قاڭتار وقيعاسى: قىلمىس بەلگىلەرىنىڭ بولماۋىنا بايلانىستى 7 ءىس توقتاتىلدى
بۇل تۋرالى ءماجىلىستىڭ جالپى وتىرىسىندا قاڭتار وقيعاسىنا قاتىستى ماسەلەلەردى قاراۋ كەزىندە سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى ولجاس بەكتەنوۆ ءمالىم ەتتى، دەپ حابارلايدى قازاقپارات ءتىلشىسى.
«سونىمەن قاتار ارنايى پروكۋرورلارعا ادامنىڭ قايتىس بولۋ فاكتىسىمەن تىركەلگەن 8 قىلمىستىق ءىس بەرىلدى. سىبايلاس جەمقورلىققا قارسى قىزمەت قۇقىق قورعاۋ ورگاندارى قىزمەتكەرلەرىنىڭ زاڭعا قارسى ارەكەتتەرى تۋرالى كۋالاندىراتىن وبەكتيۆتى دەرەكتەر انىقتالماعاندىقتان، ءىس-ارەكەتتە قىلمىس قۇرامىنىڭ بولماۋىنا بايلانىستى 7 قىلمىستىق ءىستى توقتاتتى»، - دەدى و. بەكتەنوۆ.
وسى ورايدا ول اگەنتتىك قىلمىستىق ىستەردى تەرگەۋ كەزىندە ازاپتاۋلاردى تەرگەۋ جونىندەگى ىستانبۇل حاتتاماسىنىڭ تالاپتارىن قاتاڭ ۇستاناتىنىن اتاپ ءوتتى.
«ءبىزدىڭ باستى ماقساتىمىز - وقيعالاردىڭ بۇكىل حرونولوگياسىن انىقتاۋ جانە ءاربىر ءوتىنىش بويىنشا وبەكتيۆتى قۇقىقتىق باعا بەرۋ. تارتىپسىزدىكتەر جاپپاي بولعاندىقتان، بۇعان ءبىراز ۋاقىت قاجەت. بارلىق قىلمىستىق ىستەر بويىنشا تەرگەۋ جوسپارى قۇراستىرىلىپ، وندا تەرگەۋ- جەدەل ءىس- شارالارى كەشەنى قامتىلدى»، - دەدى اگەنتتىك باسشىسى.
بۇدان بۇرىن حابارلانعانداي، ولجاس بەكتەنوۆ قاڭتار ايىنداعى وقيعالاردان كەيىن، قۇقىق قورعاۋ ورگاندارىنا كۇشتىك قۇرىلىم قىزمەتكەرلەرىنىڭ ارەكەتتەرىنە قاتىستى ارىزدار كەلىپ تۇسە باستاعانىن ايتتى. وسى ورايدا ول كۇشتىك قۇرىلىمداردىڭ قىزمەتكەرلەرىنە قاتىستى 234 قىلمىستىق ءىس تەرگەلىپ جاتقانىن ايتتى.
اۆتور: رۋسلان عابباسوۆ