قىزىلوردادا ەستۋ قابىلەتى ەرەكشە 98 جاستاعى مايدانگەر تۇرادى

قارت مايدانگەر جاڭاقورعان وڭىرىندەگى قاراپايىم وتباسىنىڭ شاڭىراعىندا دۇنيەگە كەلدى. جاستايىنان ءومىردىڭ اۋىر تاۋقىمەتىن تارتتى. اشارشىلىق جىلدارىندا اتا-اناسىنان كوز جازىپ قالدى. قارىنداسى ەكەۋى بالالار ۇيىندە تاربيەلەندى. ەسەيگەن شاعىندا تاشكەنت تەمىرجول تەحنيكۋمىنا وقۋعا قابىلداندى. سول جىلداردا كوپتەگەن قيىندىقتاردى باستان كەشتى. كيەرگە كيىم، ىشەرگە تاماق بولماعان ساتتەر دە كەزدەستى.

1941-جىلى قاراشا ايىندا سوعىس دالاسىنا اتتانعاندا 20 جاسقا ەندى كەلگەن ەدى. مايدانعا بارعان ساتتەن 99№ كاۆالەريالىق پولك ساپىندا پۋلەمەتشى بولدى. ارتيللەريا قۇرامىندا كوپتەگەن شايقاستارعا قاتىستى. «ەرلىگى ءۇشىن» مەدالىن، ءۇشىنشى دارەجەلى «داڭق»، ەكىنشى دارەجەلى «وتان سوعىسى» وردەندەرىن كەۋدەسىنە تاقتى. 1945-جىلدىڭ اقپان ايىنان باستاپ دنەستر، تيراسپول، رۋمىنيا جەرلەرىن فاشيستىك باسقىنشىلاردان بوساتتى. سونداي-اق، «زا ۆزياتيا بۋداپەشتا» مەدالى دە بۇگىندە كەۋدەسىندە جارقىرايدى.

1947-جىلى ەلگە ورالعاننان كەيىن ەڭبەك جولىن باستاپ باس ەسەپشى قىزمەتىن اتقاردى. سوندىقتان شىعار، بۇگىنگى كۇنگە دەيىن ەسەپ پەن سانعا قاتىستى مالىمەتتەردى جاتقا ايتادى. ءتىپتى، ۇل-قىزىنىڭ، نەمەرە-شوبەرەلەرىنىڭ تۋعان كۇندەرىن ارنايى بلوكنوتقا جازىپ قويعان. كۇندەلىكتى شىعاتىن گازەت-جۋرنالداردى قالت جىبەرمەيدى.

«مەن بۋحگالتەرلىك كۋرستى ءتامامداپ، ەڭبەك جولىمدى باستادىم. بۇل ماماندىق قاشاندا جاۋاپكەرشىلىكتى قاجەت ەتەدى ەمەس پە؟ سوندىقتان ەسەپ، سانعا قاتىستى دەرەكتەردى ۇمىتپاۋعا تىرىستىم. بۇگىنگى كۇنگە دەيىن وعان ۇلكەن جاۋاپكەرشىلىكپەن قارايمىن»، - دەيدى ارداگەر يبراگيم نۇرىمبەتوۆ.

اعامىز 1950-جىلى ومىرلىك جارى - نالشايىممەن وتاۋ كوتەردى. قىرىق جىلدان استام تاتۋ-ءتاتتى عۇمىر كەشكەن ول كىسىلەر ەكى ۇل، ءۇش قىز ءسۇيىپ، ولاردى تاربيەلەپ ءوسىردى. بۇگىندە بالالارىنان 20 نەمەرە، 27 شوبەرەسى كورىپ وتىر.

جەڭىس مەرەكەسىنە وراي قارت مايدانگەرگە جەرگىلىكتى باسشىلىق تاراپىنان قۇرمەت كورسەتىلدى.  قىزىلوردا قالاسىنىڭ اكىمى نۇرلىبەك نالىبايەۆ مايدانگەر يبراگيم نۇرىمبەتوۆكە ارنايى بارىپ، جەرگىلىكتى جۇرتشىلىق اتىنان قۇتتىقتاۋ لەبىزىن ءبىلدىردى. سىي-سياپات تابىستادى.