بوكس كەشى: «قازاق» كانادالىق «جامان بالانى» 9-راۋندتا تىزە بۇكتىردى - فوتو، كەسكىن
ەكى بوكسشى دا ءبىرىنشى راۋندتان باستاپ اشىق بوكستاستى. قانات يسلام قارسىلاسىن بۇيىردەن ۇرىپ ءجۇرىپ، دجەبپەن مازاسىن الدى. حۋكتارى دا دىتتەگەن جەرىنە جەتتى.
الايدا «جامان بالا» دا قاراپ قالعان جوق. قارىمتا شابۋىلدارىن جاساپ، «قازاققا» قىسىم دا جاساپ كوردى. ەكىنشى راۋندتا قانات ءوز شابۋىلدارىن ۇدەتتى. ال ءۇشىنشى راۋندتا شىقشىتتان ۇرعان ءبىر جويقىن سوققىسى كانادالىق بوكسشىنى ەسەڭگىرەتىپ تاستادى. راۋندتىڭ سوڭىندا «قازاق» وڭ قولىمەن ءوز قارسىلاسىن نوكداۋنعا دا ءتۇسىردى.
وسىمەن جەكپە-جەكتى اياقتايمىن دەگەندە گونگ سوعىلدى. سودان برەندون كۋك اۋىر نوكداۋننان ايىعىپ ۇلگەردى. دەگەنمەن، بەسىنشى راۋندتا قانات سول قولىمەن قارسىلاسىن تاعى دا نوكداۋنعا جىبەردى. كانادالىق تاعى ەسىن جيىپ الدى. التىنشى راۋندتان باستاپ برەندون كۋك شيراق قيمىلداي باستادى.
ارا-تۇرا قاناتتى قىسپاققا دا الىپ ءجۇردى. الايدا قانات يسلام ونىڭ قارقىنىن دجەبپەن شەبەر توقتاتا ءبىلدى. ال سەگىزىنشى راۋندتا «جامان بالانى» تاعى دا اۋىر نوكداۋنعا ءتۇسىردى.
وسى جولى دا ونى گونگ قۇتقاردى. كەلەسى راۋندتا قانات يسلام بىردەن ءوز قارسىلاسىن سوققىنىڭ استىنا الدى. برەندون كۋك وعان جاۋاپ بەرە المادى. سول كەزدە تورەشى جەكپە- جەكتى توقتاتۋعا شەشىم قابىلدادى.
وسىلايشا، قانات «قازاق» يسلام تەحنيكالىق نوكاۋتپەن جەڭىسكە جەتتى.
ايتا كەتەيىك، اتالعان جەكپە-جەكتىڭ اندەركارتىندا بىردە-ءبىر رەت جەڭىلىپ كورمەگەن 8 قازاق بوكسشىسى ونەر كورسەتتى. العاشقى جەكپە-جەكتە قازاقستاندىق بوكسشى مەيىرىم نۇرسۇلتانوۆ ءبىر مينۋتتىڭ ىشىندە ءوز قارسىلاسىن نوكاۋتپەن جەڭدى. «نيۋ-يوركتىڭ ۇزدىك پوليتسەيى» ديماش نيازوۆ ەلىرگەن قارسىلاسىن ساباسىنا ءتۇسىردى. قازاقتىڭ جاس نوكاۋتەرى ايدوس ەربوسىن ۇلى دا كەزەكتى جەڭىسىنە جەتتى. ال ءالي احمەدوۆ ءوز قارسىلاسىن تەحنيكالىق نوكاۋتپەن جەڭدى.
نۇرسۇلتان جاڭابايەۆ تا ءوز ۋادەسىن ورىنداپ شىقتى. اسا اۋىر سالماقتا رۋسلان مىرساتايەۆ ءتورتىنشى جەڭىسىنە قول جەتكىزدى. جانىبەك ءالىمحان ۇلى بولسا، كاسىبي بوكستاعى ەكىنشى جەڭىسىنە جەتتى. جانقوش تۇراروۆ تا ءوز قارسىلاسىن ايقىن باسىمدىقپەن جەڭدى.
اۆتور: ارمان اسقاروۆ
