قىزىلوردادا تاۋلىگىنە 80 توننا قۇراما جەم شىعاراتىن زاۋىت اشىلدى - فوتو
ءوندىرىس ورنىنا وبلىس اكىمى قىرىمبەك كوشەربايەۆ پەن اۋىل شارۋاشىلىعى مينيسترلىگىنىڭ جاۋاپتى حاتشىسى ارمان ەۆنيەۆ بارىپ، زاۋىتتى سالتاناتتى تۇردە ىسكە قوستى.
مەملەكەتتىك- جەكە مەنشىك سەرىكتەستىك نەگىزىندە اشىلىپ جاتقان زاۋىتتا 250 گە جۋىق ادام جۇمىس جاسايتىن بولادى. كاسىپورىندا شيكىزات جانە دايىن ونىمدەر ساقتايتىن قويمالار، اۆتوتارازى مەن زەرتحانا، قالتالاۋ سەحى، ۇن تارتۋ ديىرمەنى مەن ماكارون شىعارۋ وندىرىستەرى بار. اتالعان وندىرىستەردەن شىعاتىن ءداندى داقىل قالدىقتارىن قۇراما جەم شىعارۋعا پايدالانادى. زاۋىت گەرمانيادان اكەلىنگەن زاماناۋي قوندىرعىلارمەن جابدىقتالعان.
ايماق باسشىسى جاڭا زاۋىتتىڭ اشىلۋىمەن قۇتتىقتاپ، اۋىل شارۋاشىلىعى سالاسىنداعى جەتىستىكتەرگە توقتالدى.
- سوڭعى ەكى جىلدا سىر ەلىنىڭ اۋىل شارۋاشىلىعىنا تارتىلعان قاراجات مولشەرى 7,7 ەسەگە ءوستى. ءبىزدىڭ ديقاندار ەكى جىل قاتارىنان بۇرىن- سوڭدى بولماعان رەكوردتىق كورسەتكىشتەرگە قول جەتكىزىپ، كۇرىشتىڭ مول ءونىمىن جينادى. بۇگىندە «سىر مارجانىنىڭ» ەكسپورتتىق الەۋەتىن ارتتىرۋعا بارلىق جاعداي جاسالىپ جاتىر. ەگىن شارۋاشىلىعىن ءارتاراپتاندىرۋ ءۇشىن وزگە دە ونىمدەردى سۋبسيديالاۋدى قولعا الدىق. 15 مىڭ گەكتار جەرگە تامشىلاتىپ سۋارۋ تاسىلىمەن جۇگەرى مەن قىزاناق ەگىپ، ولاردى وڭدەپ ەكسپورتقا شىعارۋ ءۇشىن كراحمال، تومات سىعىندىسى مەن شىرىن ءوندىرۋ زاۋىتتارىن سالۋعا كىرىستىك. مال شارۋاشىلىعىنا كەلەتىن بولساق، بيىل ءبىز بۋفەرلىك ايماقتان شىعىپ، ءوزىمىزدى دە ەتپەن قامتاماسىز ەتىپ، ونى سىرتقا دا شىعارا باستاۋعا جول اشتىق. وسىعان وراي جاڭاقورعاندا 7 مىڭ توننا ەت ونىمدەرىن وڭدەيتىن كاسىپورىن قۇرىلىسىن باستاپ جاتىرمىز. وسىنىڭ ءبارى وڭدەۋ ونەركاسىبىنىڭ وسۋىنە زور مۇمكىندىك بەرەدى، - دەدى وبلىس اكىمى.
اۋىل شارۋاشىلىعى مينيسترلىگىنىڭ جاۋاپتى حاتشىسى قىزىلوردا وبلىسىندا مەملەكەتتىك باعدارلامالار اياسىندا اۋقىمدى جوبالار جۇزەگە اسىرىلىپ جاتقانىن ايتا كەلىپ، جاڭا زاۋىتتتىڭ ىسكە قوسىلۋىمەن قۇتتىقتادى.
- بۇگىن قىزىلوردادا اگروبيزنەس-2020 باعدارلاماسى اياسىندا ەكى بىردەي زاۋىتتىڭ ىسكە قوسىلۋىنا كۋا بولدىق. بۇل ونەركاسىپ ورىندارى ايماقتىڭ ەكونوميكالىق دامۋىنا ءوز ۇلەسىن قوسادى دەپ سەنەمىن. الدا اۋىل شارۋاشىلىعى ونىمدەرىنىڭ ەكسپورتتىق الەۋەتىن ارتتىرۋ كەرەك، - دەدى ول.
ايتا كەتۋ كەرەك، قازىرگى تاڭدا وبلىستىڭ اۋىل شارۋاشىلىعى سالاسىندا قۇراما جەم وندىرەتىن بىردە- ءبىر كاسىپورىن جوق. جىل سايىن وبلىس كولەمىندە مال باسىنىڭ كوبەيۋى ءوز كەزەگىندە قۇراما جەم زاۋىتىنىڭ قاجەتتىلىگىن ارتتىرۋدا. كاسىپورىن باسشىسى باقداۋلەت ماقاشيەۆ بۇل جۇمىستاردىڭ ءارى قاراي جالعاساتىنىن ايتا كەلە، كەلەشەكتە ۇن شىعارۋ زاۋىتىن جانە ماكارون فابريكاسىن ىسكە قوسۋدى جوسپارلاپ وتىرعانىن جەتكىزدى. قازىرگى تاڭدا ولاردىڭ بارلىق عيماراتتارى سالىنۋلى تۇر.
