بۇگىن 8-قىسقى ازيا ويىندارى اياسىندا قازاقستان تۋىن كوتەرۋ ءراسىمى وتەدى

استانا. قازاقپارات - بۇگىن جاپونيانىڭ ساپپورو قالاسىندا Ⅷ قىسقى ازيا ويىندارى اياسىندا قازاقستان رەسپۋبليكاسىنىڭ تۋىن كوتەرۋ ءراسىمى وتەدى، دەپ حابارلادى قازاقپارات ءتىلشىسى.

قازاقستاننىڭ كوك بايراعىن كوتەرۋ ءراسىمى بۇگىن جەرگىلىكتى ۋاقىت بويىنشا ساعات 10:00-دە اتلەتيكالىق قالاشىقتا وتەدى.
ال ازيادا ويىندارىنىڭ اشىلۋ سالتاناتى 19 -اقپان كۇنى كەشكى ساعات 16:00-دە باستالادى. سپورتشىلار شەرۋىندە ق ر تۋىن شاڭعى جارىسىنان بەس دۇركىن ەل چەمپيونى ەلدوس احماديەۆ ۇستاپ شىعادى.

ەستەرىڭىزگە سالا كەتەيىك، VIII قىسقى ازيدا ويىندارى جاپونيانىڭ ساپپورو قالاسىندا 19-26 اقپان ارالىعىندا وتەدى. وعان 31 ەلدەن كەلگەن سپورتشىلار 11 سپورت ءتۇرى بويىنشا 64 مەدال جيىنتىعىن ساراپقا سالادى. بايراقتى دودادا قازاقستان نامىسىن قورعاۋعا 153 سپورتشى اتتاندى. ولاردىڭ اراسىندا حالىقارالىق دەڭگەيدەگى ءتۇرلى جارىستاردا جەڭىمپاز بولعان مانەرلەپ سىرعاناۋشىلار دەنيس تەن، ەليزابەت تۇرسىنبايەۆا، كونكيشىلەر رومان كرەچ، دەنيس كۋزين، ەكاتەرينا ايدوۆا جانە شاڭعىشى نيكولاي چەبوتكو بار. جارىستىڭ جابىلۋ ءراسىمى 26 -اقپان كۇنى كەشكى ساعات 18:00-دە وتەدى دەپ جوسپارلانعان.