اباي وبلىسىنىڭ تۇرعىنى ادام ساۋداسى ءۇشىن 6 جىلعا سوتتالدى
سەمەي. KAZINFORM - اباي وبلىسى اياگوز قالاسىنىڭ تۇرعىنى ادام ساۋداسى فاكتىسى بويىنشا كىنالى دەپ تانىلىپ، 6 جىلعا باس بوستاندىعىنان ايىرىلدى.
قىلمىستىق ءىس اياگوز اۋداندىق سوتىندا قارالدى. بەلگىلى بولعانداي، 2024-2025 - جىلدارى ارالىعىندا ايىپتالۋشى الەۋمەتتىك تۇرعىدا وسال ساناتتاعى ازاماتتاردى ادەيى ىزدەستىرگەن. نەگىزىنەن ول سەمەي قالاسىنداعى تەمىرجول ۆوكزالدارى مەن بازار ماڭىندا جۇرگەن ادامداردى نىساناعا العان.
- جابىرلەنۋشىلەردىڭ كوبى ماس كۇيدە بولىپ، جۇمىسقا ورنالاستىرۋ تۋرالى ۋادەلەرگە وڭاي سەنگەن. وسىدان سوڭ ايەل ولاردى ءتۇرلى شارۋا قوجالىقتارىنا جىبەرىپ وتىرعان. ال فەرمەرلەر الدىن الا جۇمىس ءۇشىن تولەگەن 100 مىڭنان 400 مىڭ تەڭگەگە دەيىنگى قاراجاتتى ءوز قالتاسىنا باسقان. ءىس بارىسىندا وسىنداي بەس ەپيزود تىركەلدى، - دەپ حابارلادى سوتتان.
كەيبىر جاعدايلاردا ايىپتالۋشى جابىرلەنۋشىلەردىڭ قوزعالۋ ەركىندىگىن شەكتەپ، قورقىتۋ، پسيحولوگيالىق قىسىم كورسەتۋ جانە الكوگولگە تاۋەلدى ەتۋ تاسىلدەرىن قولدانعان.
سوتتا ايەل ادام ءوز كىناسىن تولىق مويىنداپ، ىستەگەنىنە وكىنىش ءبىلدىرىپ، كەلتىرىلگەن شىعىندى وتەپ، جابىرلەنۋشىلەرمەن تاتۋلاسقان. سوعان قاراماستان، سوت ونى 6 جىلعا باس بوستاندىعىنان ايىردى.
اپەللياتسيالىق ساتى ۇكىمدى وزگەرىسسىز قالدىردى. ۇكىم زاڭدى كۇشىنە ەندى.
