ميلاننان كوروناۆيرۋس جۇقتىرىپ كەلگەن قازاقستاندىقپەن ءبىر بورتتا بولعان 89 جولاۋشىنىڭ ءبارى انىقتالدى

بۇل تۋرالى نۇر- سۇلتان قالاسىنىڭ قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا ءمالىم ەتتى، دەپ حابارلايدى قازاقپارات ءتىلشىسى.

«13-ناۋرىزدا نۇر-سۇلتاندا ميلاننان «ماسكەۋ- نۇر- سۇلتان» اۋە رەيسى ارقىلى كەلگەن ايەلدەن كوروناۆيرۋس ينفەكسياسىن جۇقتىرعانى انىقتالىپ، قالامىزدا ءبىرىنشى جاعداي تىركەلگەن ەدى. يتاليا، وزدەرىڭىز بىلەتىندەي، ەپيدەميولوگيالىق احۋال بويىنشا 1ا ساناتىنا جاتادى. ياعني، وسى ەلدەن كەلگەن ازاماتتار وقشاۋلانۋى كەرەك. وسى ەرەجە بويىنشا قازاقستان ازاماتى وقشاۋلاندىرىلىپ، وعان لابوراتوريالىق زەرتتەۋ جۇرگىزىلىپ، ول ادامنىڭ كوروناۆيرۋستى جۇقتىرعانى انىقتالدى»، - دەدى باسقارما باسشىسى و ك ق- دا وتكەن باسپا ءسوز ءماسليحاتىندا.

ونىڭ ايتۋىنشا، كوروناۆيرۋس ينفەكسياسىن جۇقتىرعان ايەلمەن بىرگە بورتتا 89 جولاۋشى بولعان. ونىڭ ىشىندە 42 - قازاقستان ازاماتى، شەتەلدىك 47 ازامات بولعان (ر ف - 42، نيدەرلاندى - 1، اۆستراليا - 1، ا ق ش - 1، ۋكراينا - 1، مەكسيكا - 1).

«وسى 89 ادامنىڭ ءبارى دە تابىلدى. وسى ادامداردىڭ ىشىندە نۇر-سۇلتاننان سىرتقا 35 جولاۋشى شىعىپ كەتكەن. ونىڭ ىشىندە 14 ى قازاقستان ىشىنە تاراپ كەتكەن. وڭىرلەردەگى ارىپتەستەرىمىزگە ولار تۋرالى مالىمەتتى بەردىك. بۇگىن ساعات 08.00 كەزىندە وسى ادامداردى تابۋ بويىنشا تەكسەرۋ جۇرگىزدىك. ايماقتاردا ولاردى وقشاۋلاۋ بويىنشا جۇمىس جۇرگىزىلۋدە»، - دەدى ول. ساۋلە قيسىقوۆا اتالعان بورتتاعى تاعى 21 جولاۋشى رەسەيگە ۇشىپ كەتكەنىن ايتادى.

«نۇر-سۇلتان قالاسى بويىنشا 54 جولاۋشىنىڭ 53 ى ەلورداداعى ستاتسيونارلارعا جاتقىزىلعان. ر ف- نىڭ ءبىر ازاماتى ديپلوماتيالىق رانگ پەن ر ف ەلشىلىگىنىڭ نوتا بەرۋىنە بايلانىستى ەلشىلىك اۋماعىندا قالدى. 57 ادام اۋرۋحاناعا تولىعىمەن جاتقىزىلدى. تولىققاندى لابوراتوريالىق جۇمىس جۇرگىزىلدى. ناتيجە تەكسەرىلۋدە»، - دەدى ول.

اۆتور: ايان بەكەن ۇلى