الماتىلىق دارىگەرلەر وكپەسىنىڭ 96 پايىزى زاقىمدانعان زەينەتكەردى امان الىپ قالدى
ناۋقاس كوروناۆيرۋس جۇقتىرىپ، اۋىر جاعدايدا ەكىجاقتى پنيەۆمونيامەن اۋرۋحاناعا تۇسكەن. بۇل تۋرالى قالالىق ورتالىق اۋرۋحانانىڭ باسپا ءسوز قىزمەتى ءمالىم ەتتى، دەپ حابارلايدى قازاقپارات ءتىلشىسى.
ۆەدومستۆو مالىمەتىنشە، 67 جاستاعى ايەل الماتىنىڭ ورتالىق قالالىق كلينيكالىق اۋرۋحاناسىنا 22 -ناۋرىز كۇنى اۋىر حالدە تۇسكەن. ك ت تەكسەرۋ كەزىندە وكپەنىڭ ەكىجاقتى پوليسەگمەنتتىك زاقىمدانۋىن كورسەتتى. سونىمەن قاتار، وكپەنىڭ 96 پايىزى قابىنعانى انىقتالدى. ناۋقاس دەرەۋ جانساقتاۋ بولىمىنە جاتقىزىلدى. اۋرۋحانا رەانيماتولوگتارى سەگىز كۇن دەگەن دە ونى اۋىر جاعدايدان الىپ شىقتى. ەمدەۋ كەزىندە ماماندار وتتەگىمەن قامتاماسىز ەتىلگەن مەديتسينالىق قۇرالداردى قولداندى. تەك دارىگەرلەردىڭ كاسىبي ارەكەتتەرىنىڭ ارقاسىندا ايەلدىڭ بەتى بەرى قارادى.
«ەمدەۋ شارالارى سوزىلمالى وزگە دە اۋرۋلار بولعاندىقتان قيىن بولدى. ناۋقاستا ارتەريالىق گيپەرتونيا، جۇرەك- قان تامىرلارى جەتكىلىكسىزدىگى، يشەميالىق كارديوميوپاتيا بولعان. بۇگىن ناۋقاس اۋرۋحانادان تولىق جازىلىپ ۇيىنە شىقتى. قازىر دەنساۋلىق جاعداي جاقسى. ەندى امبۋلاتوريالىق جاعدايدا جەرگىلىكتى دارىگەردىڭ باقىلاۋىندا بولادى، قاجەت بولعان جاعدايدا ول وڭالتۋ كۋرسىنان وتەدى»، - دەيدى ەمدەۋشى دارىگەر يحتيار بايجانوۆ.
الماتىلىق ايەل دارىگەرلەرگە العىس ايتتى. «بار قيىندىق ارتتا قالدى. مەن دارىگەرلەرگە، مەدبيكەلەرگە جانە سانيتار قىزمەتكەرلەرگە وتە ريزامىن. ولار مەنى امان الىپ قالدى. ماعان ەكىنشى ءومىر سىيلاعاندارى ءۇشىن ۇلكەن راقمەت»، - دەدى ول.
اۆتور: الما مۇقانوۆا
