ا ق ش- تا قاراۋسىز قالعان بالالار سانى ارتىپ كەلەدى
ا ق ش ماماندارى اتا-انالاردىڭ بالا الدىنداعى جاۋاپكەرشىلىگىن ارتتىرۋ كەرەك دەيدى. سەبەبى قاراۋسىز قالعان بالالاردىڭ ءولىم- ءجىتىمى كوبەيىپ بارادى.
تولىعىراق ا ق ش- تاعى ءتىلشىمىز تالعات المانوۆ تارقاتادى.
تالعات المانوۆ، ءتىلشى:
- ماۋسىمنىڭ 6 سى. 2023 -جىل. وگايو شتاتىنىڭ كليۆلەند قالاسىندا حالىقتى ءدۇر سىلكىندىرگەن قايعىلى وقيعا ورىن الدى. 32 جاستاعى كريستەل كاندەلاريو ءوزىنىڭ 1,5 جاستاعى قىزىن ۇيدە جالعىز تاستاپ، شەتەل اسىپ دەمالىسقا كەتىپ قالعان. مەديتسينالىق پاتولوگواناتتىڭ ايتۋىنشا، نارەستە 10 كۇن بويى ءنار تاتپاعاننان كوز جۇمعان. ال اناسى ءومىر بويى باس بوستاندىعىنان ايىرىلدى.
اتلانتا تۇرعىنى:
- مۇنداي اتا-انالاردىڭ كوزىن قۇرتۋ قاجەت. بارلىعىن سوتتاپ، ءتيىستى جازاسىن بەرۋ كەرەك. اقىل-ەسى دۇرىس اتا-انا ءوزىنىڭ بالاسىن قاراۋسىز قالدىرىپ كەتپەيدى عوي. مەن ءتىپتى مىسىعىمنىڭ ءوزىن قاراۋسىز قالدىرمايمىن. قاراۋسىز قالعان بالالاردىڭ ءولىم-ءجىتىمى ارتىپ كەلەدى. ا ق ش دەنساۋلىق ساقتاۋ جانە ادام قىزمەتى دەپارتامەنتىنىڭ مالىمەتى بويىنشا جىل سايىن ورتاشا ەسەپپەن 1400 دەن استام بالا سونىڭ سالدارىنان كوز جۇمادى. «ەڭ سوراقىسى، قۇقىق قورعاۋشىلاردىڭ نازارىنان تىس قالاتىن جاعدايلاردى انىقتاۋ مۇمكىن ەمەس»، - دەيدى ماماندار.
تامارا تي، بالا قۇقىقتارى جونىندەگى مامان:
- بۇل وتە كۇردەلى ماسەلە. بالالار ءبىزدىڭ قوعامنىڭ ەڭ وسال توبىنا جاتادى. ءبىراق ولارعا ءتيىستى دەڭگەيدە كوڭىل ءبولىنىپ جاتقان جوق. ا ق ش- تا بالالاردى قاراۋسىز قالدىرۋ ولارعا قارسى جاسالاتىن زورلىق- زومبىلىقتىڭ ەڭ كەڭ تارالعان ءتۇرى بولىپ سانالادى. شتاتقا بايلانىستى جازاسى دا ءارتۇرلى. كىنالى دەپ تانىلعان اتا- اناعا ايىپپۇل سالۋ، قوعامدىق جۇمىستارعا تارتۋ نەمەسە 6-ايدان بىرنەشە جىلعا دەيىن باس بوستاندىعىنان ايىرۋ قاراستىرىلعان. «دەگەنمەن، جازانى كۇشەيتۋ ماسەلەنى تۇبەگەيلى شەشە قويماس»، - دەيدى سالا مامانى.
تامارا تي، بالا قۇقىقتارى جونىندەگى مامان:
- جازانى كۇشەيتۋ ماسەلەنى شەشپەيدى. ونىڭ ورنىنا اتا- انالارمەن جۇمىس ىستەۋ كەرەك. بالا الدىنداعى جاۋاپكەرشىلىكتى جاقسىلاپ ءتۇسىندىرۋىمىز كەرەك. جالپى قوعام رەتىندە سانالى بولۋدى ۇيرەنۋىمىز كەرەك دەپ ويلايمىن.
«جازدىڭ اپتاپ ىستىعىندا بالالارعا ەرەكشە مۇقيات بولعان ابزال»، - دەيدى ماماندار. ولاردى ءتىپتى از ۋاقىتقا دا قاراۋسىز قالدىرۋ قاۋىپتى بولۋى مۇمكىن. ماسەلەن، سوندىرىلگەن كولىكتىڭ ىشىندەگى تەمپەراتۋرا بىرنەشە مينۋتتا تىنىس الۋعا كەدەرگى كەلتىرىپ، قاراۋسىز قالعان بالانىڭ ومىرىنە قاتەر توندىرەتىن دەڭگەيگە جەتۋى مۇمكىن.
تالعات المانوۆ، ءتىلشى:
- «كولىكتىڭ ىشىندە قاراۋسىز قالعان بالالاردىڭ سانى جىل سايىن ارتىپ كەلەدى»، - دەيدى ماماندار. بيىلدىڭ وزىندە وسىنداي جاعدايدان 18 بالا كوز جۇمعان. ەڭ جاسى 2 ايلىق نارەستە. پوليتسيا وكىلدەرىنىڭ ايتۋىنشا، اناسى ونى 4 ساعاتقا جۋىق جالعىز تاستاپ كەتكەن.
