الەمدەگى ەڭ ەرەكشە 9 ۇلت

نۇر-سۇلتان. قازاقپارات - كەيدە ولاردىڭ ءومىرى عىلىمي-فانتاستيكالىق رومانداردىڭ ۇزىندىلەرىنەن الىنعانداي كورىنەدى.

افريكادا ەرلەر اراسىندا سۇلۋلىق بايقاۋىن وتكىزەتىن تايپا بار. قاتىسۋشىلار اشىق ءتۇستى ادەمى كيىنىپ، قىزداردان قۇرالعان قازىلار القاسى ولاردىڭ اراسىنان ۇزدىگىن تاڭدايدى. الەمدەگى ەڭ باقىتتى ادامدار كاۆكازداعى تاۋلى اۋىلدا تۇرادى.

وسى سياقتى الەمدەگى حالىقتار مەن تايپالاردىڭ ەرەكشەلىگىن AdMe.ru جازدى.

ۆوداابەدە

بۇل حالىق ورتالىق افريكادا تۇرادى جانە ءوزىن الەمدەگى ەڭ تارتىمدى ۇلت دەپ سانايدى. سونداي-اق، مۇندا ەر ادامدار ءۇشىن ەڭ الدىمەن سىرتقى سۇلۋلىق وتە ماڭىزدى. ۆوداابەدە «گەريەۆول» دەپ اتالاتىن فەستيۆال بار، وندا اشىق، ءتۇرلى-ءتۇستى كيىم كيگەن جاس جىگىتتەر وزدەرىنىڭ سىرتقى سۇلۋلىعىن كورسەتۋ جانە تايپا ايەلدەرىنە جاقسى اسەر قالدىرۋ ءۇشىن ءبي بيلەيدى.

سونىمەن قاتار، ۆوداابەدە سابىرلىق پەن كىشىپەيىلدىلىكتى باعالايدى. مىسالى، كۇندىز ەرلى-زايىپتىلار ادامداردىڭ كوزىنشە ءبىر-ءبىرىنىڭ قولىن ۇستاماق تۇگىلى، سويلەسپەيدى.

ايندار

ايندار جاپون ارالدارىنىڭ باستاپقى تۇرعىندارى. قازىر ولاردى جاپونداردان اجىراتۋ قيىن، ءبىراق 100 جىل بۇرىن ولار كۇنشىعىس ەلىنىڭ تۇرعىندارىنىڭ كوپشىلىگىنە مۇلدەم ۇقسامايتىن. ايندار كاۆكازدىقتارعا ۇقساس بەت الپەتتەرىمەن، قالىڭ شاشتارىمەن جانە ساقالدى ەرلەردىڭ كوپتىگىمەن ەرەكشەلەندى. العاشقى رەسەيلىك زەرتتەۋشىلەر بۇل ەتنيكالىق توپ وكىلدەرىن قارا ورىس شارۋالارىنا نەمەسە ءتىپتى سىعاندارعا ۇقساس دەپ سيپاتتادى.

ماوري

ماوري مادەنيەتى الەمدەگى ەڭ جاس مادەنيەتتەردىڭ ءبىرى. بۇل حالىقتىڭ العاشقى وكىلدەرى جاڭا زەلاندياعا تەك XIV عاسىردا كەلگەن. ونىڭ ۇستىنە عالىمدار ولاردىڭ ناقتى قايدان شىققانى تۋرالى سۇراققا ءالى ناقتى جاۋاپ بەرە المايدى. «ماوري» ءسوزىنىڭ ءوزى ەتنيكالىق توپ تىلىندە «قالىپتى» نەمەسە «قاراپايىم» دەگەندى بىلدىرەدى. بۇل ادامداردىڭ سىرتقى ءتۇرى باسقالاردان ەرەكشە. سەبەبى، ماوريلەردىڭ بەتى ءتۇرلى سۋرەتپەن ورنەكتەلەدى.

دەنەگە ورنەك سالۋ ونەرىن جاڭا زەلانديانىڭ بايىرعى تۇرعىندارى «تا-موكو» دەپ اتايدى. ولار قازىرگى تاتۋيروۆكاداي تەرىنى تەسپەيدى كەرىسىنشە، كەسەدى. تاتۋيروۆكالار ماوري تولقۇجاتىنىڭ ءبىر ءتۇرى. ولار وسى ارقىلى ادامنىڭ الەۋمەتتىك مارتەبەسى تۋرالى اقپاراتتى الىپ جۇرەدى. ادامداردا تاتۋيروۆكالاردىڭ جوقتىعى ماوريلەردىڭ كوزىنە ءبىرتۇرلى كورىنەدى.

كادجۋندار

كادجۋندار - XVIII عاسىردىڭ ورتاسىندا لۋيزيانانىڭ وڭتۇستىگىنە جەتۋگە قيىن سۋلى-باتپاقتى جەرگە قونىستانعان كانادالىق فرانسۋزداردىڭ ۇرپاقتارى جانە ءالى دە سوندا تۇرادى. ولار جاقىن جەردە تۇراتىن باسقا حالىقتاردىڭ وكىلدەرىمەن نەكەگە تۇرىپ ناتيجەسىندە كادجۋندار پايدا بولعان.

ەڭ تانىمال كادجۋن داستۇرلەرىنىڭ ءبىرى - «ماردي گرا» فەستيۆالىن وتكىزۋ. بۇل ۇلكەن كارناۆال شەرۋى، ونىڭ بارىسىندا جوعارى كونۋس ءتارىزدى قالپاق كيگەن قاتىسۋشىلار لۋيزيانانىڭ ءداستۇرلى تاعامى - «گامبو» سورپاسىن دايىنداۋعا ارنالعان ينگرەديەنتتەردى جيناۋى كەرەك. مەرەكە ءتۇن ورتاسىنا دەيىن اياقتالادى.

