انا سۇتىمەن ەمىزۋ الەمدە 820 مىڭ بالانىڭ ءومىرىن قۇتقارادى

استانا. قازاقپارات - جىل سايىن تامىزدىڭ ءبىرىنشى اپتاسىندا دۇنيەجۇزىلىك ومىراۋ سۇتىمەن ەمىزۋ اپتالىعى اتاپ وتىلەدى، دەپ حابارلايدى قازاقپارات دەنساۋلىق ساقتاۋ مينيسترلىگىنە سىلتەمە جاساپ.

1990 -جىلدان باستاپ 1-7-تامىز ارالىعىندا الەمنىڭ 170 مەملەكەتى انا سۇتىمەن قورەكتەندىرۋ، ەمىزۋ اپتالىعىن وتكىزىپ كەلەدى. بالا قۇقىقتارى تۋرالى كونۆەنتسياعا سايكەس، ءار نارەستە جانە باسقا جاس توپتارى دۇرىس تاماقتانۋعا قۇقىلى.

«ەمىزۋ - بالانىڭ دەنساۋلىعى مەن ءومىر ءسۇرۋىن قامتاماسىز ەتۋدىڭ ەڭ ءتيىمدى ادىستەرىنىڭ ءبىرى. ومىراۋ ءسۇتى - نارەستەلەر ءۇشىن تاماشا تاعام. ول قاۋىپسىز، زيانسىز جانە كوپتەگەن اۋرۋلاردان قورعاۋعا كومەكتەسەتىن انتيدەنەلەردەن تۇرادى. انا ءسۇتىن ەمگەن سابيلەر ينتەللەكتۋالدى تۇردە جاقسى داميدى، ارتىق سالماقتان از زارداپ شەگەدى جانە قانت ديابەتىنە بەيىم بولمايدى. ەمىزەتىن ايەلدەردە ءسۇت بەزى مەن انالىق بەز قاتەرلى ىسىگى قاۋپى دە تومەندەيدى» ، - دەپ جازىلعان مينيسترلىك حابارلاماسىندا.

نارەستەلەردى تۋعاننان 23-ايعا دەيىن ەمىزۋ جىل سايىن بۇكىل الەم بويىنشا 820 مىڭ بالانى قۇتقارۋعا مۇمكىندىك بەرەدى.

«ءبىزدىڭ ەلىمىزدە دە انا سۇتىمەن ەمىزۋگە ۇلكەن ءمان بەرىلەدى. ەمىزۋ - انانىڭ بالامەن ەموتسيونالدى بايلانىسىن كۇشەيتەتىن، بالانىڭ پسيحوفيزيكالىق دامۋىنا جالپى قولايلى دامۋدى قامتاماسىز ەتەتىن ماڭىزدى پروتسەستەردىڭ ءبىرى. بولاشاق انالاردى ومىراۋ سۇتىمەن ەمىزۋگە دايىنداۋ ايەلدىڭ جۇكتىلىك كەزەڭىندە ونىڭ دەنەسىنىڭ فيزيولوگيالىق وزگەرىستەرىن، بالانى كەۋدەگە سالۋ تاسىلدەرىن جانە تاماقتاندىرۋدىڭ جالپى ەرەجەلەرىن تۇسىندىرۋدەن باستالادى.

قازىرگى ۋاقىتتا ەلىمىزدە تەك ومىراۋ سۇتىمەن – 0 دەن 6 ايعا دەيىنگى 180 مىڭ بالا جانە 2 جاسقا دەيىنگى 568 مىڭ بالا (قوسىمشا تاماقتاندىرۋمەن جانە جالپى تاماقتانۋمەن بىرگە) ومىراۋ سۇتىمەن قورەكتەنەدى»، - دەيدى دەنساۋلىق ساقتاۋ مينيسترلىگى.