اۋعانستان، قازاقستان جانە تۇرىكمەنستان گەرات پروۆينتسياسىندا لوگيستيكالىق حاب قۇرۋدى جوسپارلاپ وتىر
استانا. KAZINFORM - اۋعانستان قازاقستان جانە تۇرىكمەنستان ايماقتىق ساۋدانى دامىتۋ ماقساتىندا اۋعانستاننىڭ گەرات پروۆينتسياسىندا ءىرى لوگيستيكالىق حاب سالۋ تۋرالى كەلىسىمگە كەلدى، دەپ حابارلايدى رەسەيلىك تاسس اگەنتتىگى.
بۇل تۋرالى «تاليبان» ۋاقىتشا ۇكىمەتىنىڭ ونەركاسىپ جانە ساۋدا ءمينيسترىنىڭ مىندەتىن اتقارۋشى نۋرۋددين ازيزي Reuters اگەنتتىگىنە بەرگەن سۇحباتىندا ايتتى.
ەكى ايدان كەيىن تاراپتار ءتيىستى كەلىسىمنىڭ جوباسىن دايىندايدى.
- گەرات پروۆينتسياسىندا اۋعانستان، قازاقستان جانە تۇرىكمەنستان ينۆەستيتسيالارىنا سولتۇستىك- وڭتۇستىك ازيا ءدالىزى ساۋدا باعىتتارىنىڭ قيىلىسىندا لوگيستيكالىق حاب سالىنادى، - دەدى ازيزي.
ول سونداي-اق اۋعانستاننىڭ باتىسىنداعى ورتالىق ارقىلى رەسەي پاكىستانعا جانە باسقا دا وڭتۇستىك ازيا ەلدەرىنە مۇناي جەتكىزە الاتىنىن اتاپ ءوتتى.
ونىڭ ايتۋىنشا، گەرات كولىك تورابى ارقىلى كومىرسۋتەگى شيكىزاتىنىڭ باستاپقى جىلدىق اينالىمى 1 ميلليون تونناعا جەتۋى مۇمكىن.
ازيزي اۋعانستاننىڭ قىتايمەن دە ەكى ەل اراسىندا بيىك تاۋلى ۆاحان ءدالىزى ارقىلى ساۋدا تاسىمالى جولىن قۇرۋ تۋرالى كەلىسسوزدەر جۇرگىزگەنىن ايتىپ، بۇل جولدىڭ قىتاي تاۋارلارىن اۋعانستان جەرى ارقىلى يرانعا تاسىمالداۋ ءۇشىن پايدالانىلۋى مۇمكىن ەكەنىن مەڭزەدى.
