ماڭعىستاۋدا ريم داۋىرىمەن بايلانىستى كونە قالا تابىلدى

ارحەولوگيالىق زەرتتەۋلەر اتالعان ءوڭىر ارقىلى وسىدان 2000 جىل بۇرىن حالىقارالىق ساۋدا قاتىناستارى جۇرگەنىن دالەلدەيدى. مامانداردىڭ پىكىرىنشە، قاراقاباق ۇلى جىبەك جولىنىڭ سولتۇستىك تارماعىنداعى ماڭىزدى تەڭىز-قۇرلىق ساۋدا تورابى بولعان. ول كاسپي ماڭى مەملەكەتتەرىنىڭ ساياسي، ەكونوميكالىق جانە ساۋدا بايلانىستارىندا ەرەكشە ءرول اتقارعان.

قالاشىقتان ۆيزانتيا، ءۇندىستان، ريم، پارسى جانە قىتاي ەلدەرىمەن بايلانىستى دالەلدەيتىن تيىندار، مورلەر، قىش ىدىستار مەن ءتۇرلى جادىگەرلەر تابىلعان. سونىمەن قاتار ارحەولوگتار كونە پورتتىڭ ىزدەرىن، قولونەر ءوندىرىسى مەن تەڭىز ساۋداسىنا قاتىستى كوپتەگەن دەرەكتەردى انىقتاعان.

عالىمداردىڭ پايىمداۋىنشا، قاراقاباق Ⅱ عاسىرداعى ريم عالىمى كلاۆدي پتولەمەي جاساعان كاسپي تەڭىزىنىڭ شىعىس جاعالاۋى كارتاسىندا اسپابوتا اتتى قالا- مەملەكەت رەتىندە كورسەتىلۋى مۇمكىن. زەرتتەۋشىلەردىڭ ايتۋىنشا، بۇل قالا ءوز داۋىرىندەگى ءىرى لوگيستيكالىق جانە ساۋدا ورتالىقتارىنىڭ ءبىرى بولعان.

ماماندار بۇل جاڭالىقتار ماڭعىستاۋدىڭ كونە وركەنيەتتەر مەن حالىقارالىق ساۋدا قاتىناستارىنداعى ماڭىزدى ورنىن ايقىنداي تۇسەتىنىن اتاپ ءوتتى.

ايتا كەتەيىك، قازاقستاندا ارحەولوگيالىق جۇمىستارعا 5 جىلدىق ليتسەنزيا ەنگىزىلەدى.

اۆتور

اياگوز ءىزباساروۆا