س ق و: 8 جىل توقتاپ تۇرعان «بيوحيم» زاۋىتى قايتا ىسكە قوسىلادى

پەتروپاۆل. قازاقپارات - سولتۇستىك قازاقستان وبلىسىندا 3 جىل ىشىندە ونەركاسىپتىك ءوندىرىس كولەمىن 100 ميلليارد تەڭگەگە ارتتىرۋ جوسپارلانعان، دەپ حابارلايدى قازاقپارات ءتىلشىسى.

ءوڭىردىڭ ونەركاسىپ سالاسىندا كۇردەلى جاعداي تۋىندادى. ءبىر جاعىنان تۇراقتى دامۋ بار. ياعني، 7 اي ىشىندە ونەركاسىپتەگى دەڭگەيى 3 پايىزعا ارتقان. ەكىنشى جاعىنان 4 ءىرى ماشينا جاساۋ زاۋىتىندا ءوندىرىس كولەمىنىڭ ۇشتەن ءبىر بولىگى ازايعان.

«وتكەن جىلى ۇكىمەت الدىندا كيروۆ جانە پەتروپاۆل اۋىر ماشينا جاساۋ زاۋىتتارىن 6,7 ميلليارد تەڭگەگە تەحنولوگيالىق جاڭعىرتۋ جونىندە ماسەلەنى العا تارتقانىمدى ايتقانمىن. ماسەلە شەشىلدى. اقشا ءبولىندى. العاشقى 3,3 ميلليارد تەڭگە زاۋىتتارعا بيىل تۇسەتىن بولادى. بۇل جاڭا ستانوكتار الۋعا مۇمكىندىك جاسايدى»، - دەدى سولتۇستىك قازاقستان وبلىسىنىڭ اكىمى قۇمار اقساقالوۆ.

ءوڭىر باسشىسىنىڭ ايتۋىنشا، ءوندىرىس سالاسىندا ءبىرقاتار جوبالار جۇزەگە اسادى. سونداي- اق، ترانسفورماتورلىق، ۆاگون جاسايتىن زاۋىتتار، اعاش وڭدەۋ بويىنشا كاسىپورىندار اشىلادى.

قىركۇيەكتىڭ ورتاسىندا تايىنشا اۋدانىنداعى 8 جىل جۇمىس جاساماي تۇرىپ قالعان «بيوحيم» زاۋىتى قايتا ىسكە قوسىلادى. بيىل ونەركاسىپتەر ءۇشىن كراحمال مەن گليۋتەن الىنادى.

«جاڭا ينۆەستور 5 ميلليارد تەڭگە قۇيدى. زاۋىتتىڭ 8 جىل ىشىندە تۇك قالماعان. شوشقا فەرماسى مەن مۇلدە ىسكە قوسىلماعان ەت كومبيناتى جۇمىس جاساماي تۇرىپ قالعان. رەسەي مەن گەرمانيادان شوشقالاردىڭ ءبىرىنشى پارتياسىن جەتكىزدىك. ازىرگە 2 مىڭ باسى بار. كەلەسى جىلى فەرما تولىپ، ەت كومبيناتى ىسكە قوسىلادى»، - دەدى ق. اقساقالوۆ.

جەرگىلىكتى بيلىك وكىلدەرىنىڭ باعامداۋىنشا، بارلىق كاسىپورىنداردىڭ جۇمىسى 2022 - جىلعا قاراي ونەركاسىپ سالاسىنداعى ءوندىرىس كولەمىن 240 ميلليارد تەڭگەدەن 350-گە دەيىن كوتەرۋگە مۇمكىندىك بەرەدى.

فوتو: www.graintek.ru