باتىس قازاقستاندا ەگىز جىگىتتەر 88 ميلليون تەڭگەگە ەرەكشە ءنومىر ساتىپ الدى
«ازاماتتارعا ارنالعان ۇكىمەت» مەملەكەتتىك كورپوراتسياسى ب ق و بويىنشا فيليالىنىڭ PR- مەنەدجەرى اقنۇر نۇرعاليەۆانىڭ ءمالىم ەتكەنىندەي، جىل باسىنان بەرى «جوعارى سۇرانىسقا يە» اۆتوكولىك نومىرلەرىن 329 ادام العان.
كولىك ساتىپ الاردا ازاماتتار كولىككە ارنايى مەملەكەتتىك ءنومىر الۋى ءتيىس. ەگەر قىزمەت الۋشى ەرەكشە ءنومىرلى كولىكتىڭ تىزگىنىن ۇستاعىسى كەلسە، وندا قۇنى قىمباتتاۋ تۇراتىن «جوعارى سۇرانىسقا يە» ءنومىردىڭ ءبىرىن تاڭدايدى. ادەتتەگى قاراپايىم ءنومىردىڭ قۇنى - 2,8 ا ە ك، ياعني 8168 تەڭگە.
سۇرانىسقا يە نومىرلەر قۇنى جاعىنان التى ساناتقا بولىنەدى. 777، 007، ااا نەمەسە ZKO سىندى ءتۇرلى سيفرلىق بەلگىلەر اراسىنداعى «ادەمى» نومىرلەردىڭ ەڭ تومەنگى قۇنى - 166269 تەڭگە، ەڭ قىمباتى - 831345 تەڭگە. مامانداندىرىلعان ح ق و- عا جۇگىنگەن كەزدە ۇسىنىلعان نومىرلەردىڭ تىزىمىنەن ۇناعانىن تاڭداۋ ەركى بار.
ا. نۇرعاليەۆانىڭ ايتۋىنشا، ەرەكشە ءنومىرلى بولعاندار اراسىندا ەگىز جىگىتتەر - اسلان مەن جاسۇلان ناپيحونوۆتار بار. ولار 070QOO 07 جانە 707QOO 07 ءنومىردى تاڭداعان، ياعني ەكەۋىنىڭ ءارىپ بەلگىسى ۇقساس. ەكى ءنومىردىڭ باعاسى - 300 مىڭ تەڭگە. سول سەكىلدى ازامات دەگەن جۇرگىزۋشى 666 TOR 07 دەگەن ءنومىردى العان (قۇنى - 580 مىڭ تەڭگە).
مۇنداعى TOR ءسوزى ەجەلگى قۇدايلارعا قاتىستى. جۇرگىزۋشى ءومىر بويى وسى نومىرمەن جۇرگىسى كەلەتىنىن، سوندىقتان ءبىر-اق رەت تاڭداۋ جاساعانىن مالىمدەدى. جىل باسىنان بەرى ورال قالاسى مامانداندىرىلعان ح ق و بولىمىنەن كليەنتتەر جالپى سوماسى 87850604 تەڭگەگە «مىقتى» ءنومىر العان. سونداي-اق، «جوعارى سۇرانىسقا يە» نومىرلەر قاتارىنداعى ساندار نەمەسە ارىپتەردى قولدانا وتىرىپ، ءوز قالاۋىنداعى نومىرگە اكىمشىلىك پوليتسيا باسقارماسىنا جولىعۋ ارقىلى تاپسىرىس بەرۋگە بولادى.
كەرەكتى ءنومىر بوس بولسا، ءبىر ايدىڭ ىشىندە مامانداندىرىلعان بولىمنەن كەلىپ الادى. كولىكتى ساتقان جاعدايدا كليەنتتىڭ VIP- نومەردى ءوز اتىنا قالدىرۋ قۇقىعى بار.
تەك مامانداندىرىلعان بولىمگە ۋاقىتشا تاپسىرۋ كەرەك. ساقتاۋ مەرزىمى - 6 اي، العاشقى ايدا تەگىن ساقتالادى، قالعان 5 ايى ءۇشىن ءبىر رەت 8168 تەڭگە تولەنەدى.
«Egov پورتالىندا كولىكتىڭ تەحپاسپورتى مەن مەملەكەتتىك نومىرلەردى ۇيگە جەتكىزۋ قىزمەتى بار. اۆتوكولىكتى ونلاين تۇردە قايتا تىركەگەن سوڭ مامانداندىرىلعان بولىمگە بارىپ قاجەت ەمەس، ماماندار قۇجاتتاردى ءبىر كۇننىڭ ىشىندە جەتكىزىپ بەرەدى»، دەدى ا. نۇرعاليەۆا.
اۆتور: ەلجان ەرالى