اۋا رايىنىڭ قولايسىزدىعىنان 17 ادام قازا تاپتى
استانا. KAZINFORM - اۋعانستانداعى سۋ تاسقىنى، كوشكىن جانە نوسەر جاۋىن سالدارىنان سوڭعى 24 ساعات ىشىندە 17 ادام قازا تاۋىپ، 26 ادام جاراقات الدى.
اۋعانستاننىڭ ۇلتتىق اپاتتاردى باسقارۋ باسقارماسىنىڭ مالىمەتى بويىنشا، اۋماقتار زەرتتەلگەن سايىن قۇرباندار سانى ارتۋى مۇمكىن. Associated Press اگەنتتىگىنىڭ حابارلاۋىنشا، ەلدىڭ باتىس، ورتالىق جانە سولتۇستىك-باتىسىنداعى 34 پروۆينسياسىنىڭ ون ءۇشى زارداپ شەكتى.
ناتيجەسىندە 147 ءۇي، 80 شاقىرىم جول قيراپ، ەگىستىك جەرلەر، سۋارۋ جۇيەلەرى جانە بيزنەس نىساندارى ءبۇلىندى. بارلىعى 530 وتباسى زارداپ شەكتى.
باسقارمانىڭ باسپا ءسوز حاتشىسى يۋسۋف حامماد دۇيسەنبى، 30-ناۋرىزدا تاعى دا جاڭبىر جاۋۋى مۇمكىن ەكەنىن ەسكەرتتى. بۇل شىعىس جانە ورتالىق ايماقتاردا سۋ تاسقىنىنا اكەلۋى مۇمكىن.
تۇرعىندارعا وزەندەر مەن قاۋىپتى ايماقتاردان اۋلاق بولۋعا كەڭەس بەرىلدى.
بۇعان دەيىن گاۆايدەگى جويقىن سۋ تاسقىنى ەل ەكونوميكاسىنا 1 ميلليارد دوللار شىعىن اكەلگەنى حابارلانعان بولاتىن.
سونداي-اق ساراپشىلار ەكۆاتورلىق تىنىق مۇحيتىنداعى جەرۇستى سۋلارىنىڭ جىلىنۋىنا اكەلەتىن ەل- نينو تۋرالى ايتتى.
اۆتور
ەركەجان سماعۇلوۆا
