اقىن قادىر مىرزا ءاليدىڭ تۋعانىنا 80 جىل

استانا. قازاقپارات - 1935-جىلى قازاقتىڭ اقىنى، قازاقستاننىڭ حالىق جازۋشىسى، ق ر مەملەكەتتىك سىيلىعىنىڭ لاۋرەاتى، رەسپۋبليكالىق «تارلان»، حالىقارالىق «ازياس» (مونعولدان اۋدارعاندا «تالانت» ) سىيلىقتارىنىڭ يەگەرى قادىر مىرزا ءالي عينايات ۇلى دۇنيەگە كەلدى.

ول باتىس قازاقستان وبلىسىنىڭ جىمپيتى كەنتىندە تۋعان. 1958-جىلى قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىن تامامداپ، ەڭبەك جولىن سول كەزدە جاڭادان اشىلعان بالالار جۋرنالى «بالدىرعاننان» باستاعان. 1962-1965-جىلدارى «جۇلدىز» جۋرنالى رەداكسياسىندا پوەزيا جانە سىن ءبولىمىنىڭ مەڭگەرۋشىسى، جاۋاپتى حاتشى، باس رەداكتوردىڭ ورىنباسارى، 1968-1973-جىلدارى «جازۋشى» باسپاسىندا قازاق پوەزياسى ءبولىمىنىڭ مەڭگەرۋشىسى، كەيىن قازاقستان جازۋشىلار وداعىندا پوەزيا سەكسياسىنىڭ كەڭەسشىسى بولعان.1993-جىلدان «بالاۋسا» باسپاسىنىڭ ديرەكتورى بولدى.

تۇڭعىش تۋىندىسى 1954-جىلى «پيونەر» جۋرنالىندا جاريالاندى. سودان بەرگى ۋاقىت ىشىندە 40 تان استام جىر جيناقتارى مەن ادەبي-سىن، ءان ولەڭدەرى مەن پروزالىق كىتاپتارى: «كوكتەم» (1959)، «دانىشپان» (1961)، «ساباق»، «وي ورمانى» (1965)، «دالا ديدارى» (1966)، «بۇلبۇل باعى» (1967)، «اق وتاۋ» (1968)، «كۇمىس قوڭىراۋ»، (1970)، «دومبىرا» (ەكى كىتاپ، 1971 جانە 1974)، «كەش» (1973)، «جەرۇيىق» (1976)، «قورامساق»، «كوكپار»، « قىزىل كىتاپ»، «الاقان» (1981)، «ساز سيقىرى» (1982)، «كۇندەر-اي» (1984)، سونداي-اق توقسانىنشى جىلدارى تاڭدامالى شىعارمالارىنىڭ بەس تومدىعى، ال 2001-جىلى «قازىعۇرت» باسپاسىنان 15 تومدىعى شىققان.

بىرنەشە پەساسى ساحنالاندى. ەكى جۇزگە جۋىق ءان ماتىندەرىن جازىپ، «كۇندەر-اي» (1984) دەگەن اتپەن جەكە جيناق بولىپ شىقتى. كوپتەگەن ولەڭدەرى وقۋلىقتارعا ەنگەن. بالالارعا ارنالعان ولەڭ، جاڭىلتپاش، جۇمباق، مىسالدارمەن قازاق بالالار ادەبيەتىن دامىتۋعا ەلەۋلى ۇلەس قوسىپ كەلەدى. ولار: «جاڭعالاقتار» (1960)، «دانىشپان» (1961)، «نويان قويان» (1962)، «الۋان پالۋان» (1963)، «ساباق» (1964).

ولەڭدەرى اعىلشىن، فرانسۋز، نەمىس، بولگار، ۆەنگر، فين ت. ب. كوپتەگەن شەتەل تىلدەرىنە اۋدارىلعان. ول ءوۆيدىڭ، ءرۋميدىڭ، گەينەنىڭ، گيۋگونىڭ، لەرمونتوۆتىڭ، ەسەنيننىڭ، راسۋل عامزاتوۆتىڭ، مەجەلايتيستىڭ، پەتيفيدىڭ ت. ب. جىرلارىن قازاق تىلىنە اۋدارعان.

«ۇكىلى ۇزىندىلەر» (1996)، «عيبراتناما» (2001)، «جازمىش» (2001)، «ەڭىرەپ وتكەن ەرلەر-اي» (2001)، «ءيىرىم» (2004)، «شىرعالاڭ» (2004)، «الماس جەردە قالماس» (2004)، ت. ب. كوپتەگەن كىتاپتاردىڭ اۆتورى.

ورىس تىلىندە «ۇيقىسىز تۇندەر»، «اق وتاۋ»، «بۇلبۇل باعى»، «دالا ديدارى»، «ساباق»، «الاقان»، «دومبىرا»، وزبەك تىلىندە «الاقان»، ءازىربايجان تىلىندە «بۇلبۇل باعى»، مونعول تىلىندە «شىمىر جاڭعاق» سياقتى كىتاپتارى باسىلدى.

1966-جىلى «وي ورمانى» جيناعى ءۇشىن قازاقستان لەنين كومسومولىنىڭ سىيلىعى بەرىلدى. 1980-جىلى «جەرۇيىق» جىر كىتابى ءۇشىن قازاق ك س ر مەملەكەتتىك سىيلىعىنىڭ لاۋرەاتى اتاندى. قازاقستاننىڭ حالىق جازۋشىسى، قازاقستان رەسپۋبليكاسىنىڭ ءانۇرانى ءماتىنى اۆتورلارىنىڭ ءبىرى بولعان. 2001-جىلى تاۋەلسىز «تارلان» سىيلىعىن الدى. «پاراسات» وردەنىنىڭ يەگەرى (2005).