ا ە س قۇرىلىسى: قازاقستان حالقى بۇگىن تاڭداۋ جاسايدى
استانا. KAZINFORM - قازاقستاندا اتوم ەلەكتر ستانتسياسىن سالۋ ماسەلەسى بويىنشا جالپى ۇلتتىق رەفەرەندۋم باستالدى. ورتالىق رەفەرەندۋم كوميسسياسىنان الىنعان مالىمەتتەر نەگىزىندە شارانىڭ ءوتۋ تارتىبىنە شولۋ ۇسىنامىز.
رەفەرەندۋم بيۋللەتەنىندە ءبىر عانا ساۋال بار
2023 -جىلى 1-قىركۇيەكتەگى «ءادىل قازاقستاننىڭ ەكونوميكالىق باعدارى» اتتى قازاقستان حالقىنا جولداۋىندا مەملەكەت باسشىسى قازاقستاندا اتوم ەلەكتر ستانتسياسىن سالۋ ماسەلەسىن جالپى ۇلتتىق رەفەرەندۋم ارقىلى شەشۋ قاجەتتىگىن العا تارتتى. ا ە س قۇرىلىسى مەن رەفەرەندۋم وتكىزۋ تاقىرىبىن قوعام ءبىر جىل تالقىلادى، ياعني پىكىر الماسىپ، ماڭىزدى شەشىم قابىلداۋعا دايىندالدى. تۋرا ءبىر جىلدان كەيىن مەملەكەت باسشىسى قاسىم-جومارت توقايەۆ «2024 -جىلعى 6-قازاندا رەسپۋبليكالىق رەفەرەندۋم وتكىزۋ تۋرالى» جارلىققا قول قويدى.
رەسپۋبليكالىق رەفەرەندۋمدى ۇيىمداستىرۋ مەن وتكىزۋ رەفەرەندۋمنىڭ ورتالىق كوميسسياسى قىزمەتىن اتقاراتىن قازاقستان رەسپۋبليكاسىنىڭ ورتالىق سايلاۋ كوميسسياسىنا، سونداي- اق رەفەرەندۋمنىڭ اۋماقتىق جانە ۋچاسكەلىك كوميسسيالارىنىڭ قىزمەتىن اتقاراتىن اۋماقتىق جانە ۋچاسكەلىك سايلاۋ كوميسسيالارىنا جۇكتەلگەن.
رەسپۋبليكالىق رەفەرەندۋم بيۋللەتەنىندە ءبىر عانا ساۋال بولادى:
- ءسىز قازاقستاندا اتوم ەلەكتر ستانتسياسىن سالۋعا كەلىسەسىز بە؟
داۋىس بەرۋشى جاۋاپتىڭ ەكى نۇسقاسىنىڭ ءبىرىن تاڭدايدى:
- « ءيا، كەلىسەمىن» نەمەسە، «جوق، كەلىسپەيمىن» .
بيۋللەتەندەر ەكى تىلدە - قازاق جانە ورىس تىلدەرىندە باسىلادى.
سونىمەن، ءدال قازىر ەل اۋماعىنداعى 84 ۋچاسكەدە داۋىس بەرۋ باستالدى. ولار - اسكەري بولىمدەر مەن ۆاحتالىق ەلدى مەكەندەر، اۋىسىم كەستەسىمەن جۇمىس ىستەيتىن ادامدار تۇراتىن ۋچاسكەلەر، ياعني بۇل نۇكتەلەردە داۋىس بەرۋ ساعات 6:00 دەن باستاپ جۇرەدى.
ورتالىق رەفەرەندۋم كوميسسياسى ءتوراعاسىنىڭ ورىنباسارى كونستانتين پەتروۆتىڭ ايتۋىنشا، ەگەر اۋىسىممەن ىستەيتىن ازاماتتىڭ جۇمىسى ساعات 07:00 دە باستالسا، وندا 06:00 دەن داۋىس بەرە الادى. مۇنداي ۋچاسكەلەردىڭ كوپشىلىگى قاراعاندى مەن اباي وبلىستارىندا، سونىمەن قاتار الماتىدا، ال ۆاحتالىق ەلدى مەكەندەر اقتوبە مەن ماڭعىستاۋ وبلىستارىندا ورنالاسقان.
ال بۇلاردان باسقا داۋىس بەرۋ ۋچاسكەلەرى ساعات 7:00 دەن 20:00 گە دەيىن اشىق بولادى.
بۇعان دەيىن حابارلانعانىنداي، 1-شىلدەدەگى جاعداي بويىنشا ەل كولەمىندە 12176968 ادام رەفەرەندۋمعا قاتىسۋ مۇمكىندىگىنە يە.
ورتالىق رەفەرەندۋم كوميسسياسىنىڭ ءتوراعاسى نۇرلان ءابدىروۆتىڭ ايتۋىنشا، داۋىس بەرۋگە ارنالعان 10323 ۋچاسكە، ونىڭ ىشىندە 59 شەتەلدەگى مەكەمەلەر جانىنان اشىلعان 74 رەفەرەندۋم ۋچاسكەسى جۇمىس ىستەيدى.
سىرتقى ىستەر مينيسترلىگىنىڭ ەرەكشە تاپسىرمالار جونىندەگى ەلشىسى الۋا ءنادىرقۇلوۆا ءمالىم ەتكەنىندەي، شەتەلدە داۋىس بەرۋگە قۇقىعى بار وتانداستارىمىزدىڭ ءتىزىمى جاسالدى. ولاردىڭ جالپى سانى - 12485 ادام. بۇل رەتتە ليۆان، يران جانە يزرايلدەگى 228 قازاقستان ازاماتى داۋىس بەرمەيدى. تاياۋ شىعىستاعى جاعدايدىڭ ايتارلىقتاي شيەلەنىسۋىنە بايلانىستى بۇل ەلدەردەگى قازاقستان ديپلوماتتارى كۇشەيتىلگەن رەجيمدە جۇمىس ىستەپ جاتىر. كۇردەلى اسكەري- ساياسي جاعدايدا قازاقستان ازاماتتارىنىڭ قاۋىپسىزدىگىن قامتاماسىز ەتۋ ماقساتىندا رەفەرەندۋم ۋچاسكەلەرىنىڭ قىزمەتىن ۋاقىتشا توقتاتۋ تۋرالى شەشىم قابىلداندى.
