85 مۇعالىم جۇمىسسىز قالۋى مۇمكىن: الماتى وبلىسىنىڭ ۇستازدارى جانايقايىن جەتكىزدى
قونايەۆ. KAZINFORM - الماتى وبلىسىندا 85 مۇعالىم جۇمىستان بوساتىلۋى مۇمكىن. وسى جاعدايعا قاتىستى ءوڭىر اكىمدىگى تۇسىنىك بەردى.
شەلەك اۋىلىنداعى ءاليا مولداعۇلوۆا اتىنداعى مەكتەپتىڭ ۇستازدارى مەملەكەت باسشىسى مەن وبلىس اكىمى مارات سۇلتانعازييەۆكە ۆيدەوۇندەۋ جولدادى.
ايتۋلارىنشا، ەلدى مەكەندە جاڭا مەكتەپتىڭ اشىلۋىنا بايلانىستى 44 جىلدىق تاريحى بار ەسكى مەكتەپتە سىنىپتار جابىلىپ جاتىر. وسسىنىڭ سالدارىنان 85 مۇعالىم جۇمىسسىز قالۋى مۇمكىن.
شەلەك اۋىلىنداعى ءاليا مولداعۇلوۆا اتىنداعى ورتا مەكتەپ مۇعالىمدەرىنىڭ وتىنىشىمەن الماتى وبلىسى ەڭبەكشىقازاق اۋداندىق ءبىلىم ءبولىمىنىڭ باسشىسىمەن كەزدەسۋ ءوتتى.
جيىن بارىسىندا ۇستازدار قاۋىمى بەينەۇندەۋدە ايتىلعان ماسەلەلەر بويىنشا تۇسىنىكتەمە الدى.
ءبىلىم ءبولىمىنىڭ باسشىسى بۇگىنگى كۇنگە دەيىن ءا. مولداعۇلوۆا اتىنداعى ورتا مەكتەپتەن 279 وقۋشى مەن 12 مۇعالىمنىڭ جاڭا مەكتەپكە اۋىسقانىن جانە مۇعالىمدەردىڭ جۇمىس ۋاقىتىنىڭ قىسقارۋ قاۋپى جوق ەكەنىن اتاپ ءوتتى.
«قازىر ءا. مولداعۇلوۆا اتىنداعى ورتا مەكتەپتە 543 وقۋشى ءبىلىم الىپ جاتىر. الداعى ۋاقىتتا دا، اتالعان مەكتەپتىڭ وقۋشىلارى جاڭا مەكتەپكە اۋىسقان جاعدايدا دا مۇعالىمدەر جۇمىسپەن قامتىلاتىن بولادى. قازىرگى ۋاقىتتا مەكتەپتەگى وقۋ ءۇردىسى بەكىتىلگەن كەستەگە سايكەس ءجۇرىپ جاتىر»، - دەپ اتاپ ءوتتى وبلىس اكىمدىگىنەن.
