شاڭدى داۋىل، اپتاپ، جاڭبىر: 8-تامىزدا اۋا رايى قۇبىلمالى بولادى
الداعى ءۇش كۇنگى اۋا رايى بولجامى سولتۇستىك-باتىس تسيكلونى رەسپۋبليكانىڭ باسىم بولىگىندە اۋا رايىنىڭ تۇراقسىز سيپاتىنا سەبەپشى بولادى. كەي جەرلەردە جاڭبىر جاۋادى، نايزاعاي وينايدى. سولتۇستىك جانە سولتۇستىك- شىعىستا قاتتى جاڭبىر، بۇرشاق جاۋادى، داۋىل بولادى.
باتىس جانە وڭتۇستىك- باتىس وڭىرلەرگە انتيتسيكلون اۋىسادى، سونىڭ اسەرىنەن جاۋىن- شاشىن جاۋمايدى.
رەسپۋبليكا بويىنشا كەي جەرلەردە جەل كۇشەيەدى، وڭتۇستىكتە شاڭدى داۋىل سوعادى. اقمولا، پاۆلودار، قاراعاندى وبلىستارىنىڭ كەي جەرلەرىندە نايزاعاي، بۇرشاق، داۋىل كۇتىلەدى.
جەل ەكپىنى - 15-20 م/س.
قاراعاندى وبلىسىندا جەل قارقىنى 25 م/س دەيىن كۇشەيەدى. كۇندىز جامبىل وبلىسىنىڭ تاۋلى ايماقتارىندا نايزاعاي جارقىلدايدى، بۇرشاق جاۋادى. كەي جەرلەردە جەل جىلدامدىعى 15-20 م/س جەتەدى، شاڭدى داۋىل تۇرادى.
تۇركىستان، باتىس قازاقستان، قوستاناي، كۇندىز قىزىلوردا وبلىستارىنىڭ كەي جەرلەرىندە جەل ەكپىنى - 15-20 م/س. قىزىلوردا، تۇركىستان وبلىستارىنىڭ كەي جەرلەرىندە شاڭدى داۋىل كۇتىلەدى.
شىعىس قازاقستان وبلىسىندا كۇندىز كەي جەرلەردە نايزاعاي كۇتىلەدى، جەلدىڭ كۇشى 15-20 م/س جەتەدى. سولتۇستىك قازاقستان وبلىسىنىڭ كەي جەرلەرىندە نايزاعاي وينايدى، تۇندە جانە تاڭەرتەڭ كەي جەرلەردە تۇمان تۇسەدى.
الماتى وبلىسىنىڭ تاۋلى اۋداندارىندا كۇن كۇركىرەيدى. كۇندىز اتىراۋ وبلىسىنىڭ كەي جەرلەرىندە اپتاپ ىستىق بولادى.
كۇندىز ماڭعىستاۋ، باتىس قازاقستان، جامبىل، قىزىلوردا، تۇركىستان وبلىستارىنىڭ باسىم بولىگىندە، قاراعاندى وبلىسىنىڭ كەي جەرلەرىندە، اقتوبە وبلىسىنىڭ وڭتۇستىگىندە قاتتى ىستىق ساقتالادى، ماڭعىستاۋ، باتىس قازاقستان وبلىستارىنىڭ وڭتۇستىگىندە وتە قاتتى ىستىق ساقتالادى.
قىزىلوردا، تۇركىستان، ماڭعىستاۋ، اتىراۋ، جامبىل، اقتوبە وبلىستارىنىڭ باسىم بولىگىندە، قاراعاندى، الماتى، باتىس قازاقستان وبلىستارىنىڭ كەي جەرلەرىندە، قوستاناي، شىعىس قازاقستان وبلىستارىنىڭ وڭتۇستىگىندە، اقمولا وبلىسىنىڭ جەكەلەگەن اۋداندارىندا توتەنشە ءورت قاۋپى ساقتالادى.