تۇركىستاندا قاپتاپ كەتكەن اسا قاۋىپتى شەگىرتكە 90 مىڭ گەكتار القاپتى ءبۇلدىردى
بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە ق ر ا ش م اگروونەركاسىپ كەشەنىندەگى مەملەكەتتىك ينسپەكسيا كوميتەتىنىڭ تۇركىستان وبلىستىق اۋماقتىق ينسپەكسياسىنىڭ باسشىسى يبراگيم بەگاسيلوۆ مالىمدەدى، دەپ حابارلايدى قازاقپارات ءتىلشىسى.
سپيكەردىڭ سوزىنشە، وڭىردە شەگىرتكەگە قارسى كۇرەس شارالارى جوسپارعا ساي اتقارىلىپ جاتىر.
بۇل رەتتە ءبىر كۇندە 3500-4000 گەكتار القاپتا حيميالىق وڭدەۋ جۇمىسى جۇرگىزىلىپ جاتىر.
وعان 26 جەرۇستى بۇرىككىش تەحنيكاسى مەن 1 ان-2 جەڭىل ۇشاعى جۇمىلدىرىلعان.
«تۇركىستان وبلىسىندا اسا قاۋىپتى ماروككو شەگىرتكەسىنە قارسى جۇرگىزىلەتىن حيميالىق وڭدەۋ جۇمىسى 8-ءساۋىر كۇنى باستالدى. جوسپارلانعان 705000 گەكتار القاپتىڭ 570000 گەكتارىندا زەرتتەۋ، انىقتاۋ جۇمىسى جۇرگىزىلدى. ماروككو شەگىرتكەسىنىڭ قونىستانعان اۋماعى 90 مىڭ گەكتاردى قۇراپ وتىر. ونىڭ 48000 گەكتارىندا ەكونوميكالىق زياندى شەگىنەن اسقانى انىقتالىپ، 41000 گەكتار القاپقا حيميالىق وڭدەۋ جۇمىستارى جۇرگىزىلدى»، - دەدى يبراگيم بەگاسيلوۆ.
بيىل اسا قاۋىپتى ءۇيىرلى شەگىرتكەلەرگە قارسى حيميالىق وڭدەۋ جۇمىستارى مەن فيتوسانيتاريالىق ءىس-شارالار 10 اۋداننىڭ 53 اۋىلدىق وكرۋگىندە جۇرگىزىلىپ جاتىر.
وبلىس بويىنشا ماروككو شەگىرتكەسى كوپ تاراعان ايماقتار رەتىندە بەلگىلەنگەن سارىاعاش اۋدانىندا 24000 گەكتار، ارىس قالاسىندا 11000 گەكتار وڭدەلگەن.
وڭىردەگى شەگىرتكەگە قارسى كۇرەس جۇمىستارىن تولىقتاي اياقتاۋعا ءالى 10 كۇندەي ۋاقىت بار. بۇل رەتتە شەگىرتكەگە قارسى كۇرەس كۇشەيتىلگەن.
الداعى ۋاقىتتا ماروككو شەگىرتكەسىنە قارسى بارلىعى 67290 گەكتار القاپتا، ونىڭ ىشىندە 59050 گەكتار جەرۇستى جەلدەتكىش بۇرىككىش تەحنيكامەن، 8240 گەكتار اۋەمەن حيميالىق وڭدەۋ جۇمىسى جۇرگىزىلمەك.