ا ق ش-تا دەموكراتيالىق پارتيانىڭ سەزى باستالدى

استانا. KAZINFORM-دەموكراتيالىق پارتيانىڭ ۇلتتىق سەزى دۇيسەنبىدە اشىلادى. ول يللينويس شتاتىنىڭ چيكاگو قالاسىندا وتەدى جانە بەيسەنبىگە دەيىن جالعاسادى، دەپ حابارلايدى CBS News.

دەموكراتيالىق پارتيانىڭ سەزى 19-تامىزدا باستالىپ، 22-تامىزعا دەيىن جالعاسادى. امەريكانىڭ چيكاگو قالاسىندا ءتورت مىڭنان استام دەلەگات جينالادى.

ادەتتە پارتيالار كونۆەنسيا كەزىندە مەملەكەت باسشىسىنا ءوز كانديداتتارىن ۇسىنادى. الايدا حارريس وسى ايدىڭ باسىندا ونلاين داۋىس بەرۋ كەزىندە ءوزىنىڭ الدىڭعى قاتارداعى ۇمىتكەر مارتەبەسىن رەسمي تۇردە راستادى. ولاي بولعانىمەن، سەزدە «سالتاناتتى» داۋىس بەرۋ وتەدى دەپ جوسپارلانعان.

دەموكراتيالىق پارتيا ۇلتتىق سەزىنىڭ شەنەۋنىكتەرى پرەزيدەنت بايدەن مەن ءبىرىنشى حانىم دجيلل بايدەن دۇيسەنبىدە ءسوز سويلەيتىنىن راستادى. دۇيسەنبىنىڭ تاقىرىبى - «حالىق ءۇشىن».

ەسكە سالا كەتسەك، 6-تامىزدا ا ق ش پرەزيدەنتتىگىنە دەموكراتيالىق پارتيادان ۇمىتكەر كامالا حارريس ۆيتسە- پرەزيدەنتتىككە تيم ۋولزدى كانديدات ەتىپ تاڭداعان ساتتەن باستاپ ونىڭ سايلاۋالدى ناۋقانىنىڭ سۇلباسى تۇپكىلىكتى قالىپتاستى. بۇعان دەيىن 1-5-تامىز ارالىعىندا پارتيا سەزىنىڭ دەلەگاتتارى ونلاين داۋىس بەرىپ، ولاردىڭ 99 پايىزى حارريستى قولداعان. ەندى پارتيا سەزىندە حارريس-ۋولز تاندەمى رەسمي تۇردە ۇسىنىلاتىن بولادى.