16:05, 18 - مامىر 2015 | GMT +5

الەم ەلدەرىن ارالاعان 80 جاستاعى قازاق كەمپىرى الەۋمەتتىك جەلىنىڭ جۇلدىزىنا اينالدى - فوتو

استانا. قازاقپارات - Facebook الەۋمەتتىك جەلىسىندە ساياحاتشى اجە جۇلدىز بولدى، - دەپ حابارلايدى Tengrinews.kz ءتىلشىسى.

يشارك:

80 جاستاعى اجە الەمنىڭ ءار تۇكپىرىن ارالاپ، ءوزى بولعان جەرلەردەگى ماڭىزدى ورىنداردا نەمەرەلەرىمەن جانە بالالارىمەن بىرگە سۋرەتكە تۇسەدى. ونىڭ نەمەرەسى اجەسىنىڭ Fashion park تە تۇسكەن سۋرەتىن جاريالادى.

«80 جاستا! لوندون، تايلاند، فرانسيا، يسپانيا... ول ديسنەيلەندتىڭ بارلىق اتكەنشەگىنە ءمىنىپ كوردى! بۇل مەنىڭ اجەم!»، - دەپ جازدى نەمەرەسى. بىرنەشە ساعاتتا سۋرەتتى 1300 ادام ۇناتىپ، 430 ادام ءوز پاراقشاسى ارقىلى ءبولىستى. Facebook قولدانۋشىلارى اجەيدىڭ باسقا ساياحاتتارى تۋرالى تولىعىراق بىلگىسى كەلەتىنىن جازىپ جاتىر.

Tengrinews.kz ءتىلشىسى اجەگە حابارلاسىپ، قىزىقتى ساپارلارى تۋرالى تولىعىراق سۇرادى. «مەن العاش رەت 79 جاسىمدا لوندونعا باردىم. نەمەرەلەرىم مەنى بارۋعا كوندىردى، العاشىندا قورىققانمىن. ءبىراق ۇشاقتا ءوزىمدى جاقسى سەزىندىم، - دەدى 80 جاستاعى لەنا توقسانبايەۆا. - ءبىز وزىمىزبەن بىرگە قازى-قارتا الىپ كەتتىك، سوندىقتان تاماق جونىنەن قينالعان جوقپىز. ولاردىڭ دا تاماعى ۇنادى. كەيىن بالالارىممەن تايلاندقا بارىپ دەمالدىق. مەن ولاردىڭ ءتىلىن تۇسىنبەيمىن عوي، ولار ماعان ءوز تىلىندە بىردەڭە ايتتى، مەن قازاقشا جاۋاپ بەردىم. ولاردىڭ شىبىن-شىركەيىن جەگەن جوقپىن. مەن تەك سورپا عانا ءىشتىم»، - دەدى اجەي.

ونىڭ نەمەرەسى ايدىن توقسانبايەۆا اجەسىن جوعالتىپ العان ءساتى تۋرالى ايتىپ بەردى. «ءبىر كۇنى ءبىز جاعاجايدا جاتقان اجەمىزدى جوعالتىپ الدىق. قورقىپ كەتىپ كورشىلەرىمىزدەن سۇراي باستادىق. ونىڭ سۋعا تۇسۋگە كەتكەنىن كەيىن بىلدىك. ول شومىلعاندى جاقسى كورەدى»، - دەدى ايدىن.

ونىڭ نەمەرەسىنىڭ ايتۋىنشا، اجەي ەشقاشان شارشامايدى. كۇنى بويى جۇرگەننەن كەيىن ول بىردەن ۇيىقتاپ قالادى ەكەن. «ول بارلىعىنا ۇلگەرۋگە تىرىستى. ديسنەيلەند اتكەنشەگىنە وتىرعاندا دا ول قورىققان جوق. بىزبەن بىرگە كەزەكتە تۇرعان امەريكالىق وتباسى ۇلكەن ادامعا اتكەنشەككە وتىرۋ قاۋىپتى ەكەنىن ايتتى. ءبىراق اجەم قورىققان جوق»، - دەدى ايدىن.

اجە ۇلىمەن بىرگە لۋۆردە

80 جاستاعى اجە بارلىق جەرگە قازاقتىڭ ۇلتتىق كيىمىن كيىپ بارادى. اجەيدىڭ نەمەرەسىنىڭ ايتۋىنشا، ول وتباسىمەن بىرگە قىدىرعاندى جاقسى كورەدى. «ءبىزدىڭ ساياحاتىمىزدىڭ اقشاسىن اكەم تولەيدى. ءبىز اقشانى ۇنەمدەۋگە تىرىسامىز. كەلەسى جىلى اجەم مەككەگە بارۋدى جوسپارلاپ وتىر. بارلىعى دۇرىس بولادى دەپ ۇمىتتەنەمىن»، - دەدى نەمەرەسى.

پاريجدەگى ەيفەل مۇناراسى جانىندا