مارات جىلانبايەۆتىڭ گيننەس كىتابىنا ەنگەن 7 رەكوردى
1963-جىلى ءساۋىر ايىنىڭ 19- جۇلدىزىندا قاراعاندى وبلىسى فرۋنزە سوۆحوزىندا دۇنيەگە كەلگەن. اتا-اناسىنان ەرتە ايىرىلعان. مەكتەپتىڭ 1-8- سىنىپتارىن قاراعاندى وبلىسىنىڭ بالالار ۇيىندە وقىپ، سوندا تاربيەلەنگەن. 12 جاسىنان جەڭىل اتلەتيكامەن، ۆەلوسيپەد، شاڭعى سپورتىمەن اينالىسقان.
مارات جىلانبايەۆ - ناعىز ۋلترامارافونشى. 1990-جىلدارى 7 رەت الەمدىك رەكورد ورناتقان. ازيا، افريكا، امەريكا جانە اۆستراليانىڭ ەڭ ءىرى شولدەرىن جۇگىرىپ وتكەن. سپورتتىق كارەراسىندا 16000 شاقىرىمنان استام اراقاشىقتىقتى جۇگىرىپ شىققان ەكەن.
1-رەكورد. ءبىر جىلدا ەڭ كوپ جۇگىرگەن ادام.
مارات جىلانبايەۆ 1990-1991-جىلدارى ەڭ العاشقى رەكوردىن ورناتتى. ياعني، ءبىر جىلدا ەڭ كوپ جۇگىرگەن، مارافونعا قاتىسقان ادام دەپ تانىلعان. ەگەر ءبىر جىلدا 365 كۇن بار دەسەك، مارات جىلانبايەۆ سونىڭ 226 كۇنىن جۇگىرۋگە ارناعان. 42,2 شاقىرىمدىق مارافوندى كۇندە جۇگىرىپ وتىرعان.
2-رەكورد جانە 3-رەكوردى. كلاسسيكالىق مارافوندى ەڭ كوپ جۇگىرگەن ادام
1991-جىلى 23 كۇندە 23 كلاسسيكالىق مارافونعا قاتارىنان قاتىسادى. ءارى تاپ سول جىلى ءوز رەكوردىن ءوزى جاڭارتادى. ياعني، ءبىر كۇندە ەكى مارافوننان جۇگىرىپ، 15 كۇندە 30 كلاسسيكالىق مارافوندى 4 ساعات 54 سەكۋند جۇگىرىپ وتەدى. بۇل الەمدىك رەكوردتاردى ءالى كۇنگە دەيىن ەشكىم جاڭارتپاعان.
4-رەكورد. قاراقۇم ءشولىن كەسىپ ءوتتى
كلاسسيكالىق مارافونداردان كەيىن مارات جىلانبايەۆ تابيعاتتى باعىندىرۋعا كوشەدى. 1992-جىلى ساۋىردە ازياداعى ءىرى شولدەردىڭ ءبىرى - قاراقۇمدى جۇگىرىپ وتەدى. 20 كۇندە 1200 شاقىرىم جۇگىرەدى.
5-رەكورد. ساحارا ءشولىن كەسىپ ءوتتى
1993-جىلى 25- اقپان مەن 23- ناۋرىز ارالىعىندا الەمدەگى ەڭ ۇلكەن ءشول - ساحارا ءشولىن جۇگىرىپ وتەدى. 24 كۇندە 1700 شاقىرىم جۇگىرگەن.
6-رەكورد. ۇلكەن ۆيكتوريا ءشولىن كەسىپ ءوتتى
1993-جىلى 24 -قاراشا مەن 15- جەلتوقسان ارالىعىندا اۆسترالياداعى ءىرى ءشول - ۇلكەن ۆيكتوريا ءشولىن كەسىپ وتەدى. 22 كۇندە 1600 شاقىرىم جۇگىرگەن.
7-رەكورد. نيەۆادا شولىمەن جۇگىرىپ ءوتتى
1994-جىلى 1- جانە 19- ءساۋىر ارالىعىندا امەريكاداعى ءىرى ءشول - نيەۆادا ءشولىن جۇگىرىپ كەسىپ وتەدى. 17 كۇندە 1218 شاقىرىم جۇگىرەدى.
massaget.kz
