09:11, 15 - مامىر 2017 | GMT +5
وليمپيادانىڭ 8 دۇركىن چەمپيونى ۋسەين بولت قازا بولعان دوسىنا ءوزى بارىپ، قابىر قازىپ بەردى - فوتو، كەسكىن
استانا. قازاقپارات - وليمپيادانىڭ سەگىز دۇركىن چەمپيونى ۋسەين بولت جاقىن دوسى - بيىككە سەكىرۋدەن بەيجىڭ وليمپياداسىنىڭ كۇمىس جۇلدەگەرى دجەرمەين مەيسونعا قابىر قازىپ بەردى. اسەرلى وقيعانىڭ ۆيدەوسىن Twitter قولدانۋشىلارىنىڭ ءبىرى جاريالادى.
«ايگىلى اتلەت پورتلاندتا (يامايكا) ءۇش اپتا بۇرىن قازا تاپقان دوسىنا قابىر قازىپ جاتىر»، - دەلىنگەن ۆيدەونىڭ سيپاتتاماسىندا.
ايتا كەتەيىك، دجەرمەين مەيسون 20 -ساۋىردە كينگستوندا (يامايكا) موتوتسيكلمەن كەلە جاتىپ، جول اپاتىنا تۇسكەن. سپورتشى اۋەجايعا بارا جاتقان جولدا قاۋىپسىزدىك شلەمىن كيمەگەن. ول موتوسيكلدەن قۇلاپ، اۋىر جاراقات الىپ، كەيىن قازا بولعان.
مەيسون - يامايكا تۋماسى. 2006 -جىلى ول ۇلى بريتانيا ازاماتتىعىن الىپ، سودان بەرى وسى ەلدىڭ اتىنان ونەر كورسەتىپ جۇرگەن. اتلەت ۋسەين بولتپەن 2002 -جىلدان بەرى دوس. دجەرمەين Instagram جەلىسىندەگى پاراقشاسىندا بىرگە تۇسكەن سۋرەتتەرىن دە جاريالاعان. مەيسونمەن قوشتاسۋ ءراسىمى يامايكادا 21 -مامىردا وتەدى.
