اۋعانستان مەن پاكىستان: ىستامبۇلدا اتىستى تۇپكىلىكتى توقتاتۋ ماسەلەسى تالقىلانادى
استانا. KAZINFORM - تۇركيا پرەزيدەنتى رەجەپ تايىپ ەردوعاننىڭ نۇسقاۋىمەن دوحادا كەلىسسوزدەر ءوتىپ، وندا پاكىستان مەن اۋعانستان اراسىندا سىندارلى ديالوگ ورناتۋعا مۇمكىندىك تۋدى، دەپ حابارلايدى انادولى.
تۇرىك قاۋىپسىزدىك اگەنتتىكتەرىندەگى دەرەككوزدەردىڭ حابارلاۋىنشا، كەلىسسوز تۇركيا ۇلتتىق بارلاۋ ۇيىمىنىڭ (MIT) باسشىسى يبراحيم كالىننىڭ قاتىسۋىمەن وتكەن.
اتىستى توقتاتۋ تۋرالى پىكىرتالاسقا ەكى ەلدىڭ جوعارى لاۋازىمدى تۇلعالارى، سونىڭ ىشىندە پاكىستان مەن اۋعانستاننىڭ بارلاۋ قىزمەتىنىڭ باسشىلارى مەن قورعانىس مينيسترلەرى قاتىستى. كەزدەسۋدەگى نەگىزگى ماسەلەلەر اتىستى توقتاتۋ مەرزىمىن ۇزارتۋ، سونداي-اق شەكاراداعى سوڭعى قارۋلى وقيعالاردىڭ شەشىمىن تابۋ بولدى.
ءتۇننىڭ ءبىر ۋاعىنا دەيىن جالعاسقان كەلىسسوزدى مەملەكەت باسشىلارى ءجىتى باقىلاپ، تالقىلاۋلاردىڭ بارىسى تۋرالى جەدەل اقپارات الىپ وتىردى.
ىستامبۇلدا اتىستى توقتاتۋ تۋرالى مالىمەتتەر تالقىلانادى
اتىستى تۇپكىلىكتى توقتاتۋدى قامتاماسىز ەتۋ ءۇشىن الداعى كۇندەرى قوسىمشا كەزدەسۋلەر وتكىزۋ جوسپارلانعان. 14 ساعاتقا سوزىلعان كەلىسسوزدىڭ قورىتىندىسى بويىنشا كەلىسىمدى ەگجەي-تەگجەي ازىرلەيتىن تەحنيكالىق كوميتەتتىڭ ءبىرىنشى وتىرىسى ىستامبۇلدا وتەدى دەپ شەشىلدى.
بۇل كەزدەسۋدە تاراپتار تەرروريزمگە قارسى كۇرەس، كوشى-قون اعىنىن باسقارۋ جانە شەكارا قاۋىپسىزدىگىن قامتاماسىز ەتۋ سياقتى ماسەلەلەردى تۇپكىلىكتى شەشۋ ءۇشىن ۇزاق مەرزىمدى شارالاردى ازىرلەۋگە نازار اۋدارادى.
بۇعان دەيىن ىستانبۇلدا 11-قازان كۇنى تۇركيا، پاكىستان جانە كاتار بارلاۋ قىزمەتتەرى باسشىلارىنىڭ ءۇشجاقتى كەزدەسۋى ءوتتى. وندا اۋعانستان بيلىك وكىلدەرىمەن بايلانىس ورناتىلدى.
ايتا كەتەيىك، وسىعان دەيىن اۋعانستان مەن پاكىستان اتىستى تەز ارادا توقتاتۋ تۋرالى كەلىسىمگە كەلگەنى تۋرالى جازدىق.
