قازاقستانداعى زەرگەرلىك بۇيىمداردىڭ 90 پايىزى ارزان مەتالدان جاسالعان اشەكەي بولىپ شىقتى
بەلگىلى بولعانداي، ءتىپتى سىناق ناتيجەلەرىنە دە سەنۋگە بولمايدى. سەبەبى، ساتۋشىلاردىڭ كوبى ەلگە التىن جالاتىلعان كۇمىس ساتادى.
قازاقستانداعى زەرگەرلىك بۇيىمداردىڭ 90 پايىزى ارزان مەتالدان جاسالعان اشەكەي بولىپ شىقتى
بۇل تۋرالى ەۋرازيا ءبىرىنشى ارناسىنا سىلتەمە جاساپ، Stan.kz اقپاراتتىق اگەنتتىگى حابارلايدى.
ءجۇز بۇيىمنىڭ ىشىنەن ەڭ جاقسى بىرەۋىن تاڭداپ الساڭىز دا ول جالعان التىن بولۋى مۇمكىن. ساراپشىلاردىڭ اقپاراتىنا سۇيەنسەك، ەلدەگى زەرگەرلىك بۇيىمداردىڭ 90 پايىزى ارزان مەتالدان جاسالعان اشەكەي ەكەن.
«ءبىزدىڭ ەلدىڭ دە، رەسەيدىڭ دە زەرگەرلەرى تۇركيانىڭ بۇيىمدارىمەن باسەكەگە تۇسە المايدى. سەبەبى، ول جاقتان تەك التىن جالاتىلعان ارزان بۇيىمدار عانا جەتكىزىلەدى. ءبىراق، ەشقايسىسى بارىپ ساتىپ العان التىن بۇيىمنىڭ سىناماسىن تەكسەرىپ جاتپايدى»، - دەيدى قازاقستان زەرگەرلەر وداعىنىڭ ءتوراعاسى قايسار جۇماعاليەۆ.
قازىر ەلگە كەلىپ جاتقان باعالى اشەكەيلەر ءبىر قاراعاندا التىن سەكىلدى كورىنگەنىمەن، نەگىزىندە قۇنى كوك تيىن تۇرمايتىن تەمىردەن جاسالعان ارزان بۇيىم.
2017 -جىلى قازاقستانعا زاڭسىز تۇردە ءۇش كەلى، ال بيىل 5 كەلىدەن اسا التىن بۇيىمداردى كىرگىزبەكشى بولعان.
«باسقا ەلدەردە زەرلەرلىك بۇيىمدى زاڭسىز وندىرگەندەر قىلمىستىق جاۋاپكەرشىلىككە تارتىلىپ، زاڭ الدىندا جاۋاپ بەرەدى. تەك ءبىزدىڭ ەلدە عانا وسىنداي قىلمىس جاساعاندار اكىمشىلىك جاۋاپكەرشىلىككە تارتىلادى. ونىڭ وزىندە ول ءۇشىن سالىناتىن ەڭ جوعارى ايىپپۇلدىڭ قۇنى 1 ميلليون تەڭگەنى عانا قۇرايدى»، - دەيدى قايسار جۇماعاليەۆ.
ال، التىن بۇيىمنىڭ جالعان نەمەسە جالعان ەمەس ەكەنىن ءۇي جاعدايىندا دا يودپەن تەكسەرىپ كورۋگە بولادى. ەگەر زەرگەرلىك بۇيىمدا سۇيىقتىڭ ءىزى قالسا، وندا ال شىنىمەن دە باعالى بۇيىم بولماق. سونىمەن قاتار، التىن بۇيىمدا ارنايى تاڭبا بولادى، ياعني بارىستىڭ باسى بەينەلەنىپ، 585 سانى جازىلىپ تۇرۋى كەرەك.
