ەندى 9 جىلدان كەيىن جاسى 60 تان اسقان ازاماتتار سانى ەكى ەسەگە ارتادى
حالىقارالىق قارتتار كۇنى مەرەكەسىنىڭ قارساڭىندا دۇنيەجۇزىلىك دەنساۋلىق ساقتاۋ ۇيىمى الەمنىڭ 57 مەملەكەتىنەن 83 مىڭ ادام قاتىسقان ساۋالنامانىڭ ناتيجەلەرىن جاريا ەتتى.
ساۋالناماعا قاتىسقان رەسپوندەنتتەردىڭ 60 پايىزى ادامداردىڭ جوعارى بۋىن وكىلدەرىنە سىي- قۇرمەت تانىتا بەرمەيتىندىكتەرىن ايتتى. بۇل اسىرەسە حالىقتىڭ ءال-اۋقاتى جاقسى مەملەكەتتەردە ەرەكشە بايقالۋدا.
دۇنيەجۇزىلىك دەنساۋلىق ساقتاۋ ۇيىمىنىڭ وكىلى دوكتور دجون بيرد قارت ادامدارعا قاتىستى قالىپتاسىپ قالعان جاتتاندى ۇعىمدار كەڭ تارالعانىن، الايدا، ول تۋرالى ەلدىڭ بارلىعى كوپ ويلانا بەرمەيتىنىن ايتادى.
بۇگىندە ءناسىلى مەن جىنىسىنا قاتىستى كەمسىتۋشىلىكتى قوعام قابىلدامايدى. ال، جاس ەرەكشەلىگىنە كەلگەندە بۇل ماسەلەدە كوزقاراس قالىپتى. ادامدار بۇل ماسەلەنى سوڭعى ۋاقىتتا ايقىن سەزىنە باستادى. دەگەنمەن، پروبلەمانىڭ قانشىالىقتى اۋقىمدى ەكەندىگىن سەزىنبەيدى.
2025 -جىلى 60 تان اسقان ازاماتتار سانى ەكى ەسەگە ارتادى. ال، عاسىردىڭ ورتاسىنا تامان 2 ميللياردقا جەتەدى. مىنە، سوندىقتان دا دۇنيەجۇزىلىك دەنساۋلىق ساقتاۋ ۇيىمى قارتايۋ پروبلەماسىنا حالىقتىڭ نازارىن اۋدارۋ ماقساتىندا جىل سايىن حالىقارالىق قارتتار كۇنىن اتاپ وتەدى.
