارداپ شەگۋشى، ادەتتە، ايەل، ەر ادام - اگرەسسور. ەر ادامدى جازالايدى، ال ايەل شە؟ ونىڭ مىنەز-قۇلقىندا پروبلەما بار، ويتكەنى ول سونداي جاعدايعا جەتكىزدى، وزىنە قول كوتەرۋگە جول بەردى. ەندەشە زارداپ شەگۋشىمەن پسيحولوگ جۇمىس ىستەمەسە، بۇل جاعداي تاعى دا قايتالانادى. ەكىنشى ەر اداممەن قاتىناسى دا ءدال العاشقىسىنداي، ءتىپتى ودان دا جامان قالىپتاسۋى مۇمكىن. ياعني بۇل ايەلدە قۇربان بولۋ قاجەتتىلىگى بار. سوندىقتان زورلىق-زومبىلىق قۇرباندارىمەن ماماندار جۇمىس ىستەپ، پسيحولوگيالىق ماسەلەنى شەشۋگە كومەكتەسكەنى ءجون.

ءۇشىنشىسى - ۆەيپ، ەلەكتروندى تەمەكىلەرگە قۇمارلىق، اسىرەسە جاستار اراسىندا بەلەڭ العان.

ال ماسكۇنەمدىككە كەلەر بولساق، حالىقتىڭ %80 ماسكۇنەمدىكتىڭ ءبىرىنشى ساتىسى بار. اۋىر ەسىرتكىگە تاۋەلدىلىك بۇگىندە تومەندەگەن، ونىڭ ورنىن ءتۇرلى سينتەتيكا باسقان.

- پرەزيدەنت لۋدومانياعا قاتىستى زاڭعا قول قويدى. بۇل ماسەلەنى شەشۋگە كومەكتەسە مە؟

- كوشەلەردە ءالى دە ويناۋعا شاقىرعان باننەرلەر ءىلىنىپ تۇر. فيلمدەردە دە بۋكمەكەرلىك كەڭسەلەردىڭ جارناماسى تولىپ ءجۇر. ينتەرنەتتە دە كوپ. ءبىر جاعىنان تىيىم سالىپ، ەكىنشى جاعىنان ونى جارنامالاسا - قانداي ناتيجە كۇتۋگە بولادى. سوندىقتان بۇل تۋرالى ايتۋ ەرتە. زاڭمەن ماسەلەنى تۇپكىلىكتى شەشۋ مۇمكىن ەمەس، ناتيجە بەرسە قازىر مىسالى، قىلمىس بولماس ەدى. تۇرمەدەن شىققان ادامداردىڭ قايتا قىلمىس جاساپ، تۇرمەگە تۇسەتىنىن بىلەمىز. ادامنىڭ نەگە مۇنداي ارەكەتكە باراتىن سەبەبىن ءبىلۋ قاجەت. يا، زاڭمەن شەكتەۋ كەرەك. ايىپپۇل سالىپ، جازالاۋ قاجەت. ءبىراق بۇل ءبىرىنشى ورىنعا شىعارىلماۋى ءتيىس.

- قازىر ءبارىمىز ينتەرنەتكە تاۋەلدىمىز، ءسىز مۇنىمەن كەلىسەسىز عوي؟

- ءيا، قازىر بارلىق اقپاراتتى ينتەرنەت ارقىلى الامىز، ساۋدا- ساتتىق تا، جۇمىسىمىز دا وسى ينتەرنەتپەن بايلانىستى. سوندىقتان ينتەرنەتكە نە ءۇشىن كىرگەنىڭدى جانە قانشا ۋاقىت وتىرعانىڭدى قاداعالاۋىڭ كەرەك. ەگەر ينتەرنەت سەنىڭ ومىرىڭە كەلەرگى كەلتىرمەسە، جۇمىسىڭنان قالدىرماسا - وندا دابىل قاعۋدىڭ قاجەتى جوق. سول سياقتى مەكتەپ وقۋشىسى ءۇشىن دە بۇگىندە ينتەرنەتتىڭ الار ورنى زور. ءبىراق اتا-انا قاداعالاپ، ونىڭ كۇنى بويى تەلەفونمەن وتىرۋىنا جول بەرمەۋى كەرەك.

