14:13, 10 - قاڭتار 2017 | GMT +5
بەلارۋس 80 ەلدىڭ ازاماتتارىنا ۆيزاسىز كەلۋگە رۇقسات بەردى
استانا. قازاقپارات - بەلارۋس پرەزيدەنتى الەكساندر لۋكاشەنكو 80 مەملەكەتتىڭ ازاماتتارىنا ەلدە ۆيزاسىز بەس كۇنگە دەيىن ءجۇرىپ- تۇرۋىنا ەركىندىك بەرەتىن جارلىق شىعاردى.

پرەزيدەنتتىڭ رەسمي سايتىندا حابارلانعانداي، قۇجاتقا 9 - قاڭتاردا قول قويىلعان. ۆيزاسىز ءجۇرۋ رەجيمى ەۋروپا وداعى ەلدەرى مەن ا ق ش، جاپونيا، برازيليا، يندونەزيا جانە تاعى 48 ەلدىڭ ازاماتتارىنا قاتىستى ەنگىزىلدى.
قىتاي، گوندۋراس، گايتي، گامبيا، ءۇندىستان، ليۆان، ناميبيا، ساموا جانە ۆەتنام ازاماتتارى ۆيزاسىز ءجۇرۋى ءۇشىن پاسپورتتارىندا باسقا ەۋروپالىق ەلدەردىڭ جارامدى ۆيزاسى بولۋى شارت. جاڭا ەرەجەنىڭ بەلارۋسكە كەلەتىن رەسەيلىكتەرگە قاتىسى جوق، سەبەبى رەسەيدەن باراتىندار ءۇشىن پاسپورتتى تەكسەرۋ پۋنكتى قاراستىرىلماعان.
جارلىق ول رەسمي باسپا سوزدە جاريالانعاننان ءبىر ايدان سوڭ كۇشىنە ەنەدى.
«ازاتتىق» جاڭالىقتارى