قىتايلىق ستۋدەنت قىز قاراۋسىز قالعان 93 جاستاعى اجەسىن ءوزىنىڭ جاتاقحاناسىنا كوشىرىپ العان - فوتو
كوللەدج ستۋدەنتى ءوزىنىڭ 93 جاستاعى اجەسىن ءوزى ءبىلىم الاتىن وقۋ ورنىنىڭ جاتاقحاناسىنا كوشىرىپ العان.
سەبەبى ليۋدىڭ اجەسىنە قارايتىن باسقا جان جوق. ءوتىپ بارا جاتقان جىل ونىڭ وتباسىنا ورنى تولماس قايعى الىپ كەلدى. ناۋرىز ايىندا ءليۋدىڭ اجەسى اياعىن سىندىرىپ السا، ءساۋىر ايىندا اكەسى اۋىر ناۋقاستان كوز جۇمدى. ال بولعان وقيعالاردان كۇيزەلىسكە تۇسكەن ءليۋدىڭ اناسى اقىرىندا پسيحيكالىق اۋىتقۋشىلىققا شالدىقتى، دەپ جازدى SHANGHAIIST.
اناسى اجەسىن كۇتىپ- باپتاۋعا قاۋقارسىز بولعاندىقتان، ليۋ اجەسىن ءوزى وقيتىن ءبىلىم ورداسىنىڭ جاتاقحاناسىنا كوشىرىپ الدى.
«مەنى اجەم اياققا تۇرعىزدى، ال ەندى مەنىڭ كەزەگىم. باسقا امالىم جوق. ويتكەنى وعان قارايتىن وزگە جان جوق»، - دەپ اتاپ ءوتتى ليۋ. ونىڭ ايتۋىنشا، اجەسىنىڭ ءۇش بىردەي ۇلى قايتىس بولعان.
جالدامالى بولمەدە ەكى توسەك، كيىم سورەسى، جازۋ ۇستەلى بار. مۇنداي بولمەنى جالعا الۋ قۇنى ايىنا 600 يۋاندى قۇرايدى. ليۋدىڭ ءىنىسى دە وسى قالادا جۇمىس ىستەيدى. ايىنا 2000 يۋان جالاقى الاتىن ول تابىسىنىڭ جارتىسىنان كوپ بولىگىن ليۋ مەن اجەسىنە بەرەدى.
اجەسىنە تاڭعى اس ازىرلەپ بەرۋ ءۇشىن ليۋ كۇن سايىن تاڭعى ساعات 7.30-دا ۇيقىدان تۇرادى. اجەسىنەن بولەك تۇرعان كەزدە ول بۇل ۋاقىتتان جارتى ساعات كەيىن وياناتىن. تاڭەرتەڭگى ساباقتار اياقتالا سالىسىمەن- اق اجەسىنە تۇسكى اسىن بەرۋ ءۇشىن ليۋ ۇيىنە قاراي اسىعادى. از- ماز تىستەرى قالعان اجەسىنە ول جەڭىل تاعامدار ازىرلەۋگە تىرىسادى.
«اجەم سوسيسكا مەن زەفيردى ءسۇيسىنىپ جەيدى»، - دەيدى ليۋ.
ليۋ ءوزى وقۋعا كەتكەن كەزدە اجەسى زەرىكپەس ءۇشىن جەكە كومپيۋتەرىنە سوعىس تۋرالى ءتۇرلى فيلمدەر جازىپ قويعان. ودان بولەك، اجەسىن جالعىزسىراتپاۋ ءۇشىن دانگ- دانگ ەسىمدى مىسىق ساتىپ العان.
كۇن جىلى كەزدە ليۋ اجەسىن سەرۋەنگە الىپ شىعادى.
كوپ ۋاقىتى مەن ەنەرگياسىن اجەسىنە جۇمسايتىن ليۋ ەشتەڭەگە قاراماستان وقۋ ۇزدىكتەرى قاتارىنان تابىلىپ ءجۇر.
«ليۋ - ءبىزدىڭ ۇزدىك ستۋدەنتىمىز. وقۋ بارىسىندا ۇنەمى بەلسەندىلىك تانىتادى، مۇعالىمدەرگە قولعابىس ەتەدى»، - دەيدى ۇستازى جاڭ نا.
ليۋدىڭ حيكاياسىن وتانداستارىن بەي- جاي قالدىرمادى. كومەك قولىن سوزىپ، اقشا ۇسىنعان جاندار دا تابىلعان. دەگەنمەن ليۋ ولاردىڭ بەتىن كەرى قايتارعان.
«ءىنىم جۇمىس ىستەپ، اجەم ەكەۋمىزگە قولعابىس ەتەدى. ءوزىم دە وقۋ ورنىمدا جارتىلاي جۇمىس ىستەيمىن. ءبىزدىڭ قولىمىزدان كەلەدى، باسقالاردان كومەك سۇراماۋىمىز قاجەت»، - دەيدى ليۋ.
Chinese Weibo جەلىسىنىڭ قولدانۋشىلارى ليۋدىڭ اجەسىنە دەگەن ادالدىعىنا، ماحابباتىنا قايران قالدى. ولاردىڭ ءبىرى:
«ليۋ ءوز ارمانىنا قول جەتكىزەدى دەپ ۇمىتتەنەمىن. اجەسى بار ادامدار ۇلگى السا دەيمىن. «قاريا وتباسىنىڭ قازىناسى» دەمەي مە؟ ليۋعا جانە ونىڭ اجەسىنە ەڭ ىزگى تىلەكتەرىمدى جولدايمىن»، - دەپ پىكىر بىلدىرگەن.
