قازاق جاستارىنىڭ 82 پايىزى جانۇيانى باستى قۇندىلىق دەپ ەسەپتەيدى
دەپ حابارلايدى مينيسترلىكتىڭ باسپا ءسوز قىزمەتى.
اقتاۋ قالاسىندا اۋقىمدى شارا ءوتىپ جاتىر. حالىقارالىق جاستار فورۋمىنىڭ جۇمىسىنا جاستار ۇيىمدارىنىڭ وكىلدەرى، ستۋدەنتتەر، تۇرىكمەنستان، يران، رەسەي مەملەكەتتەرىنىڭ جانە ەلىمىزدىڭ جاس ماماندارى قاتىسۋدا. فورۋم قاتىسۋشىلارى الدىندا ءسوز سويلەگەن مينيستر نۇرلان ەرمەكبايەۆ:
«قازاقستان پرەزيدەنتىنىڭ ونەگەلى سوزدەرىنەن زاماناۋي جاس ازامات ومىرلىك جولى ءۇشىن ماڭىزدى ءارى پايدالى كەڭەس الا الادى.
«بولاشاققا باعدار: رۋحاني جاڭعىرۋ» باعدارلاماسىندا ەلباسى ۇلتتىق تاريح پەن مادەنيەتتى، داستۇرلەردى ۇمىتپاي، زامان اعىمىنا سايكەس جىلجىپ، پراگماتيكالىق باعىتپەن دامۋعا كەڭەس بەردى. وسىنى نازارعا قويساڭىز، العا قويعان ماقساتتارىڭىزعا جەتۋگە بولادى»، - دەپ اتاپ ءوتتى.
نۇرلان ەرمەكبايەۆ جاستارعا ومىردە دۇرىس ماقسات- مىندەتتەر قويىپ، پايدالى ىستەرمەن اينالىسۋعا كەڭەس بەردى.
«جاستار ارمانشىل كەلەدى. بۇل وتە دۇرىس. بىرەۋلەر ومىردە ادامزاتتى جازىلماس دەرتتەن ساۋىقتىرسام دەپ ارماندايدى، بىرەۋلەر جاڭا وتىن تۇرىمەن جۇمىس ىستەيتىن ەنەرگەتيكالىق قوندىرعى ويلاپ تاپسام دەپ ارماندايدى، بىرەۋلەر بيزنەس يمپەريا قۇرسام دەپ ارماندايدى. ال، بىرەۋلەر اقىرەتتى ويلاپ، جاقىندارىن ۋايىم- قايعىعا سالادى. سوندىقتان، ومىردە دۇرىس تاڭداۋ جاساڭدار. ءومىر سۇرۋگە ۇمتىلىڭدار، ارمانداڭدار، ۋاقىتتى بوسقا وتكىزبەي ومىردە پايدالى ىسپەن اينالاسۋعا ۇمتىلىڭدار. وزدەرىڭنىڭ پاراساتتارىڭ مەن بىلىمدەرىڭە، ەرىك- جىگەرلەرىڭە سەنىڭدەر»، - دەپ جاستارعا كەڭەس بەردى مينيستر.
مينيستر كەلتىرگەن الەۋمەتتىك زەرتتەۋلەرگە سايكەس، ەل جاستارىنىڭ 82 پايىزى «جانۇيانى»، 57,5 پايىزى «دەنساۋلىقتى»، 32 پايىزى «دوستىقتى»، 15,8 پايىزى «باقىتتى ءومىردى»، 15,5 پايىزى «ماحابباتى» ومىردەگى باستى قۇندىلىققا جاتقىزادى ەكەن.
«جاستار ساياساتىنىڭ ماقساتى- جاستاردىڭ رۋحاني، مادەني تۇرعىدا جەتىلىپ، ءبىلىم الۋىنا، كاسىبي دامۋىنا مەملەكەت تاراپىنان قولداۋ كورسەتۋ. مەملەكەت جاستاردىڭ ومىرلىك باعىتتارى مەن ولاردىڭ الەۋمەتتىك دەڭگەيىنىڭ جوعارى بولۋى جانە مەملەكەتتىڭ دامۋىنا جاستاردىڭ ءوز ۇلەستەرىن قوسۋى جولىندا قاجەتتى جاعدايدى جاساۋدا»، - دەدى نۇرلان ەرمەكبايەۆ.
سونداي- اق ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ جاستاردىڭ جۇمىسپەن قامتىلۋى باعىتىندا ەلىمىزدە ءبىرقاتار مەملەكەتتىك باعدارلامالار بار ەكەندىگىن ايتتى. اتاپ ايتقاندا «ديپلوممەن اۋىلعا»، «جاستار تاجىريبەسى»، «ءونىمدى جۇمىسپەن قامتۋ جانە جاپپاي كاسىپكەرلىكتى دامىتۋ» (ب ج ك 2020) باعدارلامالارى ءساتتى جۇزەگە اسۋدا. بۇدان بولەك، وڭىرلەردە جاستاردىڭ مەملەكەتتىك باعدارلامالار بويىنشا بىلىكتىلىگىن ارتتىرۋ باعىتىندا ارنايى جۇمىس ىستەيتىن 208 رەسۋرستىق ورتالىقتارى بار.
