اۋعانستاندا ايەلدەردىڭ ءبىر-بىرىمەن سويلەسۋىنە تىيىم سالىندى

«تاليبان» قوزعالىسىنىڭ ءمينيسترى حاليد حانافي ايەلدەرگە تەك ەرلەرمەن عانا ەمەس، ايەلدەرمەن دە اشىق سويلەسۋگە تىيىم سالدى، دەپ حابارلايدى BILD باسىلىمى.

سونىمەن قاتار، ءمينيستردىڭ مالىمدەمەسىنە سايكەس، كامەلەتكە تولعان قىزدارعا باسقا كامەلەتكە تولعان قىزداردىڭ داۋىستارىن ەستۋگە تىيىم سالىنادى. سوندىقتان ايەلدەر دە باسقا ايەلدەردىڭ الدىندا قۇراندى داۋىستاپ وقۋدان اۋلاق بولعانى ءجون.

BILD اتاپ وتكەندەي، 2021 -جىلدىڭ تامىزىندا اۋعانستاندا تالىپتەر بيلىككە كەلگەننەن كەيىن ەلدەگى ايەلدەرگە ءبىلىم الۋعا، ەر ادامنىڭ ەرىپ ءجۇرۋىنسىز ساياحاتتاۋعا جانە كوپشىلىك الدىندا، اسىرەسە ەر ادامدارمەن سويلەسۋگە تىيىم سالىندى. ولارعا ساياباقتارعا بارۋعا، سۋعا تۇسۋگە نەمەسە سپورتپەن اينالىسۋعا بولمايدى. سۇلۋلىق سالوندارىنا دا تىيىم سالىندى. ايەلدەرگە ارنالعان مەكەمەلەر جابىلىپ، «ايەلدەرگە قاتىستى زورلىق-زومبىلىق تۋرالى» زاڭنىڭ كۇشى جويىلدى.

ايەلدەر «يسلامعا قايشى مىنەز- قۇلىق» ءۇشىن ءجيى جازاعا تارتىلىپ، تۇرمەگە جابىلادى.

تاليبان بۇعان دەيىن ايەلدەرگە قوعامدىق ورىنداردا داۋىستاپ سويلەۋگە تىيىم سالعان. بۇعان جاۋاپ رەتىندە اۋعان ايەلدەرى ءان ايتا باستادى - الەۋمەتتىك جەلىلەردە نارازىلىق پەن كەلىسپەۋشىلىك بەلگىسى رەتىندە ءان ايتاتىن ترەند پايدا بولدى.

ەستەرىڭىزگە سالا كەتەيىك، ب ۇ ۇ اۋعانستان ايەلدەرىنەن بارلىق شەكتەۋلەردى الىپ تاستاۋدى تالاپ ەتكەن بولاتىن.