ا ق ش-تا سايلاۋ ناۋقانى باستالادى
استانا. KAZINFORM – ا ق ش- تا قىركۇيەكتىڭ ءبىرىنشى دۇيسەنبىسىندە اتاپ وتىلەتىن ەڭبەك كۇنى سايلاۋ ماۋسىمىن اشتى. جۇما كۇنى پوشتا ارقىلى العاشقى بيۋللەتەندەردى جىبەرۋ باستالادى.
10-قىركۇيەكتە پرەزيدەنتتىك سايلاۋدىڭ العاشقى دەباتى، ال جەكەلەگەن شتاتتاردا مەرزىمىنەن بۇرىن داۋىس بەرۋ 20-قىركۇيەكتە باستالادى، دەپ حابارلايدى «امەريكا داۋىسى» .
كىم داۋىس بەرەدى ؟
بيۋللەتەندەردىڭ ءبىرىنشى تولقىنى اسكەري جانە شەتەلدەگى سايلاۋشىلارعا فەدەرالدى زاڭ تالاپ ەتكەندەي، سايلاۋعا 45 كۇن قالعاندا، ياعني 21-قىركۇيەكتە جىبەرىلەدى. دەگەنمەن، كەيبىر شتاتتار، مىسالى سولتۇستىك كارولينا پوشتا جونەلتىلىمىن ەرتەرەك، 6-قىركۇيەكتە باستايدى.
سايلاۋشىلاردى تىركەۋ مەرزىمدەرى شتات بويىنشا ءارتۇرلى، ءبىراق كوپشىلىگى سايلاۋعا 8-30-كۇن قالعاندا جۇرگىزىلەدى. گرۋزيادا سوڭعى مەرزىم – 7-قازان.
بارلىق دەرلىك شتاتتار جەكە داۋىس بەرۋدى ۇسىنادى، ءبىراق ەرەجەلەر مەن كۇندەرى ءارتۇرلى. پەنسيلۆانيادا سايلاۋشىلار 16-قىركۇيەكتەن باستاپ جەرگىلىكتى سايلاۋ كەڭسەسىندە داۋىس بەرۋ بيۋللەتەنىن سۇراپ، تاپسىرا الادى.
الداعى پىكىرتالاستار
پرەزيدەنتتىككە جانە ۆيتسە-پرەزيدەنتتىككە كانديداتتار اراسىنداعى پىكىرسايىستاردىڭ ورنى مەن ەرەجەلەرى تۋرالى داۋلار جالعاسۋدا. ازىرگە ەكى كەزدەسۋ جوسپارلانعان.
دونالد ترامپ پەن كامالا حارريس 10-قىركۇيەكتە فيلادەلفيادا وتەتىن پىكىرسايىسقا ABC News ارناسىنىڭ شاقىرۋىن قابىلدادى. ترامپ ءارتۇرلى تەلەديدار جەلىلەرىندە ءۇش راۋندتىق پىكىرسايىس وتكىزۋدى ۇسىندى.
دەموكراتيالىق پارتيادان ۆيتسە-پرەزيدەنتتىككە كانديدات ميننەسوتا گۋبەرناتورى تيم ۋولز بەن رەسپۋبليكاشىل وگايو شتاتىنىڭ سەناتورى دجەي دي ۆەنس 1-قازاندا نيۋ- يوركتە CBS News وتكىزەتىن پىكىرتالاس جونىندە كەلىستى. ۆەنس 18-قىركۇيەكتە تاعى ءبىر پىكىرتالاس وتكىزۋدى ۇسىندى، ءبىراق ول ءالى راستالعان جوق.
2-قىركۇيەكتە تيم ۋولز كورتەجى جول اپاتىنا ۇشىرادى، تىلشىلەردىڭ ءبىرى قولىنان جاراقات الدى. ۋولزدىڭ ءوزى زارداپ شەككەن جوق.
داۋىس ءۇشىن كۇرەس
سايلاۋ ەرەجەلەرىنە بايلانىستى كۇرەس قىزا تۇسۋدە. ترامپ داۋىس بەرۋ ەرەجەلەرىنە قارسى سوتقا بىرنەشە شاعىم تۇسىرگەن سايلاۋدىڭ ادالدىعى كومانداسىن قۇردى. دەموكراتتار دا زاڭدى سايلاۋشىلارعا اسەر ەتۋى مۇمكىن سايلاۋشىلار ءتىزىمىن «تازارتۋعا» قارسى تۇرۋ ءۇشىن وزدەرىنىڭ زاڭ توبىن دايىنداپ جاتىر.