- ادامنىڭ ينتەرنەتكە تاۋەلدى بولعانىن قايدان بىلۋگە بولادى؟

- اينالامەن بايلانىستى ءۇزىپ، بار ۋاقىتى كومپيۋتەردە نەمەسە تەلەفوندا وتەدى. ناقتى ومىردە دوستارى جوق، ەشكىممەن ارالاسپايدى. ساباعىن نەمەسە جۇمىسىن، ءۇيدىڭ شارۋاسىن كەيىنگى ورىنعا قويىپ، ينتەرنەتتە وتىرسا - بۇل تاۋەلدىلىك.

- ءسىز ەمدەۋدەن باس تارتقان جاعدايلار بولدى ما؟

- يا. مەنىڭ «قارا» ءتىزىمىم بار. مەنىڭ كليەنتتەرىمە قوياتىن ءوز تالاپتارىم بار، ماسەلەن، بەلگىلەنگەن ۋاقىتتا كەلە الماسا الدىن الا ەسكەرتۋى كەرەك. بۇل - جاۋاپكەرشىلىك. تاۋەلدى ادامداردا جاۋاپكەرشىلىك وتە تومەن، سوندىقتان تەراپيادا مەن ونى الدىڭعى ورىنعا شىعارام. كەيبىرەۋلەر ەمدى باستاپ، سوڭىنا دەيىن جەتكىزبەيدى. سالدارىنان ەمنىڭ ءبارى زايا كەتەدى.

سونداي-اق پسيحياتريالىق دياگنوزى بارلارمەن جۇمىس ىستەمەيمىن. ءبىزدىڭ باستى قاعيدامىز - زيان كەلتىرمە. ەگەر ماسەلەنى شەشۋ قولىمنان كەلمەسە مەن ونى باسقا ماماندارعا جولدايمىن.

- تاۋەلدىلىكتەن قۇتىلۋ ءۇشىن قانشا ەمدەلۋ كەرەك؟

- تاۋەلدىلىكتەن ارىلامىن دەپ ءوز ەركىمەن كەلگەندەر جاقسى ناتيجەگە قول جەتكىزىپ جاتىر. ولارعا باسقا جاققا، وڭالتۋ ورتالىقتارىنا بارۋدىڭ قاجەتى جوق. ەڭ باستىسى ادام ءوزى ارىلامىن دەپ شەشىم قابىلداۋى قاجەت. ايتپەسە ءبارى بەكەر. مەن تاۋەلدى جان دۇرىس شەشىم قابىلداۋى ءۇشىن ونىڭ تۋعان-تۋىستارىمەن، اتا-انالارىمەن دە جۇمىس ىستەيمىن. ادام وزگەرەمىن دەپ ءوزى شەشۋى ءتيىس. ستاتيستيكا جۇرگىزبەيمىن، ءبىراق مەنىڭ 17 جىلدىق پراكتيكامدا دۇرىس جولعا تۇسكەندەر جەتەرلىك. ادەتتە ءبىر اداممەن 1,5-2 اي شاماسىندا جۇمىس ىستەيمىن. ويتكەنى تاۋەلدىلىكتەن قۇتىلۋ وڭاي ەمەس. ول ۇزاق پروتسەسس. كوپشىلىكتىڭ ويىنشا ادام ءبىرىنشى قولدانادى، سوسىن تاۋەلدىلىك پايدا بولادى دەپ، جوق، كەرىسىنشە، ەڭ الدىمەن تاۋەلدىلىك پايدا بولادى، ال ماسكۇنەمدىك، ويىنقۇمارلىق - سالدارى.

- راحمەت!

اۆتور

اقەركە داۋرەنبەك قىزى