كورەي دياسپوراسىنىڭ قيىر شىعىستان الماتى وبلىسىنا كۇشتەپ كوشىرىلگەنىنە - 85 جىل
العىس ايتۋ كۇنىندە ءداستۇر بويىنشا جەتىسۋلىق كورەيلەر مەن وزگە ۇلت وكىلدەرى باستوبە اۋىلى ماڭىنداعى «قازاق حالقىنا مىڭ العىس» مونۋمەنتى جانىندا سالتاناتتى جيىن وتكىزىپ، ىستىق ىقىلاستارىن ءبىلدىردى.
1937-جىلدىڭ قارا سۋىعىندا جۇزدەگەن كورەي وتباسىن ءدال وسى باستوبەگە اكەلىپ، ايدالاعا ءتۇسىرىپ كەتكەن. اش-جالاڭاش حالىق تاۋ ەتەگىنەن جەركەپە قازىپ پانالاۋعا ءماجبۇر بولعان.
الايدا جەرگىلىكتى قازاق اۋىلدارى ولاردى ۇيىنە اكەلىپ، بولمەنىڭ ءبىر شەتىنە ورنالاستىرىپ، ءبىر ءۇزىم نانىن بولىسكەنىن قازىرگى ۇرپاق ۇمىتپايدى، ۇمىتپاق ەمەس. بۇگىندە وبلىستا كورەي ۇلتىنىڭ 16 مىڭنان استام وكىلى تۇرادى. بۇل سول كەزدەگى جەرگىلىكتى حالىقتىڭ قوناقجاي- باۋىرمالدىلىعىنىڭ ءتاتتى جەمىسى دەپ بىلەدى.
«قازاق حالقىنا مىڭ العىس! مەن وسى العىس ايتۋ كۇنىندە بارشا قازاق حالقىنا راحمەتىمدى ايتقىم كەلەدى. ءوزىم وسى جەردە تۇرىپ جاتقان كورەيلەردىڭ ءۇشىنشى بۋىن ۇرپاعىمىن. ءبىزدىڭ بالالارىمىز بەن نەمەرەلەرىمىز دە وسى جەردە ءبىلىم الىپ، ءوسىپ-ءونىپ، ەڭبەك ەتۋدە. قازاق ەلى سول كەزدە ءوزىنىڭ قيىن جاعدايىنا قاراماستان ءبىزدى جانە كوپتەگەن وزگە ۇلت وكىلدەرىن باۋىرىنا باستى. ءبىز بۇل جاقسىلىقتى ەشقاشان ۇمىتپايمىز»، - دەدى قاراتال اۋداندىق كورەي اقساقالدار القاسىنىڭ ءتوراعاسى ۆيكتور پاك.