بالانى باسسەينگە بەرۋدىڭ 8 ارتىقشىلىعى

None
None
نۇر-سۇلتان.قازاقپارات - باسسەيندە جۇيەلى تۇردە جاتتىعۋ بالاعا ءبىراز ارتىقشىلىقتار سىيلايدى.

ول بالانىڭ فيزيكالىق تا، ەموتسيونالدىق تا جاعدايىنا جاعىمدى اسەر ەتەدى. بالا جۇزۋدەن كەيىن ءوزىن سابىرلى سەزىنەدى جانە سەرگەكتىك قۋاتىن الادى.

سۋدا تۇرا الۋ

بالانى سۋدا تۇرۋعا ۇيرەتۋ — جاتتىقتىرۋشىنىڭ نەگىزگى مىندەتى. سودان كەيىن عانا بالا ءجۇزۋ تەحنيكالارىن مەڭگەرەدى. بۇل ەكەۋى دە — بالا كۇتپەگەن جاعدايدا پايدالانا الاتىن ماڭىزدى داعدىلار. زەرتتەۋلەر ءجۇزۋ ساباقتارىنا بارىپ جۇرگەن بالالاردىڭ باسسەينگە جاتتىعۋعا بارمايتىن قۇرداستارىنا قاراعاندا سۋعا باتىپ كەتۋ قاۋپى الدەقايدا تومەن بولاتىنىن دالەلدەگەن. سەبەبى جاتتىققان بالا سۋعا قۇلاپ كەتسە، قورقىپ كەتپەي، وزدىگىنەن شىعا الادى. دەگەنمەن، بالا ءجۇزۋ بىلسە دە، ونى سۋعا قاراۋسىز جىبەرمەڭىز.

جاڭا نەيروندىق بايلانىستاردىڭ ءتۇزىلۋى

بالانى جاڭا تارتىپكە، سونىڭ ىشىندە جۇزۋگە ۇيرەتۋ مي بەلسەندىلىگىن ىنتالاندىرادى. جاڭا نەيروندىق بايلانىستار قالىپتاسادى جانە بالانىڭ دامۋى جىلدامدايدى. بالا باسسەيندە جاتتىققان كەزدە قان اينالىم كۇشەيىپ، نەيروندار وتتەگى مەن ولاردىڭ جۇمىسىنا قاجەتتى قورەكتىك زاتتار الادى.

بۇلشىقەتتەردىڭ قاتايۋى

بالالاردىڭ، سونىڭ ىشىندە كىشكەنتاي بۇلدىرشىندەردىڭ باسسەيندەگى جاتتىعۋىن سىرتتان باقىلاساڭىز، ول جاي سۋمەن ويناپ جاتقان سەكىلدى كورىنۋى مۇمكىن. ءبىراق نەگىزىندە بۇل بۇلشىقەت كورسەتى ىسكە قوسىلاتىن قارقىندى جاتتىعۋ. باسسەيندەگى جاتتىعۋلاردىڭ ارقاسىندا بالا دەنەسىندەگى بۇلشىقەتتەردىڭ%90 ى قاتايادى. ەگەر جاس سپورتشى ءجۇزۋدىڭ ءتۇرلى ءستيلىن مەڭگەرسە، اعزاداعى بارلىق بۇلشىقەت توبى داميدى.

جان- جاقتى دامۋ

باسسەيندە جۇيەلى تۇردە جاتتىعۋ بالانىڭ بارلىق فيزيكالىق قابىلەتتەرىنىڭ دامۋىنا ىقپال ەتەدى. ءجۇزۋ اعزاعا جان- جاقتى اسەر ەتەدى. جاتتىعۋلار بەس نەگىزگى فيزيكالىق قابىلەتپەن جۇمىس ىستەۋگە باعىتتالادى: كۇش، جىلدامدىق، شىدامدىلىق، يىلگىشتىك جانە ەپتىلىك. باسسەيندە ۇيرەنگەن داعدى بالاعا سپورتتىڭ باسقا تۇرلەرىندە دە جەتىلۋىنە كومەكتەسەدى.

جاقسى ۇيىقتاۋ

ءجۇزۋ جاتتىعۋلارى — بالا ۇيقىسىنىڭ ساپاسىن جاقسارتاتىن تۇراقتى اەروبتى جۇكتەمەلەر. سونداي- اق، باسسەيندە جاتتىعۋ كۇندىزگى ۇيقىشىلدىقتان ارىلتادى. ءجۇزۋدى بالا كەستەسىنە قوسساڭىز، ول كەشكە تەز ۇيىقتاپ كەتىپ، تاڭەرتەڭ سەرگەك ويانادى.

كۇيزەلىستەن ارىلتۋ

سۋ بالا پسيحيكاسىنا جاعىمدى اسەر ەتەدى جانە كۇيزەلىستەن ارىلتۋعا كومەكتەسەدى. ءجۇزۋ جاتتىعۋلارىنىڭ ارقاسىندا بالا اعزاسىندا ەندورفيندەر بولىنەدى: ولار كۇيزەلىسپەن جانە ناشار كوڭىل كۇيمەن كۇرەسەدى. سۋداعى جاتتىعۋلار جالپى پسيحيكالىق دەنساۋلىقتى جاقسارتادى.

جۇرەك ساۋلىعى

ءجۇزۋ جۇرەك- قان تامىرلار جۇيەسىنىڭ جۇمىسىنا جاعىمدى اسەر ەتەدى. ول بالا جۇرەگىنە جىلدام دامۋعا جانە كولەمدى ساپالىراق جيناۋعا كومەكتەسەدى. دەنە تەمپەراتۋراسىنان تومەن تەمپەراتۋراداعى سۋعا كىرگەن كەزدە قان قىسىمى تۇسەدى. جۇزۋمەن ۇزاق اينالىسسا، ول تامىر سوعۋىنىڭ ازايۋىنا ىقپال ەتەدى: جاتتىققان جۇرەك بۇلشىقەتى از مولشەرلى جيىرىلۋدا ءوز قىزمەتىن ءتيىمدى ورىندايدى. ءجۇزۋ — كەرەمەت كارديو- جاتتىعۋ. بۇل سپورت تۇرىندە زاقىم الۋ قاۋپى وتە تومەن.

سالاۋاتتى ءومىر سالتى

بالا كىشكەنتايىنان ءجۇزۋدى ۇيرەنسە، وعان سالاۋاتتى ءومىر سالتىن ۇستانۋ وڭاي بولادى. ول ءجۇزۋ جاتتىعۋلارى ارقىلى سالماعىن باقىلاۋدا ۇستاي الادى، دەنە ءپىشىنىن جاقسى فورمادا ساقتايدى نەمەسە ونى كۇيزەلىستى ءتۇسىرىپ، بوساڭسۋعا پايدالانا الادى. وعان قوسا، باسسەيندە بالا قىزىعۋشىلىعى بىردەي جاڭا دوستار تابادى.

https://massaget.kz

سوڭعى جاڭالىقتار