الماتى سوتى قىرعىز دەپۋتاتىن قاماۋ مەرزىمىن 8 ايعا سوزدى
بۇل تۋرالى قازاقپارات تىلشىسىنە قالالىق سوتتىڭ باسپا ءسوز حاتشىسى حابارلادى.
باسپا ءسوز حاتشىسى دياس ماحامبەتوۆتىڭ ايتۋىنشا، داميربەك اسىلبەك ۇلىنىڭ قاماۋدا ۇستاۋ مەرزىمىن تاعى ەكى ايعا ۇزارتۋ تۋرالى ءوتىنىش تەرگەۋ كوميتەتىنەن تۇسكەن.
«تەرگەۋ كوميتەتى داميربەك اسىلبەك ۇلىن بۇلتارتپاۋ شاراسىن قىلمىستىق ءىس ماتەريالدارىمەن تانىسۋ كەزەڭىندە 15- تامىزعا دەيىن ۇزارتۋ تۋرالى ءوتىنىش ءتۇسىردى. سوت بۇل ءوتىنىشتى قاناعاتتاندىرۋ تۋرالى شەشىم قابىلدادى. كۇدىكتىنى بۇلتارتپاۋ شاراسى 15- قازانعا دەيىن ۇزارتىلدى. قاۋلى 9- تامىزدا شىعارىلدى»، - دەدى دياس ماحامبەتوۆ.
ەسكە سالايىق، اعىمداعى جىلدىڭ اقپان ايىندا وڭتۇستىكتەگى 3 وبلىس پەن الماتى قالاسىندا جۇرگىزىلگەن ارنايى وپەراتسيا بارىسىندا 35 ادام ۇستالدى. ولاردىڭ اراسىندا كەدەن ورگانىنىڭ، شەكارا قىزمەتىنىڭ لاۋازىمدى تۇلعالارى، بروكەرلەر، دەلدالدار، سونداي-اق ۇيىمداسقان قىلمىستىق توپ مۇشەلەرى بار. اراسىنداعى ۇشەۋى قىرعىزستان ازاماتى. ونىڭ ءبىرى - قىرعىزستاننىڭ جوگوركۋ كەنەشىنىڭ دەپۋتاتى داميربەك اسىلبەك.
