شري-لانكاداعى پرەزيدەنت سايلاۋىندا انۋر كۋمار ديسساناياكە جەڭىسكە جەتتى

استانا. KAZINFORM - شري-لانكادا وتكەن پرەزيدەنتتىك سايلاۋدا «ۇلتتىق حالىقتىق بيلىك» اليانسىنىڭ جەتەكشىسى انۋر كۋمار ديسساناياكە جەڭىسكە جەتتى، دەپ جازادى بەلتا اگەنتتىگى.

«كوميسسيا ءوز ۆەب- سايتىندا 55 جاستاعى ديسساناياكە سەنبى كۇنگى سايلاۋدا %42,31 داۋىس جيناپ، پرەزيدەنتتىك سايلاۋدا جەڭىسكە جەتكەنىن حابارلادى. وپپوزيتسيا جەتەكشىسى سادجيت پرەماداسۋ ەكىنشى ورىندا، ال قازىرگى پرەزيدەنت رانيل ۆيكرمەسينگحە ءۇشىنشى ورىندا»، - دەپ حابارلايدى باسىلىم.

سايلاۋ كوميسسياسىنىڭ قورىتىندىسى بويىنشا، سايلاۋدا داۋىس بەرگەن 13,6 ميلليون ادامنىڭ 5,6 ميلليوننان استامى ديسساناياكەگە داۋىس بەردى. جاڭا پرەزيدەنتتىڭ يناۋگۋراتسياسى 23-قىركۇيەكتە وتەدى.

ديسساناياكەنىڭ ساياسي مانسابى 1988-جىلى الەۋمەتتىك ستۋدەنتتەر قاۋىمداستىعىنىڭ ۇلتتىق ۇيىمداستىرۋشىسى رەتىندە باستالىپ، وتىز جىلدان استام ۋاقىتقا جالعاستى. ساياساتكەر «حالىق ازاتتىق مايدانى» پارتياسىنىڭ قاتارىندا كوتەرىلىپ، 1995-جىلى ونىڭ ورتالىق جۇمىس كوميتەتىنە مۇشە بولىپ، 2001 -جىلى پارلامەنت دەپۋتاتى بولدى. 2004-2005 -جىلدار ارالىعىندا شري- لانكانىڭ اۋىل شارۋاشىلىعى، مال شارۋاشىلىعى، جەر جانە سۋارۋ ءمينيسترى قىزمەتىن اتقارعان. 2014-جىلى ديسساناياكە «حالىق ازاتتىق مايدانى» پارتياسىنىڭ جەتەكشىسى بولدى.

ديسساناياكە بۇعان دەيىن پرەزيدەنت بولىپ سايلانسا، ازىق-تۇلىك داعدارىسىمەن كۇرەسۋ، ءبىلىم مەن دەنساۋلىق ساقتاۋ سالالارىنا ينۆەستيتسيا تارتۋ جانە شري- لانكانىڭ ەكونوميكالىق وسۋىنە جۇمىس جاساۋعا ۋادە بەرگەن بولاتىن.