قاراسورانىڭ تامىرى 8 مەتر تەرەڭدىككە دەيىن كەتەتىندىكتەن ونى جويىپ جىبەرۋ ازىرگە مۇمكىن بولماي وتىر - ا. المەتوۆ
بۇل تۋرالى الماتىدا «كوكنار-2015» رەسپۋبليكالىق جەدەل- الدىن الۋ وپەراتسياسىن قورىتىندىلاۋ بويىنشا وتكەن وتىرىستا جامبىل وبلىستىق ءى ءى د اۋدانارالىق ەسىرتكى بيزنەسىنە قارسى كۇرەس ءبولىمىنىڭ باستىعى، پوليتسيا مايورى اسحات المەتوۆ ءمالىم ەتتى.
«شۋ القابىندا وسەتىن قاراسورانى جويۋ ءۇشىن ءبىز نە ىستەمەدىك؟! نەشە ءتۇرلى ءادىس قولداندىق. ونى ورتەپ تە تاستادىق، ءتىپتى دارىمەن دە ۋلادىق. ءبارى بەكەر. ونىڭ تامىرى 7-8 مەتر تەرەڭدىككە كەتەتىندىكتەن، كەلەسى جىلى جەردىڭ تەرەڭ قاباتىنان ءنار الىپ، قايتادان جايقالىپ ءوسىپ تۇرادى. سوندىقتان، قازىر قاراسورانىڭ زاڭسىز اينالىمعا ءوتىپ كەتپەۋىنە «كوكنار» وپەراتسياسى ءتيىمدى توسقاۋىل بولىپ جاتىر.
بيىل بۇل ءىس- شاراعا ق ر ءى ءى م قاراستى «ارلان»، «بۇركىت» جانە جەدەل دەن قويۋ ارنايى جاساقتارى (ج د ا و) ، سونداي- اق اسكەري تىكۇشاقتار جۇمىلدىرىلدى. بۇدان باسقا، قاراسورا وسەتىن القاپتى اينالدىرا كوشپەلى مودۋلدى پوليتسيا بەكەتتەرى پايدالانىلدى. بۇل ارنايى اۆتوكولىكتەر. وندا تاۋلىك بويى كەزەكشىلىك جاساۋعا بارلىق مۇمكىندىك جاسالعان. ياعني، وندا قارۋ ساقتايتىن، ۇستالعانداردى قامايتىن، تاماقتاناتىن، ۇيىقتايتىن ورىندار بەلگىلەنگەن، ءتىپتى كونديتسيونەر دە بار»، - دەدى ا. المەتوۆ.
سونىمەن قاتار، ول سوڭعى جىلدارى ەسىرتكىمەن اينالىسۋشىلاردىڭ نەشە ءتۇرلى جاڭا قۋلىق ادىستەرگە بارىپ جاتقاندىعىن جەتكىزدى. «ادامنان قۋلىق ارتىلعان با!؟ ولار ءبىزدىڭ كوزىمىزگە ءتۇسىپ قالماس ءۇشىن، نەشە ءتۇرلى ءادىس- ايلا جاسايدى. قاراسورا نەگىزى مامىر ايىندا ءوسىپ، ماۋسىم ايىندا پىسە باستايدى عوي. بۇرىندارى ادامدار پىسكەن كەزىندە اۆتوكولىكپەن نەمەسە اتپەن بارىپ، ولاردى جيناپ، كەيىن كەلۋ ءۇشىن كومىپ كەتەتىن. ال قازىر قاراسورا وسەتىن القاپقا الدىن- الا جاسىرىن بارىپ، وزدەرىنە جەرتولە جاساپ الىپ، اپتالاپ جاتاتىن بولىپ ءجۇر. وزدەرىنە گاز، سۋ، ازىق- تۇلىك جەتكىزىپ الادى. قاراسورا ساقتايتىن قۇپيا ورىندار جاسايدى. ءبىز بيىلعى وپەراتسيا بارىسىندا سولاردىڭ بارلىعىن ۇستادىق. نەگىزىنەن ولار جەرگىلىكتى تۇرعىندار»، - دەدى ا. المەتوۆ.
ايتا كەتەلىك، شۋ القابىنىڭ اۋماعى 138 مىڭ گەكتاردى قۇرايدى. «كوكنار» وپەراتسياسى جىل سايىن ماۋسىم ايىندا باستالىپ، قازان ايىندا اياقتالادى. بيىلعى ءىس- شارا بارىسىندا 94 توننادان استام ەسىرتكى زاتتارى تاركىلەندى. ولاردىڭ ىشىندە قاراسورا وسىمدىگى - 61,3 توننا، گەروين - 40 كەلى، گاشيش - 63 كەلى، ماريحۋانا - 31,33 توننانى قۇرايدى. تيىسىنشە 25 ميلليوننان استام ءبىر رەتتىك ەسىرتكى دوزالارى زاڭسىز اينالىمعا شىعارىلمادى. ەسىرتكى بيزنەسىنە 45 ميلليون دوللاردان استام شىعىن كەلتىرىلدى.
ال بۇگىندە قارابازاردا قاراسورادان جاسالعان ءبىر كەلى ماريحۋانانىڭ باعاسى شامامەن 600 مىڭ تەڭگەنى قۇرايدى. ال 1 كەلى گەرويننىڭ باعاسى الماتىدا 20 مىڭ، ال وڭىرلەردە 40 مىڭ دوللارعا دەيىن بارادى.
اۆتور: جاپپاربەرگەن ايبوتا