كوروۆايلار

جاڭا گۆينەيادا تۇراتىن پاپۋاندىقتاردىڭ بۇل ەتنيكالىق توبى 50 مەتر بيىكتىكتەگى اعاشتارعا ءۇي سالۋمەن تانىمال. ولار ءالى تاس داۋىرىندەگىدەي ءومىر سۇرەدى. مەتالدى پايدالانبايدى جانە ەگىنشىلىكتى بىلمەيدى. 1970-جىلدارعا دەيىن كوروۆايلار كورشى تايپالاردان باسقا ەشكىممەن بايلانىستا بولعان جوق، ولار دۇنيەدە بىزدەن باسقا حالىق جوق دەپ سەندى.

بۇل ادامدار كاننيباليزممەن اينالىسقان. انتروپولوگتاردىڭ ايتۋىنشا، وتكەننىڭ بۇل قالدىعى قازىر جويىلعان. دەگەنمەن، حالىق وكىلدەرى تۋريستەردى تارتۋ ءۇشىن ەجەلگى داستۇرلەر ءالى دە ساقتالعان دەگەن ميفتى بەلسەندى تۇردە قولدايدى.

كحاسي

بۇل جۇمباق حالىق ءۇندىستاندا تۇرادى. كحاسي ماتريلينەينوست سالتىن (انالىق تەك) ساقتاپ قالعان. بۇل سالت بويىنشا ءبارى كەرىسىنشە. مىسالى، ۇيلەنۋ تويىنان كەيىن كۇيەۋى ايەلىنىڭ ۇيىنە كوشىپ كەلەدى، ال مۇلىكتى وتباسىنىڭ كەنجە قىزى مۇراعا الادى. نەكە جانە اجىراسۋ ءوزارا كەلىسىممەن، وتە وڭاي شەشىلەدى. اجىراسقان جاعدايدا ەر ادام اناسىنىڭ ۇيىنە قايتادى.

موسو

قىتايدا تۇراتىن بۇل حالىقتى ماتريارحات دەپ تە سيپاتتايدى. بالانىڭ اۋلەتتىك ۇرپاعى انا تەگى ارقىلى تارايدى. موسونىڭ سوزىندە «اكە» جانە «قىزعانىش» سوزدەرى قولدانىلمايدى. زەرتتەۋ ايەلدەردىڭ فيزيكالىق تۇرعىدان ەرلەرگە قاراعاندا كۇشتى ەكەنىن كورسەتكەن.

كەيبىر مالىمەتتەردە موسو ەركەكتەرىنىڭ مىندەتى جوق، ولار كۇنى بويى دەمالادى. ءبىراق بۇل مۇلدەم دۇرىس ەمەس. ولار مال جايىپ، بالىق اۋلاۋعا بارادى، جەر جىرتادى، ءتىپتى ناماز وقىپ، قۇرباندىق شالۋ راسىمدەرىنە قاتىسادى.

حينالۋقتار

حينالۋقتار ءازىربايجاننىڭ بيىك تاۋلارىندا ءومىر سۇرەدى. بۇل ەتنوس وكىلدەرى نەگىزىنەن تەڭىز دەڭگەيىنەن 2000 مەتردەن استام بيىكتىكتەگى حينالۋق اۋىلىندا تۇرادى. ولار نۇحتىڭ كەمەسى توپان سۋدان كەيىن ءدال وسى جەرگە توقتادى دەگەن اڭىزعا سەنەدى جانە وزدەرىن نۇحتىڭ تىكەلەي ۇرپاعىمىز دەپ ەسەپتەيدى. اتالمىش تايپا وتە وقشاۋ ءومىر سۇرەدى جانە تەك ءوز تايپالارىنا ۇيلەنۋگە تىرىسادى. ەڭ باستىسى، وزدەرىن الەمدەگى ەڭ باقىتتى ادامدار سانايدى.

اكحا

بۇل ۇلتتىڭ وكىلدەرى تيبەتتىكتەردىڭ تۋىستارى. ولار قىتايدىڭ وڭتۇستىگىندە، لاوستىڭ سولتۇستىگىندە جانە تايلاندتا، ميانمادا جانە ءۇندىستاننىڭ شىعىسىندا تۇرادى. تايپانىڭ ايەلدەرى اشەكەيلى كيىمدى جاقسى كورەدى، باس كيىمگە ەرەكشە نازار اۋدارىلادى. ءاربىر يەسىنىڭ وزىندىك ەرەكشەلىگى بار جانە ونىڭ الەۋمەتتىك جاعدايىن كورسەتەدى.

كۇمىسپەن، مونشاقتارمەن بەزەندىرىلگەن باس كيىمدى قىز جاس ءوسپىرىم كەزىندە الادى جانە سودان بەرى ونى ۇيىقتاپ جاتقاندا دا شەشپەيدى. بىرتە-بىرتە قىزدار وعان زەرگەرلىك بۇيىمداردى قوسادى، ناتيجەسىندە بۇل اشەكەيلى كيىمنىڭ سالماعى بىرنەشە كيلوگرامعا جەتەدى. قازىر ايەلدەر بۇل اكسەسسۋاردى ەرەكشە جاعدايلاردا نەمەسە تۋريستەردىڭ كوڭىل كوتەرۋى ءۇشىن كيەدى، ال ولاردىڭ انالارى مەن اجەلەرى ونى ۇنەمى كيىپ جۇرگەن.

massaget.kz