قازاقستاندا سۇرانىسقا يە 7 ماماندىق

استانا. قازاقپارات - قازاقستانداعى حالىقتى جۇمىسپەن قامتۋ ورتالىقتارىنا كەلەتىن ازاماتتار كوپتەپ جۇمىسقا تۇراتىن ماماندىقتاردىڭ وندىعى بەلگىلى بولدى.

بۇل تۋرالى قازاقپارات ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.

ماماندىقتار مەن 2018-جىلدىڭ 9 ايىنداعى ەڭبەك نارىعى بويىنشا زەرتتەۋدى «ەڭبەك رەسۋرستارىن دامىتۋ ورتالىعى» ا ق جۇرگىزگەن.

ورتالىقتىڭ زەرتتەۋىنىڭ ناتيجەسىنە قاراعاندا، حالىقتى جۇمىسپەن قامتۋ ورتالىقتارىنا كەلەتىن ازاماتتار كوپ جاعدايدا كۇزەتشى، تاربيەشى جانە كەڭەسشى- ساتۋشى جۇمىسىنا ورنالاساتىن كورىنەدى.

جۇمىس بەرۋشىلەر تاراپىنان ەڭ جوعارعى سۇرانىسقا يە ماماندىقتاردىڭ قاتارىنا ءارتۇرلى جۇمىس اتقاراتىن ادام، سلەسار جانە الەۋمەتتىك جۇمىسكەر جاتادى. سونىمەن بىرگە، جۇمىس بەرۋشىلەر تاراپىنان سۇرانىسقا يە 7 ماماندىقتىڭ ىشىنە قوسالقى جۇمىسشى، مۇعالىم، تازالىقشى، جۇرگىزۋشى، مەدبيكە، كۇزەتشى جانە سانيتار ەنەدى.

جەتىسپەۋشىلىگى كوپتەپ سەزىلەتىن ماماندىقتاردىڭ كوش باسىندا قوسالقى جۇمىسشى ماماندىعى تۇر. ول ماماندىق بويىنشا 20522 بوس جۇمىس ورىنى بار. سونىمەن بىرگە، ولاردىڭ قاتارىنا كۇزەتشى (3953)، مەدبيكە (3683)، سانيتار (2531)، اۆتوكولىك جۇرگىزۋشىسى (2322)، نىساندى تازارتۋشى (2273)، جۇرگىزۋشىنىڭ كومەكشىسى (2135)، جۇك كوتەرۋشى (1864)، وندىرىستىك جانە قىزمەتتىك بولمەلەردى تازارتۋشى (1733)، جالپى تاجىريبەدەگى دارىگەر (1677) دە جاتاتىن كورىنەدى.

ال سۇرانىسى تومەن ماماندىقتارعا زاڭگەر (1510 بوس ورىن)، تەحنيك-پروگرامميست (706)، قارجىگەر (570)، جالپى پروفيلدى ەكونوميست (558)، تۇرعىلىقتى مەكەندەردى اباتتاندىراتىن جۇمىسشى (487)، كۋرەر (428)، جالپى پروفيلدى تەحنيك-تەحنولوگ (344)، زاڭگەر-كەڭەسشى (219) جاتادى.