ا ق ش ۆيتسە-پرەزيدەنتى 2028-جىلى پرەزيدەنتتىككە ۇمىتكەر رەتىندە قاراستىرىلىپ وتىر
استانا. KAZINFORM - ۆيتسە-پرەزيدەنت دجەي دي ۆەنس رەسپۋبليكالىق پارتيا اتىنان 2028-جىلى پرەزيدەنت قىزمەتىنە باستى ۇمىتكەر بولدى، دەپ حابارلايدى Kazinform اگەنتتىگىنىڭ ۆاشينگتونداعى مەنشىكتى ءتىلشىسى.
The Hill حابارلاۋىنشا، كونسەرۆاتيۆتىك ساياسي ءىس-قيمىل كونفەرەنسياسىنىڭ (CPAC) جاڭا الدىن الا داۋىس بەرۋ قورىتىندىلارىنا سايكەس، ۆەنس تەحاس شتاتىنىڭ گرەيپۆاين قالاسىندا وتكەن جىل سايىنعى سەزدە پرەزيدەنتتىككە كانديداتتاردىڭ ارتىقشىلىقتارى بويىنشا ساۋالناماعا قاتىسقانداردىڭ شامامەن 53 پايىزىنىڭ قولداۋىنا يە بولدى.
مەملەكەتتىك حاتشى ماركو رۋبيو 35 پايىز داۋىسپەن ەكىنشى ورىندى يەلەنسە، فلوريدا گۋبەرناتورى رون دەسانتيس پەن پرەزيدەنتتىڭ ۇلى كىشى دونالد ترامپ 2 پايىز داۋىس جيناپ، ءۇشىنشى ورىندا تۇردى.
سەناتورلار تەد كرۋز (تەحاس) جانە رەند پول (كەنتۋككي)، قورعانىس ءمينيسترى پيت حەگسەت، ۇلتتىق بارلاۋ ديرەكتورى تۋلسي گاببارد جانە تەحاس گۋبەرناتورى گرەگ ەببوتت ءارقايسىسى 1 پايىز داۋىس جينادى. تىزىمدەگى بىرنەشە كانديدات قولداۋ تابا المادى.
ۆەنس ەسىمىنىڭ تىزىمدە ءبىرىنشى تۇرۋى كونسەرۆاتيۆتى رەسپۋبليكاشىلداردىڭ ونى پرەزيدەنت ترامپتىڭ ورنىنا ەڭ قولايلى كانديدات دەپ سانايتىنىن تانىتىپ وتىر.
وتكەن جىلى ۆەنس CPAC- تىڭ 1022 قاتىسۋشىسىنىڭ اراسىندا 61 پايىز قولداۋمەن كوش باستادى، ودان كەيىن ترامپتىڭ بۇرىنعى كەڭەسشىسى ستيۆ بەننون (12 پايىز) تۇردى.
2025-جىلى رۋبيو تەك 3 پايىز قولداۋ العان، بۇل ونىڭ ترامپتى جاقتاۋشىلار اراسىندا تانىمالدىعىنىڭ ارتىپ كەلە جاتقانىن كورسەتەدى.
سەنبىدەگى الدىن الا داۋىس بەرۋ قورىتىندىسى تاڭعالارلىق جايت ەمەس ەدى. سەبەبى ۆەنس پەن رۋبيو 2028-جىلعى سايلاۋ الدىندا رەسپۋبليكالىق پارتيانىڭ كۇتىلەتىن كوشباسشىلارى بولىپ سانالدى. دونالد ترامپتىڭ سايلاۋعا قايتادان ءتۇسۋ قۇقىعى جوق.
وسىعان دەيىن ا ق ش سەناتورى كوري بۋكەر پرەزيدەنتتىككە ۇمىتكەر بولۋى مۇمكىن ەكەنىن مالىمدەگەنىن جازدىق.
