قازاقستاندىقتاردىڭ عالامتوردى پايدالانۋ ۋاقىتى سوڭعى 9 جىل ىشىندە 50 پايىزعا ارتقان
بۇل تۋرالى بۇگىن الماتىدا ءوتىپ جاتقان جىل سايىنعى 8- ءداستۇرلى مەديا قۇرىلتاي بارىسىندا TNS Gallup Media Asia اگەنتتىگىنىڭ باس ديرەكتورى تاتيانا ستارسيەۆا ءمالىم ەتتى.
ونىڭ ايتۋىنشا، قازىرگى تاڭدا نەگىزىنەن قالادا تۇراتىن، جاسى 15 تەن اسقان ازاماتتار كۇنىنە شامامەن 300 مينۋت، ياعني 5 ساعات ۋاقىتىن ءار ءتۇرلى اقپارات قۇرالدارىنا جۇمسايدى.
«بۇل جەردە ارينە، تەلەارنا ءالى دە بولسا باستى بۇقارالىق اقپارات قۇرالى بولىپ سانالادى. وعان قازاقستاندىق ازاماتتار كۇنىنە 5 ساعات ۋاقىتىنىڭ 55 پايىزىن، ياعني 2 ساعاتتان استام ۋاقىتىن جۇمسايدى. ال ينتەرنەتكە جۇمسالاتىن ۋاقىت سوڭعى 9 جىل ىشىندە 50 پايىزعا ارتىپ وتىر. ياعني، بۇگىندە وتانداستارىمىز 5 ساعات ۋاقىتىنىڭ 25 پايىزىن، ياعني ەكى ساعاتقا جۋىق ۋاقىتىن ينتەرنەتتە وتكىزەدى. سايكەسىنشە، 17 پايىز راديو تىڭداۋعا، ال 3 پايىز ۋاقىت گازەت- جۋرنالدار وقۋعا ارنالادى. وكىنىشكە قاراي، ازاماتتار گازەت-جۋرنال، كىتاپ وقۋعا وتە از ۋاقىت بولەتىن بولىپ ءجۇر»، - دەدى ت. ستارسيەۆا.
سونىمەن قاتار ول بيىل جارناما نارىعىندا قارجى اينالىمىنىڭ ءسال دە بولسا باسەڭدەگەنىن جەتكىزدى.
«بىلتىر، 2014 -جىلى قازاقستاندا جارناما نارىعى 37 ميلليارد تەڭگەگە جۋىق سومانى قۇراعان بولاتىن. ال بيىل ول 4 پايىزعا ازايدى. سايكەسىنشە، جارناما بەرۋشىلەردىڭ سانى دا وتكەن جىلمەن سالىستىرعاندا 9 پايىزعا ازايىپ وتىر. قازىر جارناما نارىعىندا شامامەن 3,5 مىڭنان استام جارناما بەرۋشىلەر بار. تاعى ءبىر ايتا كەتەتىن ءجايت، جارناما بيۋدجەتىنىڭ 64-70 پايىزى ادەتتەگىدەي تەلەارنالارعا، 5 پايىزى - عالامتورعا، باسپا سوزگە - 10، راديوعا - 12 پايىزى جۇمسالادى. بۇل جەردە راديو مەن باسپا سوزگە بەرىلەتىن جارناما 17-18 پايىزعا ازايدى. كەرىسىنشە، سىرتقى جارناما قۇرالدارىنا بەرىلەتىن جارناما 7 پايىزعا ءوسىپ وتىر»، - دەدى ت. ستارسيەۆا.
ايتا كەتەلىك، تۇرعىندار نەگىزىنەن تەلەديداردان جاڭالىقتار، فيلمدەر، تەلەحيكايالار، كوڭىل كوتەرەتىن ءار ءتۇرلى قىزىقتى باعدارلامالار كورەتىن بولسا، عالامتوردان نەگىزىنەن اقپارات ىزدەيدى جانە ونى قىزمەتتىك جانە جەكە ماقساتتا حابار الماسۋعا پايدالانادى.
اۆتور: جاپپاربەرگەن ايبوتا
